ବିଜେଡିରୁ ବହିଷ୍କାର ହେଲେ ପୂର୍ବତନ ବିଧାୟକ ରାଜେନ୍ଦ୍ର ଦାସ। ବିଷ୍ଣୁଙ୍କ ଶ୍ରଦ୍ଧାଞ୍ଜଳି ଦିବସ ପାଳନ କରି ଅନୁକମ୍ପା ଭୋଟ ହାତେଇବାକୁ ବିଜେପିର ପ୍ରୟାସ।
କନକ ବ୍ୟୁରୋ: ପ୍ରଥମେ ଅସନ୍ତୋଷ , ପରେ ବିଦ୍ରୋହ, ଆଉ ତାପରେ ସ୍ୱାଧୀନ ପ୍ରାର୍ଥୀ ହେବା ରାଜୁ ଦାସଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି । ଅନେକ ମାନଭଞ୍ଜନ ପରେ ରାଜୁ ନ ମାନିବାରୁ ଶେଷରେ ଦଳରୁ ବହିଷ୍କାର କରିଛି ବିଜେଡି । ରାଜୁଙ୍କ ସହ ଦୀର୍ଘ ବର୍ଷର ସମ୍ପର୍କ ଛିନ୍ନ କରି ବିଜେଡି କହିଛି ଦଳ ବିରୋଧୀ କାର୍ଯ୍ୟ ପାଇଁ ବିଜେଡିରୁ ରାଜୁଙ୍କୁ ଆଉଟ କରାଯାଇଛି । ଭୁବନେଶ୍ୱରରେ କାର୍ଯ୍ୟାନୁଷ୍ଠାନ ହୋଇଥିବାବେଳେ ଧାମନଗରରେ ଶକ୍ତି ପ୍ରଦର୍ଶନ କରିଛନ୍ତି ରାଜୁ । ନିଜ ସମର୍ଥକଙ୍କୁ ଧରି ବିଭିନ୍ନ ପଞ୍ଚାୟତରେ ମାରାଥନ ପ୍ରଚାର କରିଛନ୍ତି ସ୍ୱାଧୀନ ପ୍ରାର୍ଥୀ । ସବୁବର୍ଗର ଭୋଟରଙ୍କୁ ଆକୃଷ୍ଟ କରିବା ପାଇଁ ମନ୍ଦିରରୁ ମସଜିଦ ବୁଲୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଧାମନଗରରେ ବିଜେଡି ରାଜନୀତି ଗୋଳିଆ ହୋଇଥିବାବେଳେ ଅନୁକମ୍ପା ଭୋଟ ସହୟତାରେ ଗଡ ବଞ୍ଚାଇବାକୁ ଉଦ୍ୟମକୁ ଜୋରଦାର କରିଛି ବିଜେପି । ତିହିଡି ଓ ଧାମନଗରରେ ଦିବଙ୍ଗତ ନେତା ବିଷ୍ଣୁସେଠୀଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି ନେତା । ପ୍ରତ୍ୟେକ ପଞ୍ଚାୟତରେ ଦଳର ବିଧାୟକ ଓ ନେତା ଉପସ୍ଥିତ ରହି ବିଷ୍ଣୁଙ୍କ ପୁଅ ସୂରଜଙ୍କ ପାଇଁ ପରୋକ୍ଷରେ ଭୋଟ ମାଗିଛନ୍ତି ।
ବିଜେଡି ଓ ବିଡେପିକୁ ଟକ୍କର ଦେବାକୁ କଂଗ୍ରେସ ମଧ୍ୟ ମୈଦାନକୁ ଓହ୍ଲାଇଛି । ବାବା ହରେକୃଷ୍ଣ ସେଠୀଙ୍କ ପାଇଁ ଭୋଟ ମାଗିଛନ୍ତି ରାଜ୍ୟସ୍ତରୀୟ ନେତା । ଧାମନଗର ଉପନିର୍ବାଚନ ବାଜି ଜିତିବା ପାଇଁ ସବୁ ଦଳ କସରତ ଆରମ୍ଭ କରିସାରିଲେଣି । ଆଗକୁ କେନ୍ଦ୍ରମନ୍ତ୍ରୀଙ୍କ ସହ ବହୁ ବଡ ନେତା ମୈଦାନକୁ ଓହ୍ଲାଇ ଧାମନଗର ରାଜନୀତିକୁ ସରଗରମ କରିବେ ।