କନକ ବ୍ୟୁରୋ: ଯେଉଁ ଚର୍ଚ୍ଚା ଦୀର୍ଘ ଦିନ ଧରି କଂଗ୍ରେସ କ୍ୟାମ୍ପରେ ଚାଲିଥିଲା ତାକୁ କେବଳ ଗୋଟିଏ ବିବୃତିରେ ଶେଷ କରିଛନ୍ତି ନିର୍ବାଚନ ରଣନୀତିକାର ପ୍ରଶାନ୍ତ କିଶୋର । କଂଗ୍ରେସରେ ସାମିଲ ହେବା ଅଫରକୁ ସେ କିଛି ଦିନ ପୂର୍ବରୁ ପ୍ରତ୍ୟାକ୍ଷାନ କରିଦେଇଥିଲେ । ଏହାକୁ ନେଇ କଂଗ୍ରେସ କ୍ୟାମ୍ପରେ ଯେତିକି ଚର୍ଚ୍ଚା ସେତିକି ହଲଚଲ ବି ଦେଖିବାକୁ ମିଳୁଛି । ଏବେ ପୁଣି ଖବରର ଶିରୋନାମା ପାଲଟିଛି ପୋଲ ଷ୍ଟ୍ରାଟେଜି ମେକର ପ୍ରଶାନ୍ତ କିଶୋରଙ୍କ ବୟାନ । ପ୍ରଶାନ୍ତ କହିଛନ୍ତି କଂଗ୍ରେସ ସହ ବସିଥିବା ଶେଷ ବୈଠକରେ ସେ ୮ରୁ ୯ ଘଂଟାର ଏକ ପ୍ରେଜେନଟେସନ ଦେଇଥିଲେ । ଯେଉଁଥିରେ କଂଗ୍ରେସର ଆଗାମୀ ଅଧ୍ୟକ୍ଷ ପାଇଁ ରାହୁଲ ଗାନ୍ଧୀ କିମ୍ବା ପ୍ରିୟଙ୍କାଙ୍କ ନାଁ ପ୍ରସ୍ତାବ ଦେଇନଥିଲେ ପ୍ରଶାନ୍ତ । ଏକ ଜାତୀୟ ଗଣମାଧ୍ୟମରେ ଏଭଳି ବୟାନ ଦେଇ ଏବେ ପୁଣି ଚର୍ଚ୍ଚାକୁ ଆସିଛନ୍ତି ପିକେ ।
Kanak News is now on WhatsApp
Join and get latest news updates delivered to you via WhatsApp
ଚର୍ଚ୍ଚା ହେଉଛି, ପ୍ରଶାନ୍ତ ଯେଉଁ ସବୁ ସର୍ତ ରଖିଥିଲେ ସେଥିରେ ମୁଖ୍ୟ ସର୍ତ ଥିଲା ଗାନ୍ଧୀ ପରିବାର ବାହାରୁ ଦଳର ଅନ୍ୟ ଜଣେ ବରିଷ୍ଠ ନେତାଙ୍କୁ ଦଳର ଆଗାମୀ ଅଧ୍ୟକ୍ଷ କରିବା । ସାକ୍ଷାତକାରରେ ପ୍ରଶାନ୍ତ କହିଛନ୍ତି ଯେ କଂଗ୍ରେସ ନିଜ ନିଷ୍ପତି ନେବାକୁ ପୂର୍ଣ୍ଣ ସମର୍ଥ ଓ ସେ ଦେଇଥିବା ପରାର୍ମଶକୁ କଂଗ୍ରେସ ଗ୍ରହଣ କରିବ କି ନାହିଁ ସେ କଥା ଦଳ ଉପରେ ନିର୍ଭର କରୁଛି ।
କିଛି ଦିନ ପୂର୍ବରୁ ଦଳରେ ମିଶିବାକୁ ପ୍ରଶାନ୍ତ କିଶୋର ସଫା ସଫା ମନା କରି ଦେଇଥିଲେ । ଚର୍ଚ୍ଚା ହେଉଥିଲା ୨୦୨୪ ସାଧାରଣ ନିର୍ବାଚନ ପାଇଁ କଂଗ୍ରେସ ଲାଗି ଚାଣକ୍ୟ ସାଜି ପ୍ରଶାନ୍ତ ବିଜୟ ମନ୍ତ୍ର ଦେବେ । କିନ୍ତୁ ବିଭିନ୍ନ କାରଣରୁ ଦଳ ସହ ପ୍ରଶାନ୍ତଙ୍କ ଫର୍ମୂଲା ଫିଟ ହେଲାନି ଓ ଦଳର ଅଫରକୁ ସେ ଏଡାଇ ଦେଇଥିଲେ ।
କଂଗ୍ରେସ ଅଫରକୁ ମନା କରିବା ପରେ ଉଭୟ କଂଗ୍ରେସ ଓ ପ୍ରଶାନ୍ତଙ୍କୁ ନେଇ ଭିନ୍ନ ଭିନ୍ନ ଖବର ପ୍ରତିଦିନ ସାମ୍ନାକୁ ଆସୁଛି । ଏହାରି ଭିତରେ ଏବେ ନିଜେ ସାମ୍ନାକୁ ଆସି ପ୍ରଶାନ୍ତ ନିଜ କଥା କହିଛନ୍ତି । ସେ କାହିଁକି କଂଗ୍ରେସରେ ସାମିଲ ହେଲେ ନାହିଁ ସେ କଥା ବଖାଣିବା ପରେ ହୁଏତ କଂଗ୍ରେସ କ୍ୟାମ୍ପରେ ଆଗକୁ ଅଧିକ କମ୍ପନ ହୋଇପାରେ । ଏହାସହ ପ୍ରଶାନ୍ତଙ୍କ ବିନା ୨୦୨୪ ନିର୍ବାଚନୀ ମୁକାବିଲା ଦଳ ପାଇଁ ବଡ ଚ୍ୟାଲେଂଜ ହୋଇପାରେ ।