‘ଇଲେକଟ୍ରିକ୍ କାର’ର ସତ କଣ ? ପରିବେଶ ପାଇଁ ଏହା ଅନୁକୂଳ ନା ନାହିଁ ପଢନ୍ତୁ …
କନକ ବ୍ୟୁରୋ: ଚାରିଆଡେ ବର୍ତ୍ତମାନ ଇଲେକଟ୍ରିକ କାରକୁ ନେଇ ଚର୍ଚ୍ଚା ହେଉଛି । କେନ୍ଦ୍ର ସରକାର ମଧ୍ୟ ଏହାକୁ ଗୁରୁତ୍ୱ ଦେଉଛନ୍ତି । ତେବେ ଏହାର ସତ କଣ ଆପଣ ଜାଣିଛନ୍ତି କି? ତେବେ ସୂଚନା ଅନୁସାରେ ଇଲେକଟ୍ରିକ କାରକୁ ଆମେ ଯେତେ ପରିବେଶ ପାଇଁ ଭଲ ଭାବୁଛେ ତାହା ସେତ ଭଲ ନୁହେଁ । ସୋସାଇଟି ଅଫ୍ ରେୟର ଆର୍ଥର ତଥ୍ୟ ଅନୁସାରେ, ଗୋଟିଏ ଇଲେକଟ୍ରିକ କାର ତିଆରି ପାଇଁ ୫୭ କିଲୋ କଞ୍ଚାମାଲ ଦରକାର ହୋଇଥାଏ । ଏଥିରେ ୮ କିଲୋ ଲିଥିୟମ, ୩୫ କିଲୋ ନିକେଲ, ୧୪ କିଲୋ କୋବାଲ୍ଟ ବ୍ୟବହାର ହୋଇଥାଏ । ସେହିଭଳି ମାଟିତଳୁ ୪, ୨୭୫ ଏସିଡ ଆବର୍ଜନା ବାହାର କରିବା ପାଇଁ ୫୭ କିଲୋ ରେଡିଓଆକ୍ଟିଭ ଅବଶେଷ ଦରକାର ହୋଇଥାଏ । ଇଭି ତିଆରି ପାଇଁ ୯ ଟନ କାର୍ବନ ବାହାରିଥାଏ ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ ଇଲେକଟ୍ରିକ କାର ତିଆରି ବେଳେ ୧୩ ହଜାର ୫୦୦ ଲିଟର ପାଣିର ବ୍ୟବହାର ହୋଇଥାଏ । ଅନ୍ୟପଟେ ପେଟ୍ରୋଲ କାର ତିଆରିରେ ମାତ୍ର ୪ ହଜାର ଲିଟର ପାଣି ଆବଶ୍ୟକ ହୋଇଥାଏ । ରିକାର୍ଡୋ କନସଲଟେନ୍ସି ଅନୁସାରେ, ଯଦି ଇଭିକୁ କୋଇଲାରୁ ଉତ୍ପାଦିତ ହେଉଥିବା ବିଜୁଳୀରେ ଚାର୍ଜ କରାଯାଏ ତେବେ ଦେଢଲକ୍ଷ କିଲୋମିଟର ଚାଲିବା ପରେ ଏଥିରୁ ପେଟ୍ରୋଲ ତୁଳନାରେ ୨୦ ପ୍ରତିଶତ କମ ଅଙ୍ଗାରକାମ୍ଳ ବାହାରିଥାଏ । ଭାରତରେ ୭୦ ପ୍ରତିଶତ ବିଜୁଳି କୋଇଲାରୁ ଉତ୍ପାଦନ ହୋଇଥାଏ । ସେହିଭଳି ଅଷ୍ଟ୍ରେଲିଆରେ ହୋଇଥିବା ରିସର୍ଚ୍ଚରୁ ଜଣାପଡିଛି, ୩୩ଶହ ଟନ ଲିଥିୟମ ଆବର୍ଜନାରୁ ମାତ୍ର ୨ ପ୍ରତିଶତ ରିସାଇକେଲ ବା ପୁଃନଚକ୍ରଣ ହୋଇଥାଏ । ବାକି ୯୮ ପ୍ରତିଶତରେ ପ୍ରଦୂଷଣ ବ୍ୟାପିଥାଏ ।
ଏରିଜୋନା ବିଶ୍ୱବିଦ୍ୟାଳୟର ଇକୋଲୋଜି ବିଭାଗର ପ୍ରଫେସର ଗାଇ ମ୍ୟାକଫ୍ରକ୍ସନ କହିଛନ୍ତି, ଲିଥିୟମ ଦୁନିଆର ସବୁଠାରୁ ହାଲକା ପଦାର୍ଥ । ଏହା ବହୁତ ସହଜରେ ଇଲେକଟ୍ରୋନ ଛାଡିଥାଏ । ଏହି କାରଣରୁ ଇଭିର ବ୍ୟାଟେରୀରେ ଏହାର ବ୍ୟବହାର ସବୁଠାରୁ ଅଧିକ ହୋଇଥାଏ । ସବୁଜ ତୈଳ ଭାବେ ଲିଥିୟମକୁ ମହିମାମଣ୍ଡନ କରାଯାଉଛି । କିନ୍ତୁ ମାଟିରୁ ବାହାରିବା ଯୋଗୁ ପରିବେଶ ୩ ଗୁଣ ଅଧିକ ବିଶାକ୍ତ ହୋଇଥାଏ । ଲିଥିୟମର ୯୮.୩ ପ୍ରତିଶତ ବ୍ୟାଟେରୀ ବ୍ୟବହାର ପରେ ମାଟିତଳେ ପୋତିଦିଆଯାଇଥାଏ । ପାଣିର ସମ୍ପର୍କରେ ଆସିବା ପରେ ଏଥିରେ ପ୍ରତିକ୍ରିୟା ଦେଖାଯାଇଥାଏ ଯେଉଁଥିରେ କି ନିଆଁ ମଧ୍ୟ ଲାଗିଯାଏ ।
ସେ ଆହୁରି ମଧ୍ୟ କହିଛନ୍ତି ଆମେରିକାର ଫ୍ୟାସିଫିକ ନର୍ଥୱେଷ୍ଟର ଗୋଟିଏ ଗାତରେ ୨୦୧୭ ଜୁନରୁ ୨୦୨୦ ଡିସେମ୍ବର ମଧ୍ୟରେ ବ୍ୟାଟେରୀରେ ନିଆଁ ଲାଗିବାର ୧୨୪ଟି ଘଟଣା ସାମ୍ନାକୁ ଆସିଛି । କେବଳ ଏତିକି ନୁହେଁ ଜର୍ମାନୀରେ ଆଇଏଫଓ ଥିଙ୍କ ଟ୍ୟାଙ୍କ ଦ୍ୱାରା ରିସର୍ଚ୍ଚ ଅନୁସାରେ ମର୍ସିଡିଜର ସି ୨୨୦ ଟି ସେଡାନ ପ୍ରତି କିଲୋମିଟର ପିଛା ୧୪୧ ଗ୍ରାମର ଅଙ୍ଗାରକାମ୍ଳ ଛାଡିଥାଏ । ସେହିଭଳି ଟେସଲା ମଡେଲ ୩ ୧୮୧ ଗ୍ରାମର ଅଙ୍ଗାରକାମ୍ଳ ଛାଡିଥାଏ ।
ବିଶ୍ୱରେ ପ୍ରାୟ ୨ ଶହ କୋଟି ବାହନ ଅଛନ୍ତି । ଏଥିରୁ ମାତ୍ର ୧ କୋଟି ଇଲେକଟ୍ରିକ ବାହନ । ଯଦି ସମସ୍ତ ଗାଡିକୁ ଇଭିରେ ପରିବର୍ତ୍ତନ କରାଯାଏ ତେବେ ତାକୁ ତିଆରି ପାଇଁ ଯେଉଁ ଏସିଡ ଆବର୍ଜନା ବାହାରିବ ସେଥିପାଇଁ ପର୍ଯ୍ୟାପ୍ତ ସାଧନ ନାହିଁ । ତେଣୁ ପବ୍ଲିକ ଟ୍ରାନସପୋର୍ଟ ବଢାଇ ବ୍ୟକ୍ତିଗତ ଗାଡି ସଂଖ୍ୟା କମାଇଲେ ସବୁଜ ଗ୍ୟାସକୁ କମ କରାଯାଇପାରିବ । ପେଟ୍ରୋଲ କାର କିଲୋମିଟର ପ୍ରତି ୧୨୫ ଗ୍ରାମ ଏବଂ କୋଇଲାରୁ ବାହାରୁ ଥିବା ବିଦ୍ୟୁତରେ ଚାର୍ଜ ହେଉଥିବା ଇଲେକଟ୍ରିକ କାର ପ୍ରତି କିମି ୯୧ ଗ୍ରାମ ଅଙ୍ଗାରକାମ୍ଳ ସୃଷ୍ଟି କରିଥାଏ । ୟୁରୋପରେ ଇଭି ୬୯ ପ୍ରତିଶତ କମ ଅଙ୍ଗାରକାମ୍ଳ ବାହାରିଥାଏ କାରଣ ଏଠାରେ ୬୦ ପ୍ରତିଶତ ବିଜୁଳୀ ଅକ୍ଷୟ ଉର୍ଜାରୁ ସୃଷ୍ଟି ହୋଇଥାଏ ।
କେନ୍ଦ୍ର ସରକାର ଲକ୍ଷ ରଖିଛନ୍ତି ୨୦୩୦ ଯାଏ ୭୦ ପ୍ରତିଶତ କମର୍ସିଆଲ କାର, ୩୦ ପ୍ରତିଶତ ବ୍ୟକ୍ତିଗତ କାର, ୪୦ ପ୍ରତିଶତ ଦୁଇଚକିଆ ଯାନ ଏବଂ ୮୦ ପ୍ରତିଶତ ତିନିଚକିଆ ଯାନକୁ ଇଲେକଟ୍ରିକ କରିବା ପାଇଁ ଚାହୁଁଛନ୍ତି । ସେହିଭଳି ୨୦୨୩ ଯାଏ ୪୪.୭ ପ୍ରତିଶତ ବିଜୁଳୀ ଅକ୍ଷୟ ଉର୍ଜାରୁ ସୃଷ୍ଟି କରିବା ପାଇଁ ଲକ୍ଷ୍ୟ ରଖାଯାଇଛି ।