କନକ ବ୍ୟୁରୋ: ରବି ଫସଲରେ ରୋଗ ପୋକ ଆତଙ୍କ । କାମ କରୁନି କୀଟନାଶକ । କାଳ ସାଜିଛି ଚାଉଳିଆ ପୋକ । ପୁରୀ ଜିଲ୍ଲା ସତ୍ୟବାଦୀ ବ୍ଳକର ଅନେକ ଗାଁ ଗୁଡିକରେ ଚିନ୍ତାରେ ପଡିଛନ୍ତି ଚାଷୀ ମାନେ । ବାଗଲପୁରରୁ ନେଇ, ମହୁରା, ବୁଡାକେରା ଓ ପଦ୍ମପୁର ଆଦି ଅଞ୍ଚଳରେ ଚାଷରେ କ୍ଷତି । ଏବେ କାଳ ସାଜିଛି ଚାଉଳିଆ ପୋକ । ଏକର ଏକର ଚାଷ ଜମିରେ ଚାଉଳିଆ ପୋକ ଲାଗି ନଷ୍ଟ ହେବାକୁ ବସିଲାଣି ଫସଲ ସବୁ । ଫଳ ଧରିବା ସମୟରେ ଡେମ୍ଫିରେ ରୋଗପୋକ ଲାଗି ନଷ୍ଟ ହୋଇଗଲାଣି । ପତ୍ର ହଳଦିଆ ପଡିବା ସହ ଗଛ ସବୁ ସମ୍ପୁର୍ଣ୍ଣ ନଷ୍ଟ ହେବାରେ ଲାଗିଛି । ବାରମ୍ବାର କୀଟନାଶକ ପ୍ରୟୋଗ କରାଯାଉଥିଲେ ବି କୌଣସି କାମ ଦେଉନି । ବିଭିନ୍ନ ସ୍ଥାନରୁ ଧାର କରଜ କରି ଚାଷ କରିଥିବା ଚାଷୀ ମାନେ କିଭଳି ଋଣ ସୁଝିବେ ସେ ନେଇ ପଡିଛନ୍ତି ଚିନ୍ତାରେ ।
Kanak News is now on WhatsApp
Join and get latest news updates delivered to you via WhatsApp
ରୋଗ ପୋକ ଲାଗି ବର୍ଷକ ଆହାର ଉଜୁଡିବାକୁ ବସିଥିବା ବେଳେ ପରିବାର କିଭଳି ଚଳିବ ସେ ନେଇ ବଢୁଛି ଚିନ୍ତା । ସେପଟେ ବାରମ୍ବାର ଅଭିଯୋଗ କରିବା ପରେ ବି ଶୁଣିବାକୁ ଯେମିତି କେହି ନାହିଁ । ତେବେ ସଠିକ୍ ଭାବେ କୃଷି ମିତ୍ରଙ୍କ ସହ ଯୋଗାଯୋଗ କରାଯାଇ ମତାମତ ନିଆଯାଇ ପାରିଲେ କିଛି ସମସ୍ୟାର ସମାଧାନ ହୋଇପାରିବ ବୋଲି କୃଷି ବିଭାଗ ପକ୍ଷରୁ କୁହାଯାଇଛି । ହେଲେ କେବେ ଚାଷୀଙ୍କ ଦୁଃଖ କିଏ ଶୁଣିବ ତା ଅପେକ୍ଷାରେ ବସିଛନ୍ତି ନିରାଶ ଚାଷୀ । ବିଭିନ୍ନ ସ୍ଥାନରୁ ଧାର କରଜ କରି ଚାଷ କରିଥିବା ଚାଷୀଙ୍କ ଦୁଃଖ ବୁଝି ରୋଗ ପୋକ ନିୟନ୍ତ୍ରଣ ପାଇଁ ସମସ୍ତ ବ୍ୟବସ୍ଥା କରାଯାଇପାରିଲେ ଚାଷୀ ମାନେ ଉପକୃତ ହୋଇପାରିବେ ।