ଜନ୍ମ ହେଲା ଦିବ୍ୟାଙ୍ଗ ଶିଶୁ, ଡାକ୍ତର ଗଣିବେ ତଣ୍ଡ: ଭୁଲ ରିପୋର୍ଟ ପାଇଁ ଜରିମାନା କଲେ ଖାଉଟି ଅଦାଲତ
କନକ ବ୍ୟୁରୋ: ଭୁଲ ରିପୋର୍ଟ ଦେଇଥିବାରୁ ଡାକ୍ତର ଗଣିବେ ଜରିମାନା । ଭିନ୍ନକ୍ଷମ ଶିଶୁକୁ ଅଲଟ୍ରାସାଉଣ୍ଡ ସମୟରେ ସ୍ୱାଭାବିକ ଶିଶୁ ଦର୍ଶାଇ ରିପୋର୍ଟ ଦେଇଥିଲେ ଡାକ୍ତର । କିନ୍ତୁ ଦିବ୍ୟାଙ୍ଗ ଶିଶୁ ଜନ୍ମ ହେବାରୁ ଏଥିପାଇଁ ଡାକ୍ତରଙ୍କୁ ଦାୟୀ କରି ଜଗତସିଂହପୁର ଖାଉଟି ଅଦାଲତଙ୍କ ଦ୍ୱାରସ୍ଥ ହୋଇଥିଲେ ପିଲାଟିର ବାପାମା । କୋର୍ଟ ମାମଲାର ଶୁଣାଣି କରି ଡାକ୍ତରଙ୍କୁ ୧୦ଲକ୍ଷ ୫୪ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି । ଯାହା ଏବେ ଚର୍ଚ୍ଚାର ବିଷୟ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଭୁଲ ରିପୋର୍ଟ ପାଇଁ ରୋଗୀର ମୃତ୍ୟୁ ହେବା କିମ୍ବା ଗୁରୁତ୍ୱର ହୋଇପଡିବା ନେଇ ଡାକ୍ତରଙ୍କ ବିରୋଧରେ ଅଭିଯୋଗ ଆସିଥିବା ଆପଣମାନେ ଶୁଣିଥିବେ । ହେଲେ ଭୁଲ ରିପୋର୍ଟ ଯୋଗୁଁ ମାଆ ପେଟରେ ଥିବା ପିଲାଟି ଦିବ୍ୟାଙ୍ଗ ହୋଇ ଜନ୍ମ ନେବା ଓ ଏଥିପାଇଁ ଡାକ୍ତରଙ୍କୁ ଦାୟୀ କରାଯିବା ଆପଣମାନେ ବୋଧହୁଏ ଶୁଣିନଥିବେ । କିନ୍ତୁ ଜଗତସିଂହପୁର ଜିଲ୍ଲା ତିର୍ତୋଲ ଥାନା ଅନ୍ତର୍ଗତ ଜଇପୁରରୁ ଆସିଛି ଏମିତି ଏକ ଖବର । ଶିଶୁର ବାପା ମା ବାପାଙ୍କ ଅଭିଯୋଗ ଅନୁସାରେ ପିଲାଟି ଗର୍ଭରେ ରହିିବା ଦିନରୁ ପର୍ଯ୍ୟାୟକ୍ରମେ ତିନିଥର ଅଲଟ୍ରାସାଉଣ୍ଡ କରିଥିଲେ ଡାକ୍ତର ପ୍ରତାପ କେଶରୀ ଦାସ । ଆଉ ସବୁଥର ପିଲାଟି ସ୍ୱାଭାବିକ ଥିବା ରିପୋର୍ଟ ଦେଇଥିଲେ ଡାକ୍ତର । କିନ୍ତୁ ଜନ୍ମ ହୋଇଥିଲା ଦିବ୍ୟାଙ୍ଗ ଶିଶୁ । ପିଲାଟି ଜନ୍ମ ହେବା ପରେ ଗୋଟିଏ ଗୋଡ ଓ ଗୋଟିଏ ହାତ ନଥିବା ଦେଖି ଚମକି ପଡିଥିଲେ ପୂରା ପରିବାର ।
ଦିବ୍ୟାଙ୍ଗ ପିଲା ଜନ୍ମ ହେବା ପରେ ମାନସିକ ଦୁଶ୍ଚିନ୍ତାରେ ଥିବା ବାପାମା ଏନେଇ ଖାଉଟି ଅଦାଲତଙ୍କ ଦ୍ୱାରସ୍ଥ ହୋଇଥିଲେ । ଡାକ୍ତରଙ୍କ ଭୁଲ ରିପୋର୍ଟ ଯୋଗୁଁ କେମିତି ଦିବ୍ୟାଙ୍ଗ ଶିଶୁ ଜନ୍ମ ହେଲା ସେନେଇ ଅଭିଯୋଗ କରିଥିଲେ । ଅଭିଯୋଗର ଶୁଣାଣି କରି ଖାଉଟି ଅଦାଲତ ଡାକ୍ତରଙ୍କୁ ପିଲାର ଚିକିତ୍ସା ପାଇଁ ୧୦ଲକ୍ଷ ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି ।
ନିୟମ ଅନୁସାରେ ମା ପେଟରେ ଥିବା ପିଲାଟି ଭିନ୍ନକ୍ଷମ ହୋଇଥିଲେ ଗର୍ଭପାତ କରାଯାଇପାରେ । ଅର୍ଥାତ ଡାକ୍ତର ଯଦି ଠିକ୍ ରିପୋର୍ଟ ଦେଇଥାନ୍ତେ ହୁଏତ ଏଭଳି ସ୍ଥିତି ଉପୁଜିନଥାନ୍ତା । ପିଲାଟିର ବାପାମା ପୂର୍ବରୁ ଠିକ୍ ନିଷ୍ପତି ନେଇପାରିଥାନ୍ତେ । ତେବେ ଆଗକୁ ଡାକ୍ତର ଜରିମାନା ଦେଉଛନ୍ତି କି ନାହିଁ ତା ଉପରେ ରହିଛି ସମସ୍ତଙ୍କ ନଜର ।