କଳାହାଣ୍ଡି-ନବରଙ୍ଗପୁର ସୀମାନ୍ତ ବେହେରା ବନଖଣ୍ଡ ଅଂଚଳରେ ବାଘ ଆତଙ୍କ । ନିରୋଳା ଦେଖି ଆକ୍ରମଣ କରୁଥିବା ସନ୍ଦେହ । ସାହାଜଖୋଲ ଜଙ୍ଗଲରୁ ମିଳିଲା କ୍ଷତବିକ୍ଷତ ଗାଈର ମୃତଦେହ । ବନାଂଚଳକୁ ନଯିବାକୁ ବନବିଭାଗର ପରାମର୍ଶ ।
କନକ ବ୍ୟୁରୋ : କଳାହାଣ୍ଡି ଜିଲ୍ଲାର ନବରଙ୍ଗପୁର ସୀମାନ୍ତ ଅଂଚଳରେ ବାଘ ଆତଙ୍କ । ସାହାଜଖୋଲ ଜଙ୍ଗଲରେ ବାଘ ମାତିଥିବା ନେଇ ଗତୋମୁଣ୍ଡା ପଂଚାୟତର ବାଂଜିକୋଟ ଗାଁରେ ଆତଙ୍କ ଖେଳିଯାଇଛି । ଜଙ୍ଗଲକୁ ଯାଇଥିବା ଏକ ଗାଈ କ୍ଷତାକ୍ତ ହୋଇ ମରିପଡିଥିବା ଦେଖିବାକୁ ମିଳିଛି । ଗାଈକୁ ଜଙ୍ଗଲରେ ବାଘ ଶିକାର କରିଥିବା ଅଭିଯୋଗ କରିଛନ୍ତି ବାଞ୍ଜିକୋଟ ଗାଁର ଲୋକେ ।
Kanak News is now on WhatsApp
Join and get latest news updates delivered to you via WhatsApp
ଏହାକୁ ନେଇ ଲୋକେ ଆତଙ୍କିତ ହୋଇ ରାତିରେ ଅନିଦ୍ରା ହୋଇ ଗାଁକୁ ଜଗିବା ସହ ବନବିଭାଗ କର୍ମଚାରୀଙ୍କୁ ଖବର ଦେଇଥିଲେ । ବନବିଭାଗ କର୍ମଚାରୀ ଘଟଣାସ୍ଥଳରେ ପହଂଚି ସ୍ଥିତି ଅନୁଧ୍ୟାନ କରିବା ସହ କୌଣସି ଜଙ୍ଗଲୀ ଜନ୍ତୁଙ୍କ ଆକ୍ରମଣରେ ଗାଈର ମୃତ୍ୟୁ ହୋଇଥିବା କହିଛନ୍ତି । ବନବିଭାଗ ବାଘ ମାରିଥିବା ନେଇ କୌଣସି ସ୍ପଷ୍ଟ ସୂଚନା ଦେଇ ନାହାନ୍ତି ।
ଏଥିସହ ଜଙ୍ଗଲ ଭିତରକୁ ନଯିବା ଗ୍ରାମବାସୀଙ୍କୁ ପରାମର୍ଶ ଦେଇଛି ବନବିଭାଗ । ତେବେ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ପରିବାର ଚଳାଉଥିବାରୁ ଗ୍ରାମବାସୀଙ୍କୁ ପେଟ ପାଟଣା ଚିନ୍ତା ଘାରିଛି । ବାଘ ଭୟରେ ଜଙ୍ଗଲ ଭିତରକୁ ଯାଇପାରୁନାହାନ୍ତି ଲୋକେ । ତେବେ ବାଘକୁ ଖୋଜିବାକୁ ପ୍ରୟାସ ଜାରି ରଖିଛି ବନବିଭାଗ ।