ପିଲାଙ୍କୁ ଟିକା ଓ ବୁଷ୍ଟର ଡୋଜ ଦେବାକୁ ପ୍ରସ୍ତୁତ ହେଉଛି ଓଡ଼ିଶା : କେତେ ପିଲା ନେବେ କରୋନା ଟିକା ?
ପ୍ରାୟ ୭ଲକ୍ଷ ସ୍ୱାସ୍ଥ୍ୟ କର୍ମୀ ଓ କୋଭିଡ ଯୋଦ୍ଧା ନେବେ ବୁଷ୍ଟର ଡୋଜ; ୬୦ ବର୍ଷରୁ ଅଧିକ ୫୨ଲକ୍ଷ ୩୭ହଜାର ଲୋକଙ୍କୁ ଭିତରୁ ଚିହ୍ନଟ ହେବେ ଏକାଧିକ ରୋଗ ଥିବା ବ୍ୟକ୍ତି
କନକ ବ୍ୟୁରୋ : ପିଲାଙ୍କୁ ଟିକା ଓ ବୁଷ୍ଟର ଡୋଜ ଦେବାକୁ ପ୍ରସ୍ତୁତ ହେଉଛି ଓଡ଼ିଶା । ଜାନୁୟାରୀ ୩ରୁ ୨୫ଲକ୍ଷ ୫୩ହଜାର ପିଲାଙ୍କୁ ଦିଆଯିବ କରୋନା ଟିକା । ପ୍ରାୟ ୭ଲକ୍ଷ ସ୍ୱାସ୍ଥ୍ୟ କର୍ମୀ ଓ କୋଭିଡ ଯୋଦ୍ଧା ନେବେ ବୁଷ୍ଟର ଡୋଜ । ୬୦ ବର୍ଷରୁ ଅଧିକ ୫୨ଲକ୍ଷ ୩୭ହଜାର ଲୋକଙ୍କ ଭିତରୁ ଏକାଧିକ ରୋଗ ଥିବା ବ୍ୟକ୍ତିଙ୍କୁ ଚିହ୍ନଟ କରାଯାଇ ଟିକା ଦିଆଯିବ । ସେହିପରି ତୃତୀୟ ଡୋଜରେ ସମାନ ଟିକା ଦିଆଯିବା ନେଇ ସୂଚନା ଦେଇଛନ୍ତି ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ ।
Kanak News is now on WhatsApp
Join and get latest news updates delivered to you via WhatsApp
ଜାନୁଆରୀ ୩ରୁ ୧୫ରୁ ୧୮ ବର୍ଷ ମଧ୍ୟରେ ଥିବା ପ୍ରାୟ ୨୫ଲକ୍ଷ ୫୩ହଜାର ପିଲାଙ୍କୁ ପ୍ରଥମ ଡୋଜ ଟିକାଦେବାର ଲକ୍ଷ୍ୟ ରହିଛି । କମ୍ ଦିନରେ ଯେପରି ଅଧିକ ଡୋଜ ଟିକା ଦିଆଯିବ ସେଥିପାଇଁ ବ୍ୟାପକ ପ୍ରସ୍ତୁତି ଚାଲିଛି ବୋଲି ସ୍ୱାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର କହିଛନ୍ତି । ଏହି ବର୍ଗର ପିଲା ଏବେ ସ୍କୁଲ ଯାଉଥିବା ବେଳେ ସେଠାର ଶିବିର ଆୟୋଜନ କରି ଟିକା ଦିଆଯିବ । ଏହା ସହ ବିଭିନ୍ନ ସ୍ୱାସ୍ଥ୍ୟ କେନ୍ଦ୍ରରେ ଟିକା ଦେବାର ବ୍ୟବସ୍ଥା ମଧ୍ୟ କରାଯିବ ।
ଏଥିପାଇଁ ସ୍ୱାସ୍ଥ୍ୟକର୍ମୀଙ୍କ ଟିମକୁ ପ୍ରସ୍ତୁତ କରାଯାଉଛି । ସେହିପରି ତୃତୀୟ ଡୋଜ ବା ବୁଷ୍ଟର ଡୋଜ ଦେବା ପାଇଁ ଏବେ ବ୍ଲୁ ପ୍ରିଂଟ ପ୍ରସ୍ତୁତ ହେଉଛି । ୭ଲକ୍ଷ ସ୍ୱାସ୍ଥ୍ୟ କର୍ମୀ ଓ କୋଭିଡ ଯୋଦ୍ଧାଙ୍କୁ ଦିଆଯିବ ବୁଷ୍ଟର ଡୋଜ । ଏବଂ ୬୦ ବର୍ଷରୁ ଅଧିକ ୫୨ଲକ୍ଷ ୩୭ହଜାର ଲୋକଙ୍କ ଭିତରୁ ଏକାଧିକ ରୋଗ ଥିବା ବ୍ୟକ୍ତିଙ୍କୁ ଚିହ୍ନଟ କରାଯାଇ ଟିକା ଦିଆଯିବ ।
ଜାନୁଆରୀ ୩ ତାରିଖରୁ ପିଲାଙ୍କ ଟିକାକରଣ ଆରମ୍ଭ ହେଉଥିବା ବେଳେ ୧୦ରୁ ଦିଆଯିବ ବୁଷ୍ଟର ଡୋଜ । ଦେଶରେ ପ୍ରାୟ ୩ କୋଟି ସ୍ୱାସ୍ଥ୍ୟ କର୍ମୀ, ପାଖାପାଖି ସମାନ ସଂଖ୍ୟକ ଆଗ ଧାଡ଼ିର କୋଭିଡ ଯୋଦ୍ଧାଙ୍କୁ ଦିଆଯିବ କରୋନା ଟିକାର ତୃତୀୟ ଡୋଜ । ସେହିପରି ୬୦ ବର୍ଷରୁ ଅଧିକ ଏବଂ ଏକାଧିକ ରୋଗ ଥିବା ପାଖାପାଖି ୩କୋଟି ଲୋକ ନେଇପାରିବେ ବୁଷ୍ଟର ଡୋଜ । ହେଲେ ବୁଷ୍ଟର ଡୋଜ ଆକାରରେ କେଉଁ ଟିକା ଦିଆଯିବ ତାକୁ ନେଇଥିବା ଦ୍ୱନ୍ଦ୍ୱ ଦୂର ହୋଇଛି ।
କୋଭାକ୍ସିନ ନେଇଥିଲେ ବୁଷ୍ଟରରେ ମିଳିବ କୋଭାକ୍ସିନ, କୋଭିସିଲ୍ଡର ୨ଟି ଡୋଜ୍ ନେଇଥିଲେ ତୃତୀୟ ଡୋଜରେ ବି ମିଳିବ କୋଭିସିଲ୍ଡ । ତେବେ ଟିକା ମିଶ୍ରଣ ନେଇ ଚାଲିଥିବା କ୍ଲିନିକାଲ ଟ୍ରାଏଲର ରିପୋର୍ଟକୁ ଅପେକ୍ଷା କରାଯାଇଛି । ଏହି ରିପୋର୍ଟ ଆସିବା ପରେ ତୃତୀୟ ବା ବୁଷ୍ଟର ଡୋଜ ଆକାରରେ ଯେକୌଣସି ଟିକା ଦିଆଯାଇପାରିବ ବୋଲି କୁହାଯାଇଛି ।