‘ଛାତ ଉପରୁ ସିଟି ମାରିବା ଅସଦାଚରଣ ନୁହେଁ’, ବମ୍ବେ ହାଇକୋର୍ଟର ଔରଙ୍ଗାବାଦ ବେଞ୍ଚ ଅଭିଯୁକ୍ତଙ୍କୁ ଦେଲେ ଜାମିନ।
କନକ ବ୍ୟୁରୋ: ବମ୍ବେ ହାଇକୋର୍ଟର ଔରଙ୍ଗାବାଦ ବେଞ୍ଚ ମହିଳାଙ୍କୁ ଅସଦାଚରଣ ପ୍ରସଙ୍ଗରେ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି । ଏକ ମାମଲାରେ ତିନି ଅଭିଯୁକ୍ତଙ୍କୁ ଜାମିନପ୍ରଦାନ କରିଛନ୍ତି କୋର୍ଟ । ତେବେ ଚର୍ଚ୍ଚା ଏଥିପାଇଁ ହେଉଛି କାରଣ ଏହି ତିନି ଅଭିଯୁକ୍ତ ନିଜ ଛାତ ଉପରୁ ସିଟି ବଜାଇ ମହିଳାଙ୍କୁ ଅସଦାଚରଣ କରିଥିଲେ । ତେବେ କୋର୍ଟ କହିଛନ୍ତି, ନିଜ ଘରୁ କେହି କୌଣସି ଶବ୍ଦ ବାହାର କରୁଥାଏ, ତେବେ ସିଧାସଳଖ ଭାବେ ଆମେ କହିପାରିବା ନାହିଁ ଯେ ତାହା ମହିଳାଙ୍କ ପ୍ରତି ଅସଦାଚରଣ ନା ନାହିଁ । ତେଣୁ ଏଭଳି କ୍ଷେତ୍ରରେ ଛାତ ଉପରୁ ସିଟି ମାରିବା ଅସଦାଚରଣ ନୁହେଁ ।
Kanak News is now on WhatsApp
Join and get latest news updates delivered to you via WhatsApp
ଅହମ୍ମଦନଗରରେ ରହୁଥିବା ତିନି ଯୁବକ ଲଷ୍ମଣ. ଯୋଗେଶ ଏବଂ ସବିତା ପାଣ୍ଡବଙ୍କ ଉପରେ ଏସସି, ଏସଟି ଆକ୍ଟରେ ମାମଲା ରୁଜୁ ହୋଇଥିଲା । ସେସନ୍ସ କୋର୍ଟ ତିନି ଜଣଙ୍କର ଜାମିନ ନାମଞ୍ଜୁର କରିଦେଇଥିଲେ । ଏହା ବିରୋଧରେ ସମସ୍ତେ ହାଇକୋର୍ଟରେ ଆବେଦନ କରିଥିଲେ । ଯୁବକଙ୍କ ଆବେଦନ ଉପରେ ଶୁଣାଣି କରି ଜଷ୍ଟିସ ବିଭା କଙ୍କନୱାଡି ଏବଂ ଜଷ୍ଟିସ ଅଭୟ ବାଘବାସେ ତିନି ଜଣଙ୍କୁ ଜାମିନ ପ୍ରଦାନ କରିଛନ୍ତି ।
ଅଭିଯୋଗ ଅନୁସାରେ, ଅଭିଯୁକ୍ତ ଏବଂ ପିଡୀତା ପଡୋଶୀ ଭାବେ ରହୁଥିଲେ । ପିଡୀତାଙ୍କ ଅଭିଯୋଗ ଯେ ଯୋଗେଶ ତାଙ୍କୁ ଖରାପ ନଜରରେ ଦେଖୁଥିଲା । ପ୍ରଥମେ ସେ ଏହାକୁ ଅଣଦେଖା କରୁଥିଲେ । ତେବେ ୨୦୨୧ ମସିହା ନଭେମ୍ବର ୨୮ ତାରିଖରେ ଯୋଗେଶ ଘରୁ ରହି ତାଙ୍କ ଭିଡିଓ ଉତ୍ତୋଳନ କରିଥିଲେ । ଯେତେବେଳେ ସମ୍ପୃକ୍ତ ମହିଳାଙ୍କ ସ୍ୱାମୀ ଏନେଇ ଘର ମାଲିକଙ୍କୁ ଜଣାଇଥିଲେ ତେବେ ସେ ଏହାକୁ ଧ୍ୟାନ ଦେଇନଥିଲେ । ଏହା ପରେ ଯୋଗେଶ ଜାତିକୁ ନେଇ ଗାଳିଗୁଲଜ କରିଥିଲେ । ମୋବାଇଲରେ ଉଠାଇଥିବା ଫଟୋକୁ ସେ ବିଭିନ୍ନ ସ୍ଥାନରେ ଦେଖାଇଥିଲେ । ଏହା ପରେ ମଧ୍ୟ ପିଡୀତା ତାକୁ ଧ୍ୟାନ ଦେଉନଥିଲେ ।
ତେବେ ମାର୍ଚ୍ଚ ୨୦୨୨ରେ ଯୋଗେଶ ନିଜ ଛାତ ଉପରୁ ମହିଳାଙ୍କୁ ଦେଖି ସିଟି ମାରିଥିଲେ । ବାସନ ବଜାଇ ସେ ଜୋରରେ ପାଟି କରିଥିଲେ । ବିଭିନ୍ନ ପ୍ରକାର ଶବ୍ଦ ବାହାର କରି ମହିଳାଙ୍କୁ ହଇରାଣ କରିଥିଲେ । ପିଡୀତାଙ୍କ କହିବା ଅନୁସାରେ ମାର୍ଚ୍ଚ ୨୪ରେ ଯୋଗେଶ ଏବଂ ତାଙ୍କର ପରିବାର ସଦସ୍ୟ ମହିଳାଙ୍କ ଘରକୁ ପଥର ଫୋପାଡିଥିଲେ । ଏହି ଘଟଣା ନେଇ ମହିଳା କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ତେବେ ସେସନ କୋର୍ଟ ଅଭିଯୁକ୍ତଙ୍କୁ ଜାମିନ ପ୍ରଦାନ କରିନଥିବା ବେଳେ ହାଇକୋର୍ଟ ଅଭିଯୁକ୍ତଙ୍କୁ ଜାମିନ ପ୍ରଦାନ କରିଛନ୍ତି ।