କନକ ବ୍ୟୁରୋ: ଋଷ-ୟୁକ୍ରେନ ଯୁଦ୍ଧ ୩ ମାସରେ ପହଂଚିଥିବା ବେଳେ ୟୁକ୍ରେନକୁ ଆର୍ଥିକ ସହାୟତା ବଢାଇ ଚାଲିଛି ଆମେରିକା । ୟୁକ୍ରେନକୁ ଆଉ ୩୩ ବିଲିୟନ ଡଲାର ଅର୍ଥାତ୍ ପ୍ରାୟ ୨ ଲକ୍ଷ ୫୨ ହଜାର କୋଟି ଟଙ୍କାର ସହାୟତା ଯୋଗାଇଦେବାକୁ ଆମେରିକା କଂଗ୍ରେସର ସହଯୋଗ ଲୋଡିଛନ୍ତି ଜୋ ବାଇଡେନ୍ ।
Kanak News is now on WhatsApp
Join and get latest news updates delivered to you via WhatsApp
ୟୁକ୍ରେନକୁ ଋଷ ସହ ଲଢିବା ପାଇଁ ହ୍ୱାଇଟ୍ ହାଉସରେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ଆଉ ୩୩ ମିଲିୟନ ଡଲାରର ସହାୟତା ପ୍ରଦାନ ପାଇଁ କଂଗ୍ରେସର ସମର୍ଥନ ଲୋଡିଛନ୍ତି । ଯେଉଁଥିରେ ୨୦ ବିଲିୟନ ଡଲାର ଅବା ଦେଢ ଲକ୍ଷ କୋଟି ଟଙ୍କାର ଅସ୍ତ୍ରଶସ୍ତ୍ର, ବନ୍ଧୁକ, ଗୁଳି ଏବଂ ଅନ୍ୟାନ୍ୟ ମିଲିଟାରୀ ସହାୟତା ଅଛି । ଏଥିସହ ୟୁକ୍ରେନର ଆର୍ଥିକ ସ୍ଥିତିର ସୁଧାର ପାଇଁ ୮ ଦଶମିକ୍ ୫ ବିଲିୟନ ଡଲାର ଅବା ୬୪ ହଜାର କୋଟି ଟଙ୍କାର ସିଧା ସଳଖ ଆର୍ଥିକ ସହାୟତା ପଠାଇଛି । ଏହାଛଡା ମାନବିକତା ଦୃଷ୍ଟିକୋଣରୁ ୩ ବିଲିୟନ ଡଲାର ଅବା ୨୨ ହଜାର କୋଟିର ସହାୟତା ପଠାଇବାକୁ ପ୍ରସ୍ତାବ ଦେଇଛନ୍ତି ବାଇଡେନ୍ ।
ହ୍ୱାଇଟ୍ ହାଉସରେ ବାଇଡେନ କହିଛନ୍ତି ୟୁକ୍ରେନର ସ୍ୱାଧୀନତା ଲଢେଇ ପାଇଁ ଏହି ବିଲର ଆବଶ୍ୟକତା ରହିଛି । ଏହି ଯୁଦ୍ଧର ପାଉଣା ଶସ୍ତା ନୁହେଁ । ଅକ୍ରୋଶମୂଳକ ଆକ୍ରମଣ ବ୍ୟୟବହୁଳ ହେବ ବୋଲି ସେ କହିଛନ୍ତି । ସହାୟତା ପାଇଁ ବାଇଡେନଙ୍କ ଅନୁରୋଧ ପରେ ଖୁସୀ ବ୍ୟକ୍ତି କରିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦାମିର ଜେଲେନସ୍କି । ଆମେରିକାବାସୀ ଏବଂ ବ୍ୟକ୍ତଗତ ଭାବେ ରାଷ୍ଟ୍ରପତି ବାଇଡେନଙ୍କୁ ଧନ୍ୟବାଦ ଜଣାଇଛନ୍ତି ଜେଲେନସ୍କି ।କଂଗ୍ରେସ ଖୁବଶିଘ୍ର ଏଥିପାଇଁ ସ୍ୱୀକୃତି ପ୍ରଦାନ କରିବ ବୋଲି ଆଶାବାଦୀ ଥିବା କହିଛନ୍ତି ଜେଲେନସ୍କି ।
ଆମେରିକା ଏବଂ ୟୁରୋପିଓ ଦେଶ ୟୁକ୍ରେନକୁ ସହାୟତା ପାଇଁ ସିଧା ସଳଖ ସେନା ପଠାଉ ନ ଥିଲେ ମଧ୍ୟ କିଭ୍କୁ ଆଂଟି ଏୟାରକ୍ରାଫ୍ଟ, ଆଂଟି ଟ୍ୟାଙ୍କ ମିଶାଇଲ, ଡ୍ରୋନ୍ ସହ ଅତ୍ୟାଧୁନିକ ଅସ୍ତ୍ରଶସ୍ତ୍ର ପଠାଉଛନ୍ତି । ଯାହା ଶକ୍ତିଶାଳୀ ଋଷ ସହ ଲଢିବା ପାଇଁ ୟୁକ୍ରେନକୁ ବଳ ଯୋଗାଉଛି । ୟୁକ୍ରେନକୁ ଆମେରିକା ସହାୟତା ଯୋଗାଉଥିବାରୁ ଯୁଦ୍ଧ ଶେଷ ହେବାରେ ବିଳମ୍ବ ହେଉଛି । କିନ୍ତୁ ଆମେରିକାର ଏହି ସହାୟତା ୠଷର ବିଜୟକୁ ରୋକିପାରିବ କି ନାହିଁ ତାହା ଆଗାମୀ ଦିନରେ ଜଣାପଡିବ ।