ଡେଲଟା ପ୍ଲସ ଭାଇରସ ଉପରେ ବିଶେଷଜ୍ଞ ପ୍ୟାନେଲର ମତ । କହିଲେ, ଫୁସଫୁସ ପ୍ରତି ଡେଲଟା ପ୍ଲସ ଅଧିକ ହୋଇପାରେ ଆକର୍ଷିତ, ହେଲେ କରିନପାରେ କ୍ଷତି ।
କନକ ବ୍ୟୁରୋ: ଦେଶର ୧୦ଟି ରାଜ୍ୟରେ ପ୍ରାୟ ୫୦ ମାମଲା ଆସିବା ପରେ ଡେଲଟା ପ୍ଲସ କରୋନା ଭୂତାଣୁ ନେଇ ଚିନ୍ତା ବଢ଼ିଯାଇଛି । କୋଭିଡ୍ ୱାର୍କିଂ ଗ୍ରୁପର ମୁଖ୍ୟ କହିଛନ୍ତି, ଫୁସଫୁସ ଟିସୁ ସହିତ ଏହି ଷ୍ଟ୍ରେନର ନିବିଡ଼ ସଂପର୍କ ରହିଛି । ନ୍ୟାସନାଲ ଟେକ୍ନିକାଲ ଆଡଭାଇଜରୀ ଗ୍ରୁପ ଅଫ୍ ଇମୁନାଇଜେସନ୍ ଅଧ୍ୟକ୍ଷ ଡକ୍ଟର ଏନ କେ ଆରୋରା କହିଛନ୍ତି, ଅନ୍ୟ ଷ୍ଟ୍ରେନ୍ ତୁଳନାରେ ଡେଲ୍ଟା ପ୍ଲସ୍, ଫୁସଫୁସରେ ମ୍ୟୁକୋଜାଲ୍ ଲାଇନ୍ ସହିତ ଅଧିକ ସଂପର୍କ ରହିଛି । କିନ୍ତୁ ଏହା ଅଧିକ କ୍ଷତି ଘଟାଇବାକୁ ସମର୍ଥ ଏ ନେଇ କିଛି ତଥ୍ୟ ମିଳିନାହିଁ ।
Kanak News is now on WhatsApp
Join and get latest news updates delivered to you via WhatsApp
ଏପରିକି ଏହା ଅଧିକ ଗୁରୁତର ରୋଗ ସୃଷ୍ଟି କରିବ କିମ୍ବା ଅଧିକ ସଂକ୍ରାମକ ହେବ ବୋଲି ମଧ୍ୟ କିଛି ପ୍ରମାଣ ମିଳିନାହିଁ । ଜୁନ ୧୧ ତାରିଖରେ ଡେଲଟା ପ୍ଲସ କରୋନା ଭୂତାଣୁ ଚିହ୍ନଟ ହେବା ପରେ ନିକଟରେ ଏହାକୁ ଭେରିଆଂଟ ଅଫ୍ କନସର୍ନ ଆଖ୍ୟା ଦେଇଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ । ଦେଶରେ ୫୦ ମାମଲା ଚିହ୍ନଟ ହେବା ସହ ସବୁଠୁ ଅଧିକ ମାମଲା ଆସିଛି ମହାରାଷ୍ଟ୍ରରୁ । ଡକ୍ଟର ଆରୋରା କହିଛନ୍ତି, ଅଧିକ ମାମଲା ଆସିବା ପରେ ଏହି ଷ୍ଟ୍ରେନର ପ୍ରଭାବ କଣ ପଡ଼ିବ, ତାହା ସ୍ପଷ୍ଟ ହେବ । ଯେଉଁମାନେ ଟିକା ନେଇଛନ୍ତି, ସେମାନଙ୍କ ନିକଟରେ ଏହାର ପ୍ରଭାବ କମ୍ ରହିଛି । ତେବେ କୋଭିଡ୍ ୱାର୍କିଂ ଗ୍ରୁପର ମୁଖ୍ୟ କହିଛନ୍ତି, ଏହି ଭୂତାଣୁ ଉପରେ ତୀକ୍ଷ୍ଣ ନଜର ରଖିବାକୁ ପଡ଼ିବ । ଏହା କିପରି ଅଧିକ ନ ବ୍ୟାପିବ, ସେଥିପ୍ରତି ଦୃଷ୍ଟି ଦେବାକୁ ହେବ ।