ଯାଜପୁର କୋରେଇ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ସାଂଘାତିକ ଅନିୟମିତତା : ଜାଳି ଦେଲେ ଶହ ଶହ କରୋନା ଟେଷ୍ଟ କିଟ୍
ପରୀକ୍ଷା ନକରି ସାର୍ଟିଫିକେଟ୍ ଦିଆଯାଉଥିବା ଅଭିଯୋଗ
କନକ ବ୍ୟୁରୋ : ଯାଜପୁର ଜିଲ୍ଲା କୋରେଇ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ସାଙ୍ଘାତିକ ଅନିୟମିତତା ଦେଖିବାକୁ ମିଳିଛି । ଏହି ଡାକ୍ତରଖାନାକୁ ଆସିଥିବା ଶହ ଶହ କରୋନା ଟେଷ୍ଟ କିଟକୁ ବ୍ୟବହାର ନ କରି ପୋଡିଦିଆଯାଇଛି । ମାସ ମାସ ଧରି ଏଠାରେ ଏଭଳି କାରନାମା ଚାଲିଥିବା ଅଭିଯୋଗ ହୋଇଛି । ପରୀକ୍ଷା ନ କରି ସାର୍ଟିଫିକେଟ ଦିଆଯାଉଥିବା ଅଭିଯୋଗ ଆସୁଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ସୋମବାର ଅପରାହ୍ନରେ କୋରେଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପଛରେ କରୋନା କିଟ୍ ପୋଡ଼ା ଯାଉଥିବା ଖବର ମିଳିଥିଲା । ଘଟଣାସ୍ଥଳରେ ଉପସ୍ଥିତ ଡାକ୍ତରଖାନା କର୍ମଚାରୀଙ୍କୁ ପଚରାଉଚରା କରିଥିଲେ ମଧ୍ୟ ସେ କୌଣସି ଉତ୍ତର ଦେଇନଥିଲେ । ଏପରିକି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ମଧ୍ୟ କୌଣସି ପ୍ରତିକ୍ରିୟା ନଦେଇ କାର୍ଯ୍ୟାଳୟରେ ତାଲା ବନ୍ଦକରି ଭିତରେ ବସି ରହିଥିଲେ । ଏହାକୁ ନେଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସରରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା ।
ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, କୋରେଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କରୋନା ପରୀକ୍ଷା ହେଉନଥିବା କହି ଡାକ୍ତରଖାନା କର୍ତ୍ତୃପକ୍ଷ କିଛିଦିନ ହେଲା ଲୋକଙ୍କୁ ଫେରାଇ ଦେଉଥିଲେ । ପରେ ଜିଲ୍ଲା ସ୍ବାସ୍ଥ୍ୟ ବିଭାଗର ହସ୍ତକ୍ଷେପ ପରେ ଏଠାରେ କରୋନା ପରୀକ୍ଷା ପାଇଁ ତାରିଖ ପ୍ରକାଶ ପାଇଥିଲା । ଏହାପରେ ରାତିଅଧରୁ ଲୋକମାନେ ଡାକ୍ତରଖାନା ପରିସରରେ ଧାଡ଼ିରେ ବସି ରହୁଥିଲେ । ହେଲେ ମାତ୍ର କେଇଘଣ୍ଟା ମଧ୍ୟରେ ଟେଷ୍ଟ କିଟ୍ ସରିଯାଉଥିବା କହି ଡାକ୍ତରଖାନା କର୍ତ୍ତୃପକ୍ଷ ଲୋକଙ୍କୁ ଫେରାଇ ଦେଉଥିଲେ । ଅନ୍ୟପକ୍ଷରେ କିଛିଦିନ ହେଲା ବିନା ପରୀକ୍ଷାରେ ଲୋକମାନଙ୍କୁ ପରୀକ୍ଷାର ପ୍ରମାଣପତ୍ର ଦିଆଯାଉଥିବା ଅଭିଯୋଗ ହୋଇଛି । ଏପରି ସ୍ଥିତିରେ ବଳି ପଡ଼ୁଥିବା କିଟ୍କୁ ଲୋକଙ୍କ ଦୃଷ୍ଟି ଆଢ଼ୁଆଳରେ ପୋଡ଼ି ପାଉଁଶ କରିଦିଆଯାଉଛି ।
ଏସମ୍ପର୍କରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କ ମତାମତ ପାଇଁ ଉଦ୍ୟମ କରାଯାଇଥିଲେ ମଧ୍ୟ ସମ୍ଭବ ହୋଇନଥିଲା । ଅନ୍ୟପକ୍ଷରେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ବିରଞ୍ଚି ନାରାୟଣ ବାରିକଙ୍କୁ ପଚାରିବାରୁ, ଏହା ଏକ ଜଘନ୍ୟ ଘଟଣା । ଅଭିଯୋଗ ସତ ହୋଇଥିଲେ ସମ୍ପୃକ୍ତ ଅଧିକାରୀ ଓ କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ।