ବଳ ଗୋଟାଇବା ପାଇଁ ଚାଷୀଙ୍କ ମହାପଂଚାୟତ । ରାକେଶ ଟିକାୟତଙ୍କ ଡାକରାରେ ଉତ୍ତରପ୍ରଦେଶ ମୁଜାଫରନଗରରେ ବସିଛି ଚାଷୀଙ୍କ ମହା ପଂଚାୟତ
କନକ ବ୍ୟୁରୋ: କଣ ରହିବ କୃଷକଙ୍କ ଆଗାମୀ ରଣନୀତି? ସେ ନେଇ ଉତରପ୍ରଦେଶ ମୁଜାଫରନଗରରେ ବସିଛି ଚାଷୀଙ୍କ ମହା ପଂଚାୟତ । ବିଶେଷ କରି ୨୬ ଜାନୁଆରୀରେ ଚାଷୀଙ୍କ ଟ୍ରାକ୍ଟର ରାଲି ପରେ ବ୍ୟାକଫୁଟରେ ଅଛନ୍ତି କୃଷକ ସଂଗଠନ । ତଥାପି କୃଷି ଆଇନ ପ୍ରତ୍ୟାହାର ଦାବିରେ ଜାରି ରଖିଛନ୍ତି ଆନ୍ଦୋଳନ । ପଶ୍ଚିମ ଉତ୍ତରପ୍ରଦେଶ ଏବେ ଚାଷୀ ଆନ୍ଦୋଳନ ନୂଆ ଠିକଣା ହେବାକୁ ଯାଉଛି । ବ୍ୟାପକ ପୁଲିସ ଛାଉଣୀ ଭିତରେ ମୁଜାଫରନଗରରେ ମହା ପଂଚାୟତରେ ପଡୋଶୀ ରାଜ୍ୟରୁ ହଜାର ହଜାର ଚାଷୀ ଏକତ୍ରିତ ହୋଇଛନ୍ତି । ଗାଜିପୁର ସୀମାରେ ଧାରଣା ଦେଇଥିବା ରାକେଶ ଟିକାୟତଙ୍କ ସମର୍ଥନରେ ମୁଜାଫରନଗରରେ ପ୍ରାୟ ଶହେରୁ ଅଧିକ ଚାଷୀ ନେତା ଏକତ୍ରିତ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗଣତନ୍ତ୍ର ଦିବସରେ ଦିଲ୍ଲୀର ଛାତିରେ ଘଟିଥିବା ଘଟଣା ପରେ ଏକପ୍ରକାର ବ୍ୟାକଫୁଟରେ ଥିବା ଚାଷୀ ଆନ୍ଦୋଳନ ପୁଣି ବଳ ଗୋଟାଇବାରେ ଲାଗିଛି । ଚାଷୀ ଆନ୍ଦୋଳନକୁ ସମର୍ଥନ ଜଣାଇଛନ୍ତି ଏକାଧିକ ବିରୋଧୀ ଦଳ ନେତା । କଂଗ୍ରେସ ନେତା ରାହୁଲ ଗାନ୍ଧୀ ପୁଣି ଥରେ ଚାଷୀ ଆନ୍ଦୋଳନକୁ ନେଇ ସରକାରଙ୍କୁ ଟାର୍ଗେଟ କରିଛନ୍ତି । ଚାଷୀଙ୍କ ଉପରେ ଆକ୍ରମଣ କରି ପ୍ରଧାନମନ୍ତ୍ରୀ ଦେଶକୁ ଦୁର୍ବଳ କରିପକାଉଥିବା ସେ ଅଭିଯୋଗ ଆଣିଛନ୍ତି । ସେହିପରି ସମାଜବାଦି ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ମଧ୍ୟ ବିଜେପିକୁ ଘେରିଛନ୍ତି ।
ଚାଷୀଙ୍କୁ ସମର୍ଥନ ଜଣାଇ ଗାଜିପୁର ସୀମାରେ ପହଚିଂଛନ୍ତି ନେତା । ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଓ ଆପ୍ ନେତା ରାଘବ ଚଢା ଚାଷୀ ନେତାଙ୍କୁ ଭେଟିଛନ୍ତି । ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ମଧ୍ୟ ଟ୍ୱିଟ କରି ଭାରତୀୟ କିଷାନ ୟୁନିୟନର ନେତା ରାକେଶ ଟିକାୟତକୁ ସମର୍ଥନ ଜଣାଇଛନ୍ତି । ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ମଧ୍ୟ ଫୋନ କରି ସମର୍ଥନ ଜଣାଇଛନ୍ତି । ଗଣତନ୍ତ୍ର ଦିବସ ପରେ ଝଟକା ଲାଗିଥିବା ଚାଷୀ ଆନ୍ଦୋଳନ ପୁଣି ଥରେ ବଳ ଗୋଟାଇବାରେ ଲାଗି ପଡିଛି ।