ଅମିତ୍ ଶାହାଙ୍କ ଗସ୍ତ ପରେ ସୁନୀଲ ବଂଶଲଙ୍କୁ ଦାୟିତ୍ୱ: ବିରୋଧୀ ଦଳ ନେତା କହିଲେ, ପାଇଛନ୍ତି ଭଲ କୋଚ୍, ଏବେ ଗୋଲ୍ କରିବାର ବେଳ
କନକ ବ୍ୟୁରୋ: ହଟିଲେ ପୁରନ୍ଦେଶ୍ୱରୀ , ଆସିଲେ ବଂଶଲ । ସୋମବାରଦିନ ଓଡିଶା ଗସ୍ତରେ ଥିବାବେଳେ ଅମିତ ଶାହା ରାଜ୍ୟରେ ଦଳର ସାଙ୍ଗଠନିକ ସ୍ଥିତି ନେଇ ଅସନ୍ତୋଷ ପ୍ରକାଶ କରି ଦଳୀୟ ନେତାଙ୍କୁ ତାଗିଦ କରିଥିଲେ । ଠିକ ଏହାର ଗୋଟିଏ ଦିନ ପରେ ବିଜେପିର ଓଡିଶା ପ୍ରଭାରୀ ବଦଳିବାକୁ ରାଜନୈତିକ ଦୃଷ୍ଟିକୋଣରୁ ବେଶ ଗୁରୁତ୍ୱପୂର୍ଣ୍ଣ ମନେକରାଯାଉଛି । ୨୦୨୨ ୟୁପି ବିଧାନସଭା ନିର୍ବାଚନରେ ବିଜେପି ବିଜୟ ପଛର ଅନତ୍ୟମ ନାୟକ ଥିଲେ ସୁନୀଲ ବଂଶଲ । ତାଙ୍କୁ ବିଜେପିରେ ଟାସ୍କ ମାଷ୍ଟର ବି କୁହାଯାଏ । ତେଣୁ ଅମିତ ଶାହାଙ୍କ ବିଶ୍ୱାସଯୋଗ୍ୟ ନେତାଙ୍କୁ ପ୍ରଭାରୀ କରିବା ଏକ ନୂଆ ରଣନୀତି ଆଡକୁ ଅଙ୍ଗୁଳି ନିର୍ଦ୍ଦେଶ କରୁଛି । ବିରୋଧୀ ଦଳ ନେତା ଜୟନାରାୟଣ ମିଶ୍ର କହିଛନ୍ତି, ଗୋଲ ମାରିବାର ସୁଯୋଗ ଆସିଛି ନିଶ୍ଚିୟ ଗୋଲ କରିବୁ । ବିଜେଡି କହିଛି, ଦଳ ଏଥିରେ ବିଚଳିତ ନୁହେଁ ।
Kanak News is now on WhatsApp
Join and get latest news updates delivered to you via WhatsApp
କେବଳ ଓଡିଶା ନୁହେଁ , ବିଜେପି ଫୋକସରେ ଥିବା ପଶ୍ଚିମବଙ୍ଗ ଓ ତେଲେଙ୍ଗାନା ସମ୍ଭାଳିବେ ସୁନୀଲ ବଂଶଲ । କୁହାଯାଉଛି, ନୂଆ ଟାର୍ଗେଟ ସହ ଓଡିଶା ଆସୁଛନ୍ତି ନୂଆ ପ୍ରଭାରୀ । ବିଜେଡି ବିରୋଧୀ ମୋର୍ଚ୍ଚାକୁ ଶକ୍ତିଶାଳୀ କରିବାକୁ ତାଙ୍କୁ ନିଯୁକ୍ତି ଦିଆଯାଇଛି ।
ବିହାରରେ ଏନଡିଏରୁ ଜେଡିୟୁ ଓହରିଯାଇଛି । ତେଣୁ କୁହାଯାଉଛି, ଏହା ବିଜେଡିକୁ ଅଧିକ ସୁହାଇବ । ପୂର୍ବରୁ ମଧ୍ୟ ବିେଜେଡି ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ କେନ୍ଦ୍ରକୁ ସମର୍ଥନ ଦେଇଆସିଛି । ବିହାର ଝଟକା ପରେ ସଂସଦରେ ବିଜେଡି ଭଳି ଦଳ ଉପରେ ଅଧିକ ଭରସା କରିବ ବିଜେପି । ତେଣୁ ବିଜେଡି ଉପରେ ବିଜେପି ଜୋରଦାର ଆକ୍ରମଣ କରିନପାରେ ବୋଲି ଚର୍ଚ୍ଚା ହେଉଛି ।
ବିହାର ପରିସ୍ଥିତି ପରେ ଅଘୋଷିତ ସହଯୋଗୀ ଦଳକୁ କୌଣସି ପରିସ୍ଥିତିରେ ଅସନ୍ତୁଷ୍ଟ କରିବାକୁ ଚାହିଁବେ ନାହିଁ କେନ୍ଦ୍ର ବିଜେପି ନେତୃତ୍ୱ । ଏଭଳି ସ୍ଥିତିରେ ସୁନୀଲ ବଂଶଲଙ୍କ ରଣନୀତି ଉପରେ ସମସ୍ତଙ୍କ ନଜର ରହିଛି ।