ସମ୍ରାଟ ବନିଲେ ଅଶୋକ, ସେନାପତି ସାଜିଲେ ସଚିନ୍ । ରାହୁଲଙ୍କ ରାଜସ୍ଥାନ ଫର୍ମୁଲା ,ସମସ୍ତଙ୍କ ଖୁସିରେ ଦିଲ୍ଲୀ ଖୁସି ।
ବରିଷ୍ଠ ବନାମ କନିଷ୍ଠ ଲଢ଼େଇରେ ଅଶୋକଙ୍କ ଉପରେ ଆସ୍ଥା ପ୍ରକଟ କଲେ ରାହୁଲ । ଗେହଲଟ ବନିବେ ମୁଖ୍ୟମନ୍ତ୍ରୀ ସହଯୋଗ କରିବେ ସଚିନ ।
କନକ ବ୍ୟୁରୋ: ରାଜସ୍ଥାନ କଂଗ୍ରେସରେ ବିଜୟ ହାସଲପରେ ମୁଖ୍ୟମନ୍ତ୍ରୀ ପ୍ରାର୍ଥୀ କିଏ ହେବ ସେଥିରେ ପଡ଼ିଛି ପୂର୍ଣ୍ଣଛେଦ । ବହୁ ଅଙ୍କକଷା ପରେ ଅଶୋକ ଗେହଲଟ ହେଲେ ରାଜସ୍ଥାନର ମୁଖ୍ୟମନ୍ତ୍ରୀ । ଏନେଇ ଦିଲ୍ଲୀରେ ବସିଥିବା ସାମ୍ବାଦିକ ସମ୍ମିଳନୀରେ ଘୋଷଣା କରାଯାଇଛି । ମୁଖ୍ୟମନ୍ତ୍ରୀ ପ୍ରାର୍ଥୀ ପାଇଁ କଂଗ୍ରେସ ଯୁବ ନେତା ସଚିନ ପାଇଲଟଙ୍କ ନାଁ ମଧ୍ୟ ଚର୍ଚ୍ଚାରେଥିଲା । ତେଣୁ ସଚିନ ପାଇଲଟ ରାଜସ୍ଥାନର ଉପ-ମୁଖ୍ୟମନ୍ତ୍ରୀ ଦାୟିତ୍ୱ ଭାର ତୁଲାଇବେ । ବରିଷ୍ଠ ଏବଂ କନିଷ୍ଠ ଲଢ଼େଇରେ ରାଜସ୍ଥାନର ଡ଼ୋରୀ କଂଗ୍ରେସର ଅଭିଜ୍ଞ ନେତା ଅଶୋକ ଗେହଲଟଙ୍କ ହାତକୁ ଦେଇଛନ୍ତି ରାହୁଲ ଗାନ୍ଧି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି କଂଗ୍ରେସ ହାଇକମାଣ୍ଡ ରାହୁଲ ଗାନ୍ଧିଙ୍କ ବାସଭବନରେ ଅଶୋକ ଗେହଲଟଙ୍କ ସହ ରୁଦ୍ଧଦ୍ୱାର ଆଲୋଚନା କରିଥିଲେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି । ତେବେ ଅଶୋକ ଗେହଲଟଙ୍କୁ ରାଜସ୍ଥାନର ମୁଖ୍ୟମନ୍ତ୍ରୀ କରିବା ପାଇଁ ଅନେକ ମହଲରୁ ଦାବି ଉଠିଥିଲା । ଗେହଲଟଙ୍କ ସମର୍ଥନରେ ରାଜସ୍ଥାନର କିଛି ସ୍ୱାଧୀନ ବିଧାୟକ ମଧ୍ୟ ସ୍ୱର ଶାଣିତ କରିଥିଲେ ।
ତେବେ ଅଶୋକ ଗେହଲଟ ୧୯୯୮-୨୦୦୩ ଓ ୨୦୦୮-୨୦୧୩ ପର୍ଯ୍ୟନ୍ତ ରାଜସ୍ଥାନର ଦୁଇ ଦୁଇ ଥର ମୁଖ୍ୟମନ୍ତ୍ରୀ ପଦରେ ବସିଥିଲେ । ଏହାପରେ ୨୦୧୭ରୁ ଗେହଲଟ ଜାତୀୟ କଂଗ୍ରେସର ସାଧାରଣ ସମ୍ପାଦକ ଭାବେ କାର୍ଯ୍ୟଭାର ତୁଲାଇଆସିଛନ୍ତି । ସେହିଭଳି ୧୯୮୨-୧୯୯୩ ଭିତରେ ଏକାଧିକ ବାର କେନ୍ଦ୍ରରେ ମନ୍ତ୍ରୀ ଓ ଉପମନ୍ତ୍ରୀ ଏବଂ ଚାରିଥର ରାଜସ୍ଥାନ କଂଗ୍ରେସର ପରିଚାଳନା ଭାର ତୁଲାଇଥିବା ଭଳି ଦକ୍ଷତା ରାଜ୍ୟ ନେତୃବୃନ୍ଦଙ୍କୁ ପସନ୍ଦ ଆସିଥିଲା । ଚଳିତ ବିଧାନସଭା ନିର୍ବାଚନରେ କଂଗ୍ରେସ ବିଜୟରେ ପ୍ରମୂଖ ଭୂମିକା ଗ୍ରହଣ କରିଥିବା ଦେଖିବାକୁ ମିଳିଥିଲା । ବିଭିନ୍ନ ସମୁଦାୟର ଭୋଟ ହାତେଇବା ଓ ଟିକେଟ ବଂଟନ ଭଳି ଗୁରୁ ଦାୟିତ୍ୱ ତୁଲାଇ ରାଜସ୍ଥାନରେ କଂଗ୍ରେସର ବିଜୟ ହାସଲ କରିବାରେ ସହାୟକ ହୋଇଥିବାରୁ ଏବେ ତାଙ୍କୁ ମୁଖ୍ୟମନ୍ତ୍ରୀ ଦାୟିତ୍ୱ ମିଳିଛି ।