ଲ୍ୟାଣ୍ଡର ବିକ୍ରମକୁ ନେଇ ଆଜି ଆସିପାରେ ବଡ ଖବର । ବିକ୍ରମ ଉପରେ ଦେଇ ଉଡିବ ନାସାର ଲୁନାର ଅର୍ବିଟର, ଫଟୋ ସହ ଗୁରୁତ୍ୱପୂର୍ଣ୍ଣ ତଥ୍ୟ ମିଳିବା ସମ୍ଭାବନା
କନକ ବ୍ୟୁରୋ : ଆଜି ବିକ୍ରମ ଲ୍ୟାଣ୍ଡର ଉପର ଦେଇ ଉଡିବ ନାସାର ଲୁନାର ଅର୍ବିଟର । ତେଣୁ ଚନ୍ଦ୍ର ପୃଷ୍ଠରୁ ବିକ୍ରମକୁ ନେଇ ଅଧିକ ତଥ୍ୟ ଆଜି ମିଳିବା ସମ୍ଭାବନା ରହିଛି । ବିଶେଷ କରି ନାସାର ଲୁନାର ଅର୍ବିଟର ଜରିଆରେ ବିକ୍ରମର ଫଟୋ ମିଳିବା ଆଶା କରାଯାଉଛି । ଚନ୍ଦ୍ରର ଚାରିପଟେ ଘୁରୁଥିବା ଆମେରିକାର ଏହି ଅର୍ବିଟର, ଚନ୍ଦ୍ରପୃଷ୍ଠରେ ଅବତରଣ କରିଥିବା ବିକ୍ରମ ଲାଣ୍ଡରକୁ ଚିହ୍ନଟ କରିବା ଆଶା କରାଯାଉଛି । ଗତ ୭ ତାରିଖରେ ହାର୍ଡ ଲାଣ୍ଡିଂ ଯୋଗୁଁ ଏବେ ବିକ୍ରମର ସ୍ଥିତି କିପରି ଅଛି ସେନେଇ ନାସାର ଲୁନାର ଅର୍ବିଟର ବା ଏଲଆରଓ ସବିଶେଷ ତଥ୍ୟ ସଂଗ୍ରହ କରିବା ସହ ଫଟୋ ଉଠାଇବ । ତେଣୁ ବିକ୍ରମ ସଂପର୍କରେ ଗୁରୁତ୍ୱପୂର୍ଣ୍ଣ ତଥ୍ୟ ସାମନାକୁ ଆସିବ ବୋଲି ଭାରତ ସମେତ ବିଶ୍ୱର ମହାକାଶ ବିଜ୍ଞାନୀମାନେ ଆଶା ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଉ ଯଦି ଭାଗ୍ୟ ସାଥ୍ ଦିଏ ତେବେ ଅଚଳ ହୋଇପଡିଥିବା ଲ୍ୟାଣ୍ଡର ବିକ୍ରମ ସମେତ ରୋଭର ପ୍ରଜ୍ଞାକୁ ମଧ୍ୟ କାର୍ଯ୍ୟକ୍ଷମ କରିପାରେ ଇସ୍ରୋ । ୨୦୦୯ରୁ ଚନ୍ଦ୍ରକୁ ପ୍ରଦକ୍ଷଣ କରୁଥିବା ନାସାର ଏହି ଅର୍ବିଟର, ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପଠାଇବା ସହ ଚନ୍ଦ୍ରପୃଷ୍ଠର ଅନେକ ରହସ୍ୟ ଖୋଲିଛି । ଏଥିରେ ଶକ୍ତିଶାଳୀ କ୍ୟାମେରା ରହିଛି । ଯେଉଁ କ୍ୟାମେରା ଜରିଆରେ ୧୯୬୯ ମସିହାରେ ଯାଇଥିବା ଆପୋଲୋ ମହାକାଶ ଯାନର ଅବତରଣ ସ୍ଥାନ ଓ ମହାକାଶଚାରୀଙ୍କ ପାଦ ଚିହ୍ନର ଫଟୋ ଉଠାଇ ପଠାଇଥିଲା ନାସାର ଅର୍ବିଟର ।
ସେହି କ୍ୟାମେରାରେ ଲାଣ୍ଡର ବିକ୍ରମର ଫଟୋ ଉଠାଇବା ସହ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ତଥ୍ୟ ପଠାଇବା ଆଶା କରାଯାଉଛି । ଏହିସବୁ ତଥ୍ୟ ମିଳିବା ପରେ କାହିଁକି ବିକ୍ରମ ଲାଣ୍ଡର ସହ ସଂଯୋଗ ଶେଷ ମୁହୂର୍ତରେ କଟିଗଲା, ତା’ର ରହସ୍ୟ ଖୋଲିବା ସମ୍ଭାବନା ରହିଛି । ସେପଟେ ରାଉରକେଲାରେ ବୈଜ୍ଞାନିକ ବିକ୍ରମ ସରାଭାଇଙ୍କ ଶତବାର୍ଷିକୀ ପାଳନ ଅବସରରେ ସତୀଶ ଧବନ ମହାକାଶ କେନ୍ଦ୍ରର ନିର୍ଦ୍ଦେଶକ ଡକ୍ଟର ଏ ରାଜା ରାଜନ କହିଛନ୍ତି ଶେଷ ମୁହୂର୍ତରେ ଉପୁଜିଥିବା ସମସ୍ୟା ଉପରେ ତର୍ଜମା କରାଯାଉଛି ।