ଧାରା ୩୭୦ ଉଚ୍ଛେଦ ପରେ ଜମ୍ମୁ-କାଶ୍ମୀରରେ ବଡ ଆତଙ୍କୀ ହମଲା । ପେଟପାଟଣା ପାଇଁ କାଶ୍ମୀରରେ କାମ କରୁଥିବା ଶ୍ରମିକଙ୍କ ଉପରେ ଆତଙ୍କବାଦୀଙ୍କ ଆକ୍ରମଣ, ୫ ମୃତ, ଜଣେ ଗୁରୁତର ।
ଜମ୍ମୁ-କାଶ୍ମୀରରେ ପୁଣି ଆତଙ୍କବାଦୀ ଆକ୍ରମଣ । ଧାରା ୩୭୦ ଉଚ୍ଛେଦ ପରେ ଜମ୍ମୁ-କାଶ୍ମୀରରେ ବଡ ଧରଣର ଆକ୍ରମଣ କରିଛନ୍ତି ଆତଙ୍କବାଦୀ । ଆଉ ଆତଙ୍କବାଦୀଙ୍କ ଆକ୍ରମଣର ଶିକାର ହୋଇଛନ୍ତି ନିରୀହ ଶ୍ରମିକ । ଆତଙ୍କବାଦୀଙ୍କ ଆକ୍ରମଣରେ ୫ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ଗୁରୁତରଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ରୋଜଗାର ଅନ୍ୱେଷଣରେ ବାହାର ରାଜ୍ୟରୁ କାଶ୍ମୀରକୁ ଆସିଥିବା ଶ୍ରମିକଙ୍କୁ ଟାର୍ଗେଟ କରିଛନ୍ତି ଆତଙ୍କବାଦୀ ।
Kanak News is now on WhatsApp
Join and get latest news updates delivered to you via WhatsApp
ଏଭଳି ଆକ୍ରମଣ ସେତେବେଳେ ହୋଇଛି ଯେତେବେଳେ କାଶ୍ମୀରର ସ୍ଥିତି ଦେଖିବା ପାଇଁ ୟୁରୋପୀୟ ୟୁନିୟନରୁ ୨୮ ଜଣ ସାଂସଦ ଜମ୍ମୁ-କାଶ୍ମୀର ଆସିଛନ୍ତି । ସାଂସଦଙ୍କ ଗସ୍ତ କାରଣରୁ ଘାଟିରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଥିବା ବେଳେ ଆତଙ୍କବାଦୀ ମାନେ ନିରୀହ ଲୋକଙ୍କୁ ଟାର୍ଗେଟ କରିବାକୁ ପଛାଇ ନାହାନ୍ତି ।
ଏହାପୂର୍ବରୁ ଏହି ଅଞ୍ଚଳରେ ସୁରକ୍ଷା ଏଜେନ୍ସି ପକ୍ଷରୁ ୪୮ ଘଣ୍ଟିଆ ଆଲର୍ଟ ମଧ୍ୟ ଜାରି କରାଯାଇଥିଲା । ଏପରିକି ଜମ୍ମୁ-କାଶ୍ମୀର ଓ ଦିଲ୍ଲୀରେ ବଡ ଧରଣର ଆତଙ୍କବାଦୀ ଆକ୍ରମଣ ହୋଇପାରେ ବୋଲି ସୁରକ୍ଷା ଏଜେନ୍ସି ସତର୍କ କରାଇଥିଲେ । ଏପରିକି ମର ନହେଲେ ମାର ପଣ ନେଇ କାଶ୍ମୀରକୁ କିଛି ଆତଙ୍କବାଦୀ ପଶିଥିବା ସୂଚନା ମିଳିଛି । ୩୧ ଅକ୍ଟୋବରରେ ଜମ୍ମୁ-କାଶ୍ମୀରକୁ କେନ୍ଦ୍ର ଶାସିତ ଅଞ୍ଚଳ ଘୋଷଣା କରିବା ପୂର୍ବରୁ ବଡ ଧରଣର ଆକ୍ରମଣ କରିବାକୁ ଆତଙ୍କବାଦୀ ମାନେ ବ୍ଲୁ-ପ୍ରିଣ୍ଟ ପ୍ରସ୍ତୁତ କରିଥିବା ଗୁଇନ୍ଦା ସୂଚନା ମିଳିଛି । ଆଉ ଏହି ଗୁଇନ୍ଦା ସୂଚନାକୁ ଆଧାର କରି ଜମ୍ମୁ-କାଶ୍ମୀରର କିଛି ଅଞ୍ଚଳରେ ହାଇଆଲର୍ଟ ଜାରି କରାଯାଇଛି ।