କଟକରୁ କିଏ ହେବେ ବିଜେପି ଲୋକସଭା ପ୍ରାର୍ଥୀ, ଜାରି ରହିଛି ଦ୍ୱନ୍ଦ । ଚର୍ଚ୍ଚାରେ ଭର୍ତ୍ତୃହରି ମହତାବ ଓ ଅନୁଭବ ମହାନ୍ତିଙ୍କ ଭେଟଘାଟ
କନକ ବ୍ୟୁରୋ : କଟକ ସାଂସଦ ଭର୍ତୃହରି ମହତାବ । କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି । ସମାନ ଦଳରୁ ସଂସଦକୁ ନିର୍ବାଚିତ ହୋଇଥିବାରୁ ଦୁହିଁଙ୍କୁ ଅନେକ ସମୟରେ ଏକାଠି ଦେଖିବାକୁ ମିଳିଛି । ପାର୍ଲାମେଂଟରୁ ଆରମ୍ଭ କରି ଦଳୀୟ କାର୍ଯ୍ୟାଳୟ ଯାଏଁ ଦୁହିଁଙ୍କ ଭିତରେ ବାରମ୍ବାର ଭେଟଘାଟ ହୋଇଥିବ । କିନ୍ତୁ ଏବେ ଯେତେବେଳେ ଭର୍ତୃହରି ବିଜେଡିରୁ ଇସ୍ତଫା ଦେଇଛନ୍ତି ଏବଂ ଅନୁଭବ ବିଜେଡିରେ ଏକପ୍ରକାର ଅଲୋଡା ହୋଇପଡିଛନ୍ତି, ଦୁହିଁଙ୍କ ଭେଟଘାଟକୁ ନେଇ ଚର୍ଚ୍ଚା ଜୋର ଧରିଛି । ଦୋଳପୂର୍ଣ୍ଣିମା ଅବସରରେ ହୋଲିର ଶୁଭେଚ୍ଛା ଜଣାଇ ଭର୍ତୃହରିଙ୍କ ଆଶୀର୍ବାଦ ନେଇଛନ୍ତି ଅନୁଭବ ।
Kanak News is now on WhatsApp
Join and get latest news updates delivered to you via WhatsApp
ବିଜେଡି ଛାଡିବା ପରେ ଭର୍ତୃହରି କେଉଁ ରାଜନୈତିକ ଦଳକୁ ନିଜର ରାଜନୈତିକ ଭବିଷ୍ୟତ ଭାବେ ବାଛିବେ ତାର ଇସାରା ଦେଇସାରିଛନ୍ତି । ହୋଲି ଅବସରରେ ଗେରୁଆକୁ ଦେଶର ଏକ ମହତ୍ୱପୂର୍ଣ୍ଣ ରଙ୍ଗ ବୋଲି କହିବା ସହ ତା ପ୍ରତି ଶ୍ରଦ୍ଧା ରହିଲେ ଅଧିକ ଉନ୍ନତି ହେବ ବୋଲି କହିଛନ୍ତି ଭର୍ତୃହରି । ଭର୍ତୃହରି ବିଜେପିକୁ ଯାଇପାରନ୍ତି ବୋଲି ଚର୍ଚ୍ଚା ହେଉଥିଲା । ତାଙ୍କର ଗେରୁଆ ବ୍ୟାଖ୍ୟାନ ପରେ ଏହି ସନ୍ଦେହ ଆହୁରି ଦୃଢୀଭୂତ ହୋଇଛି ।
ନବୀନ ନିବାସରେ କେନ୍ଦ୍ରାପଡା ସଂସଦୀୟ କ୍ଷେତ୍ରକୁ ନେଇ ସମୀକ୍ଷା ବେଳେ ଅନୁପସ୍ଥିତ ଥିଲେ ଅନୁଭବ ମହାନ୍ତି । ପାରିବାରିକ ବିବାଦ ପରେ କେନ୍ଦ୍ରାପଡା ସାଂସଦ ବିଜେଡିରେ କୋଣଠେସା ହୋଇପଡିଥିବା ଚର୍ଚ୍ଚା ହେଉଛି । ବିଜେଡି ଓ ଅନୁଭବଙ୍କ ଦୂରତା ୨୦୨୪ରେ ତାଙ୍କ ଟିକେଟ କଟିବା ନେଇ ସଂକେତ ଦେଉଛି । ଆଉ ଏତିକିବେଳେ ସୋସିଆଲ ମିଡିଆ ଏକ୍ସରେ ‘ଜୟ ଶ୍ରୀରାମ’ ଲେଖିବା ଓ ଭର୍ତୃହରିଙ୍କୁ ଭୋଟି ଆଶୀର୍ବାଦ ନେବାକୁ ଭିନ୍ନ ଦୃଷ୍ଟିରେ ଦେଖାଯାଉଛି ।
ଆଗାମୀ ନିର୍ବାଚନ ପାଇଁ ବିଜେପି ତାର ସାଂସଦ ପ୍ରାର୍ଥୀ ଘୋଷଣା କଲାବେଳେ କନ୍ଧମାଳ ଓ ଯାଜପୁର ସହ କଟକକୁ ବାଦ୍ ଦେଇଛି । ଆଶଙ୍କା କରାଯାଉଛି, କଟକ ଭଳି ହାଇପ୍ରୋଫାଇଲ ଆସନରୁ ଏକାଧିକ ଚେହେରାଙ୍କୁ ନେଇ ଦ୍ୱନ୍ଦ୍ୱରେ ଥାଇପାରେ ବିଜେପି । କିଛିଦିନ ପୂର୍ବରୁ ବିଜେପିରେ ଯୋଗ ଦେଇଥିଲେ ଅରିନ୍ଦମ ରାୟ । ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ର ବିଜେପିରେ ଯୋଗଦେବା ପରେ ତାଙ୍କୁ ବିଜେପିର କଟକ ଚେହେରା ବୋଲି ବିବେଚନା କରାଯାଉଥିଲା । ଏତିକିବେଳେ ଭର୍ତୃହରି ଓ ଅନୁଭବଙ୍କ ଭଳି ନେତାଙ୍କ ନାଁ ଯୋଡିହେବା ବିଜେପିକୁ ଅଧିକ ଦ୍ୱନ୍ଦ୍ୱରେ ପକାଇଥାଇପାରେ ।