ସୁପର ସଣ୍ଡେର ସୁପର ମୁକାବିଲା ! ଏସିଆ କପରେ ଆଜି ସଂଧ୍ୟାରେ ହେବ ହାଇ ଭୋଲଟେଜ୍ ମ୍ୟାଚ୍ । ପୁଣି ଥରେ ରୋହିତ ଟିମ ଦେଇପାରିବେ କି ପାକିସ୍ତାନକୁ ମାତ?

3

କନକ ବ୍ୟୁରୋ: ପୁଣି ମୁହାଁମୁହିଁ ହେବେ ଭାରତ-ପାକିସ୍ତାନ । ଆଜି ଏସିଆ କପ୍ ସୁପର-୪ ମୁକାବିଲାରେ ପୁଣି ଥରେ ଭାରତ ଓ ପାକିସ୍ତାନ ମଧ୍ୟରେ ହେବ ଟକ୍କର । ୪ ଦିନ ମଧ୍ୟରେ ଦ୍ୱିତୀୟ ଥର ପାଇଁ ମୁହାଁମୁହିଁ ହେବାକୁ ଯାଉଛନ୍ତି ଦୁଇ ପାରମ୍ପରିକ ପ୍ରତିଦ୍ୱନ୍ଦୀ । ଦୁବାଇରେ ଆଜି ଅପରାହ୍ନ ୫ଟାରେ ହେବ ଏହି ହାଇ ଭୋଲଟେଜ୍ ମ୍ୟାଚ୍ । ଲିଗ୍ ପର୍ଯ୍ୟାୟ ମ୍ୟାଚରେ ୮ ୱିକେଟରେ ପାକିସ୍ତାନକୁ ହରାଇଥିଲା ଭାରତ । ତେଣୁ ଏହି ମ୍ୟାଚରେ ଟିମ୍ ଇଣ୍ଡିଆର ଆତ୍ମବିଶ୍ୱାସ ବେଶ୍ ଉଚ୍ଚା ରହିବ । ତେବେ ଅନେକ ସମୟରେ ବିପର୍ଯ୍ୟୟ ସୃଷ୍ଟି କରିବାକୁ କ୍ଷମତା ରଖୁଥିବା ପାକିସ୍ତାନ ଦଳକୁ ହାଲୁକା ଭାବେ ନେଇପାରିବନି ଭାରତ । ୩ ଟି ମ୍ୟାଚ୍ ଖେଳି ସବୁଥିରେ ବିଜୟୀ ହୋଇଥିବା ଭାରତୀୟ ଦଳ ଏହି ମ୍ୟାଚ୍ ଜିତି ଫାଇନାଲରେ ସ୍ଥାନ ସୁରକ୍ଷିତ କରିବା ଲକ୍ଷ୍ୟରେ ରହିବ ।

ଅନ୍ୟ ପକ୍ଷରେ ପାକିସ୍ତାନ ବୁଧବାର ପରାଜୟର ପ୍ରତିଶୋଧ ରବିବାର ନେବା ଯୋଜନାରେ ଥିବ। ଏସିଆ କପ୍‌ରେ ପାକିସ୍ତାନକୁ ଭାରତ ୭ ଏବଂ ଭାରତକୁ ପାକିସ୍ତାନ ୫ ଥର ପରାସ୍ତ କରିଛି। ନବାଗତ ହଂକଂ ବିପକ୍ଷରେ ଭାରତ ଆଶ୍ଚର୍ଯ୍ୟଜନକ ଭାବେ ସଂଘର୍ଷ କରିଥିଲା। ହେଲେ ପାକିସ୍ତାନ ଏବଂ ବାଂଲାଦେଶ ବିପକ୍ଷରେ ସହଜ ବିଜୟ ହାସଲ କରି ଲୟକୁ ଫେରିଥିଲା। ସେପଟେ ହଂକଂକୁ ୮ ଓ୍ଵିକେଟ୍‌ରେ ହରାଇବା ପରେ ଭାରତଠାରୁ ସେହି ୮ ଓ୍ଵିକେଟ୍‌ରେ ହାରିଥିଲା ପାକିସ୍ତାନ। ଶୁକ୍ରବାର ଅବଶ୍ୟ ଆଫଗାନିସ୍ତାନ ବିପକ୍ଷ ମ୍ୟାଚ୍‌ରେ ରୋମାଞ୍ଚକର ବିଜୟ ହାସଲ କରିଥିଲା। ରବିବାର କିନ୍ତୁ ପାକିସ୍ତାନ ଗତବର୍ଷର ଚାମ୍ପିଅନ୍ସ ଟ୍ରଫି ଫାଇନାଲ ପ୍ରଦର୍ଶନକୁ ଦୋହରାଇବା ଆଶାରେ ଓହ୍ଲାଇବ। ଗତବର୍ଷ ଇଂଲଣ୍ଡରେ ଖେଳା ଯାଇଥିବା ଚାମ୍ପିଅନ୍ସ ଟ୍ରଫିରେ ଭାରତ ଲିଗ୍‌ ପର୍ଯ୍ୟାୟରେ ପାକିସ୍ତାନକୁ ହରାଇଥିଲା। ହେଲେ ଫାଇନାଲରେ ହାରି ଉପବିଜେତାରେ ସନ୍ତୁଷ୍ଟ ରହିଥିଲା।

ବିରାଟ କୋହଲିଙ୍କ ଅନୁପସ୍ଥିତି ସତ୍ତ୍ୱେ ଭାରତ ଗତ ଦୁଇଟି ମ୍ୟାଚ୍‌ରେ ଉଭୟ ବ୍ୟାଟିଂ ଓ ବୋଲିଂରେ ଅପକ୍ଷାକୃତ ଭଲ କରିିଛି। ଶିଖର ଧାଓ୍ଵନ ଓ ଅଧିନାୟକ ରୋହିତ ଶର୍ମା ଦୃଢ଼ ମୂଳଦୁଆ ପକାଇବା ପରେ ମଧ୍ୟକ୍ରମ ମଧ୍ୟ ଆଶାଜନକ ଖେଳ ଖେଳିଛି। କେଦାର ଯାଦବ, ରବୀନ୍ଦ୍ର ଜାଦେଜା ଚମତ୍କାର କ୍ରିକେଟ୍‌ ଖେଳିଥିଲା ବେଳେ ଅଭିଜ୍ଞ ମହେନ୍ଦ୍ର ସିଂହ ଧୋନି ମଧ୍ୟ ଶୁକ୍ରବାର ବେଶ୍‌ କିଛି ସମୟ କ୍ରିଜ୍‌ରେ କଟାଇଛନ୍ତି। ଯଶ୍‌ପ୍ରୀତ ବୁମରା, ଭୁବନେଶ୍ୱର କୁମାର, ୟୁଜବେନ୍ଦ୍ର ଚହଲ ଓ କୁଲଦୀପ ଯାଦବ ଗତ ମ୍ୟାଚ୍‌ ଭଳି ରବିବାର ମଧ୍ୟ ପାକ୍‌ ବ୍ୟାଟ୍ସମ୍ୟାନଙ୍କୁ ଘାଇଲା କରିବେ ବୋଲି ଆଶା କରାଯାଉଛି। ପାକିସ୍ତାନର ଶୀର୍ଷକ୍ରମ ଆପାତତଃ ଲୟକୁ ଫେରିବାର ସଂକେତ ଦେଇଛି। ହେଲେ ପ୍ରମୁଖ ବୋଲର ମହମ୍ମଦ ଆମିର ପ୍ରଭାବହୀବ ରହିବା ପାକିସ୍ତାନ ପାଇଁ ଚିନ୍ତାର କରଣ ହୋଇଛି। ତଥାପି ରବିବାର ଉଭୟ ଦଳରେ ବଡ଼ ଧରଣର ଅଦଳ ବଦଳ ହେବାର ଆଶଙ୍କା କମ୍‌।

ସମ୍ଭାବ୍ୟ ଭାରତ: ରୋହିତ ଶର୍ମା (ଅଧିନାୟକ), ଶିଖର ଧାଓ୍ଵନ, ଅମ୍ବାତି ରାୟୁଡୁ, ଦୀନେଶ କାର୍ତିକ, ମହେନ୍ଦ୍ର ସିଂହ ଧୋନି, କେଦାର ଯାଦବ, ଦୀପକ ଚହର, ମନୀଷ ପାଣ୍ଡେ, ଭୁବନେଶ୍ୱର କୁମାର, କୁଲଦୀପ ଯାଦବ, ୟୁଜବେନ୍ଦ୍ର ଚହଲ, ଯଶ୍‌ପ୍ରୀତ ବୁମ୍‌ରା।

ସମ୍ଭାବ୍ୟ ପାକିସ୍ତାନ: ସର୍ଫରାଜ ଅହମ୍ମଦ (ଅଧିନାୟକ), ଇମାମ-ଉଲ୍‌-ହକ୍‌, ବାବର ଆଜମ, ସୋଏବ ମଲ୍ଲିକ, ଆସିଫ ଅଲ୍ଲୀ, ସଦାବ ଖାନ୍‌, ଫହିମ ଅସ୍ରଫ, ମହମ୍ମଦ ଆମିର, ହାସନ ଅଲ୍ଲୀ, ଉସମାନ ଖାନ୍‌, ସାହିନ୍‌ ଆଫ୍ରିଦି।

 

Comments are closed.