କରୋନା ସଂକ୍ରମଣକୁ ନେଇ ବଢିଲା ଚିନ୍ତା : ଜନସ୍ୱାସ୍ଥ୍ୟ ନିର୍ଦ୍ଦେଶକ କହିଲେ, ସତର୍କ ନହେଲେ ବଢ଼ିବ ସଂକ୍ରମଣ
ଏପଟେ ପ୍ରତିଦିନ ୧ ଲକ୍ଷ ବୟସ୍କଙ୍କ ଟିକାକରଣ ଟାର୍ଗେଟ; ଖରାକୁ ଦୃଷ୍ଟିରେ ରଖି ୭ଶହକୁ ବୃଦ୍ଧି ପାଇଲା ଟିକା କେନ୍ଦ୍ର
କନକ ବ୍ୟୁରୋ : ରାଜ୍ୟରେ ପ୍ରଥମ କରୋନା ଆକ୍ରାନ୍ତ ଚିହ୍ନଟ ହେବାକୁ ଆଜି ବର୍ଷେ ପୂରିଛି । ଏହାରି ଭିତରେ କରୋନାର ପ୍ରକୋପ କମି ନ ଥିବାବେଳେ ପୁଣିଥରେ ବ୍ୟାପକ ହେବାରେ ଲାଗିଛି ସଂକ୍ରମଣ । ଦେଶରେ ୨୪ ଘଂଟାରେ ୨୪ ହଜାରରୁ ଅଧିକ ସଂକ୍ରମିତ ଚିହ୍ନଟ ହେବା ଚିନ୍ତା ବଢାଇ ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ଯଦିଓ ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା କମ୍ ରହିଛି, କିନ୍ତୁ ୭ରୁ ୮ଟି ରାଜ୍ୟରୁ ପ୍ରାୟ ୮୫ ପ୍ରତିଶତ ଆକ୍ରାନ୍ତ ବାହାରୁଛନ୍ତି । ତେବେ ଏହାକୁ କରୋନାର ଦ୍ୱିତୀୟ ଲହର କହିହେବ ନାହିଁ ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର । ଦେଶରେ ଅନଲକ ପରେ ଲୋକଙ୍କ ଭିତରେ କରୋନାକୁ ନେଇ କୋହଳ ମନୋଭାବ ପ୍ରକାଶ ପାଉଛି । କିନ୍ତୁ ସଂକ୍ରମଣକୁ ଏଡାଇବାକୁ ହେଲେ ଆମକୁ ସତର୍କ ରହିବାକୁ ପଡିବ ବୋଲି ସେ ଚେତାଇ ଦେଇଛନ୍ତି ।
ସେପଟେ ରାଜ୍ୟରେ କରୋନା ଟିକାକରଣ ଜାରି ରହିଛି । ପ୍ରତିଦିନ ୧ ଲକ୍ଷ ବୟସ୍କଙ୍କ ଟିକାକରଣ ପାଇଁ ଲକ୍ଷ୍ୟ ରଖିଛନ୍ତି ରାଜ୍ୟ ସରକାର । ତେଣୁ ଖରା ଦିନକୁ ଦୃଷ୍ଟିରେ ରଖି ଟିକାକେନ୍ଦ୍ର ସଂଖ୍ୟା ୭ ଶହକୁ ବୃଦ୍ଧି କରାଯାଇଛି । କେବଳ ରହିବାର ଓ ସରକାରୀ ଛୁଟିକୁ ବାଦଦେଇ ଅନ୍ୟଦିନ ଗୁଡିକରେ ଟିକାକରଣ ହେବ ବୋଲି ସୂଚନା ଦେଇଛନ୍ତି ପରିବାର କଲ୍ୟାଣ ନିର୍ଦ୍ଦେଶକ ଡାକ୍ତର ବିଜୟ ପାଣିଗ୍ରାହୀ ।