ପୁଣିଥରେ ମହାସମାବେଶ ପାଇଁ ପ୍ରସ୍ତୁତି ! ପ୍ରତିଶ୍ରୁତି ପରେ ବି ଆନ୍ଦୋଳନରେ ସ୍କୁଲ କଲେଜ ଶିକ୍ଷକ
କନକ ବ୍ୟୁରୋ: ସ୍କୁଲ, କଲେଜ ଶିକ୍ଷକଙ୍କ ଲାଗି ସତ୍ୟପାଠର ଆବଶ୍ୟକତା ନାହିଁ ବୋଲି ମଙ୍ଗଳବାର ରାଜ୍ୟ ସରକାର ଘୋଷଣା କରିବା ପରେ ବି ଆନ୍ଦୋଳନରୁ ଓହରି ନାହାନ୍ତି ସ୍କୁଲ, କଲେଜ ଶିକ୍ଷକ ଓ କର୍ମଚାରୀ। ଏନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ କରିବାକୁ ସେମାନେ ଦାବି କରିଛନ୍ତି। ଯେପର୍ଯ୍ୟନ୍ତ ବିଧିବଦ୍ଧ ବିଜ୍ଞପ୍ତି ପ୍ରକାଶ କରା ନ ହୋଇଛି ସେପର୍ଯ୍ୟନ୍ତ ଆନ୍ଦେଳନରୁ ଓହରିବାର ପ୍ରଶ୍ନ ଉଠୁ ନାହିଁ ବୋଲି ଓଡ଼ିଶା ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚ ପକ୍ଷରୁ ଗତକାଲି ସ୍ପଷ୍ଟ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମଞ୍ଚ ପକ୍ଷରୁ କୁହାଯାଇଛି ଯେ, ଆଗକୁ ପରୀକ୍ଷା ଥିବାରୁ ଏବେ ତରବରିଆ ଭାବେ ପ୍ରତିଶ୍ରୁତି ଦେଇ ଆନ୍ଦୋଳନ ଚପାଇବାକୁ ଉଦ୍ୟମ ହେଉଛି । ପ୍ରତିଥର ପରି ଏଥର ମଧ୍ୟ ପ୍ରତାରଣା କରିବା ଲାଗି ଏହା ଏକ ଚକ୍ରାନ୍ତ । ତେଣୁ ଦାବି ପୂରଣ ନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ କରା ନ ଯିବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ । ବ୍ଲକଗ୍ରାଣ୍ଟ ଉଚ୍ଛେଦ କରି ସପ୍ତମ ବେତନ କମିସନ ଲାଗୁ, ଚାକିରି ସର୍ତ୍ତାବଳୀ ପ୍ରଦାନ ସହ ୪୦%,୬୦% ଓ ୭୫% ବ୍ଲକଗ୍ରାଣ୍ଟପ୍ରାପ୍ତ ବିଦ୍ୟାଳୟ ଓ କଲେଜକୁ ଶତ ପ୍ରତିଶତ ଦରମା ଭିତ୍ତିକ ଅନୁଦାନ ପ୍ରଦାନ କରା ନ ଗଲେ ଆନ୍ଦୋଳନରୁ ଓହରିବୁ ନାହିଁ ବୋଲି ମିଳିତ ମଞ୍ଚର ଆବାହକ ମଣ୍ଡଳୀ ସଦସ୍ୟ ପବିତ୍ର ମହାଲା, ଗୋଲକ ନାୟକ ଓ ପ୍ରକାଶ ଚନ୍ଦ୍ର ମହାନ୍ତି କହିଛନ୍ତି ।
ପୁଣିଥରେ ରାଜ୍ୟ ସରକାରଙ୍କୁ ସମୟ ଦେଇଛି ମିଳିତ ମଞ୍ଚ । ଶନିବାର ସୁଦ୍ଧା ଗଣଶିକ୍ଷା ଓ ଉଚ୍ଚଶିକ୍ଷା ବିଭାଗ ବିଧିବଦ୍ଧ ବିଜ୍ଞପ୍ତି ଜାରି କରନ୍ତୁ । ନ ହେଲେ ସୋମବାର ରାଜଧାନୀରେ ପୁଣିଥରେ ଶିକ୍ଷକଙ୍କ ମହାସମାବେଶ ଅନୁଷ୍ଠିତ ହେବ । ୫୦ ହଜାରରୁ ଅଧିକ ଶିକ୍ଷକ, କର୍ମଚାରୀ ସାମିଲ ହୋଇ ସରକାରଙ୍କ ବିରୋଧରେ ରଣହୁଙ୍କାର ଦେବେ । ଅନ୍ୟପକ୍ଷରେ ଲୋୟର ପିଏମ୍ଜିରେ ଆନ୍ଦୋଳନରତ ଶିକ୍ଷକ, ଶିକ୍ଷୟିତ୍ରୀ ଗତକାଲି ରାସ୍ତାରେ ମହାଶିବରାତ୍ରି ପାଳନ କରିଛନ୍ତି । ଉପବାସରେ ରହିବା ସହ ଦୀପ ଜାଳିଛନ୍ତି ।