ସତରେ ନିଶାରେ ଥିଲେ କି ଭଗୱନ୍ତ ମାନ? ବେସାମରିକ ବିମାନ ଚଳାଚଳ ମନ୍ତ୍ରୀ କହିଲେ ଏମିତି କଥା।
କନକ ବ୍ୟୁରୋ: ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନଙ୍କୁ ସତରେ କଣ ଫ୍ରାଙ୍କଫର୍ଟ ବିମାନ ବନ୍ଦରରେ ଓହ୍ଲାଇ ଦିଆଯାଇଥିଲା? ଏହି ପ୍ରଶ୍ନ ଆଜି ସମସ୍ତଙ୍କ ମନରେ ରହିଛି । ବିରୋଧୀ ଦଳର ନେତା ଏହାକୁ ଲଜ୍ଜାଜନକ ଘଟଣା କହିଛନ୍ତି । ତେବେ ଆଧିକାରୀକ ଭାବେ ଏନେଇ କୌଣସି ସ୍ପଷ୍ଟୀକରଣ ଆସିପାରିନାହିଁ । ମାନଙ୍କ ଉପରେ ଅଭିଯୋଗ ରହିଛି ଯେ ଲୁଫଥାନ୍ସ ଏୟାରଲାଇନ୍ସ ଅତ୍ୟଧିକ ମଦ୍ୟପାନ କରିଥିବା କାରଣରୁ ତାଙ୍କୁ ଯାତ୍ରା କରିବା ପାଇଁ ଅନଫିଟ ଘୋଷଣା କରି ବିମାନରୁ ଓହ୍ଲାଇ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ସେପ୍ଟେମ୍ବର ୧୭ରେ ମାନ ଜର୍ମାନୀର ଫ୍ରାଙ୍କଫର୍ଟ ବିମାନ ବନ୍ଦରେ କଥିତ ଭାବେ ଲୁଫଥାନ୍ସ ଏୟାରଲାଇନ୍ସ ଅତ୍ୟଧିକ ମଦ୍ୟପାନ କରିଥିବା କାରଣରୁ ତାଙ୍କୁ ଯାତ୍ରା କରିବା ପାଇଁ ଅନଫିଟ ଘୋଷଣା କରି ବିମାନରୁ ଓହ୍ଲାଇ ଦେଇଥିଲେ । ବିରୋଧୀ କଂଗ୍ରେସ ଏବଂ ଶିରୋମଣି ଅକାଳୀ ଦଳ ନେତାଙ୍କ ଅଭିଯୋଗ ଯେ ବିମାନ ଯାତ୍ରୀ କହିଥିଲେ ଯେ ସେ ନିଶାରେ ରହିଛନ୍ତି । ଏହି କାରଣରୁ ଫ୍ଲାଇଟ ଚାରିଘଣ୍ଟା ବିଳମ୍ବରେ ଉଡାଣ କରିଥିଲା । ଲୁଫଥାନ୍ସର ୱେବାସାଇଟ ଅନୁସାରେ ଏହି ବିମାନ ଫ୍ରାଙ୍କଫର୍ଟରୁ ଶନିବାର ଦ୍ୱିପ୍ରହର ୧.୪୦ରେ ବାହାରିବାର ଥିଲା । ଦିଲ୍ଲୀ ବିମାନ ବନ୍ଦରରେ ଏହା ରାତି ୧୨.୫୫ରେ ଅବତରଣ କରିବା କଥା ତେବେ ଏହା ଚାରିଘଣ୍ଟା ବିଳମ୍ବରେ ଉଡାଣ କରିଥିଲା । ବିମାନ ସନ୍ଧ୍ୟା ୫.୫୨ରେ ଛାଡିବା ସହ ସୋମବାର ସକାଳ ୪ଟା ୩୦ରେ ଅବତରଣ କରିଥିଲା ।
ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ମଙ୍ଗଳବାର ଏନେଇ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ବିରୋଧୀ ଦଳର ନେତା ସୁଖବୀର ସିଂହ ବାଦଲଙ୍କ ଅଭିଯୋଗର ଯାଞ୍ଚ କରାଯିବ । ଅଭିଯୋଗରେ କୁହାଯାଇଛି ଯେ ମୁଖ୍ୟମନ୍ତ୍ରୀ ମାନ ପ୍ରାଙ୍କଫର୍ଟରେ ଜର୍ମାନ ଏୟାରଲାଇନ ଦ୍ୱାରା ବିମାନରୁ ଓହ୍ଲାଇ ଦିଆଯାଇଛି । ସେ ନିଶାରେ ଥିବାରୁ ଏଭଳି କରାଯାଇଛି । ଏହି ମାମଲାଟି ବିଦେଶ କ୍ଷେତ୍ର ସହ ଜଡିତ । ଏନେଇ ଆମେ ପୁଙ୍ଖାନୁପଙ୍ଖ ତଦନ୍ତ କରିବୁ । ଆମେ ଏନେଇ ବିମାନସେବା ପ୍ରଦାନକାରୀ କମ୍ପାନୀଠାରୁ ତଥ୍ୟ ହାସଲ ପାଇଁ ଚେଷ୍ଟା କରୁଛୁ ।