କନକ ବ୍ୟୁରୋ : ରୋଜଭ୍ୟାଲିକୁ ସହାୟତା କରୁଥିଲେ ନବୀନ ସରକାର । ଏଭଳି ସଂଗୀନ ଅଭିଯୋଗ ଆଣିଛନ୍ତି ବିରୋଧୀ । ଜଣେ ମନ୍ତ୍ରୀ ରୋଜଭ୍ୟାଲି ମୁଖ୍ୟ ଗୌତମ କୁଣ୍ଡୁଙ୍କୁ ଆଣି ମୁଖ୍ୟମନ୍ତ୍ରୀଙ୍କ ସହ ଭେଟ କରାଇଥିଲେ ବୋଲି ଅଭିଯୋଗ କରିଛି ରାଜ୍ୟ ବିଜେପି । ସେପଟେ ଚିଟଫଣ୍ଡ ସଂସ୍ଥାର ମିଡିଆ ହାଉସ ପାଇଁ ବିଜେଡି ବିଧାୟକ ଦେବାଶିଷ ସାମନ୍ତରାୟ ମଧ୍ୟସ୍ଥତା କରୁଥିଲେ ବିଲୋ କଂଗ୍ରେସ କହିଛି ।
Kanak News is now on WhatsApp
Join and get latest news updates delivered to you via WhatsApp
ରୋଜଭ୍ୟାଲି ମାମଲାରେ ସିବିଆଇ ତନାଘନା ଚଳାଇଥିବାବେଳେ ଏକ ଫଟୋକୁ ନେଇ ଚର୍ଚ୍ଚା ଜୋର ଧରିଛି ,ଯେଉଁଠି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଗୋଟିଏ ଫ୍ରେମରେ ଅଛନ୍ତି ରୋଜଭ୍ୟାଲି ଚିଟଫଣ୍ଡ ସଂସ୍ଥାର କିଛି ବରିଷ୍ଠ କାର୍ଯ୍ୟକର୍ତା । ୨୦୧୫ ମାର୍ଚ୍ଚ ୪ ତାରିଖରେ ରୋଜଭ୍ୟାଲି କାର୍ଯ୍ୟାଳୟରେ ଚଢାଉବେଳେ ସବିଆଇକୁ ଏହି ଫଟୋ ମିଳିଥିବା କୁହାଯାଉଛି ।
ଆଉ ଏହାକୁ ଆଧାର କରି ମୁଖ୍ୟମନ୍ତ୍ରୀଙ୍କ ଆଡକୁ ଅଙ୍ଗୁଳି ଉଠାଇଛି ରାଜ୍ୟ ବିଜେପି । ଜଣେ ମନ୍ତ୍ରୀ, ରୋଜଭ୍ୟାଲି ମୁଖ୍ୟ ଗୌତମ କୁଣ୍ଡୁଙ୍କୁ ମୁଖ୍ୟମନ୍ତ୍ରୀଙ୍କ ସହ ଭେଟ କରାଇଥିଲେ ବୋଲି ଅଭିଯୋଗ କରିଛି ଦଳ । ଏଥିସହ ଜଣେ ବିଜେଡି ବିଧାୟକ ମଧ୍ୟ ମିଡିଆ ହାଉସ କରିବା ଲାଗି ରୋଜଭ୍ୟାଲି ସଂସ୍ଥାକୁ ସହଯୋଗ କରିଥିବା ଦଳ କହିଛି ।
ପ୍ରଶ୍ନ ଉଠୁଛି ସେହି ମନ୍ତ୍ରୀ ଜଣକ କିଏ ? ସେ ମନ୍ତ୍ରୀଙ୍କ ସହ ରୋଜଭ୍ୟାଲିର କଣ ସଂପର୍କ ରହିଛି? ଏବଂ କେଉଁ ବିଧାୟକ ରୋଜଭ୍ୟାଲି ଚିଟଫଣ୍ଡ ସଂସ୍ଥାର ମିଡିଆ ହାଉସ ପାଇଁ ମଧ୍ୟସ୍ଥତା କରୁଥିଲେ । ଯଦି ବିଜେପି ନିକଟରେ ଏ ତଥ୍ୟ ରହିଛି, ତାହେଲେ କେନ୍ଦ୍ରୀୟ ତଦନ୍ତକାରୀ ସଂସ୍ଥାକୁ ଦଳ ଦେଉନାହିଁ କାହିଁକି?
ସେପଟେ ଆଉପାଦେ ଆଗେଇ ଯାଇ ସିଧାସଳଖ କଟକ-ବାରବାଟୀର ବିଜେଡି ବିଧାୟକ ଦେବାଶିଷ ସାମନ୍ତରାୟଙ୍କୁ ଟାର୍ଗେଟ କରିିଛି କଂଗ୍ରେସ । ରୋଜଭ୍ୟାଲି ପାଇଁ ଦେବାଶିଷ ମଧ୍ୟସ୍ଥତା କରୁଥିଲେ ବୋଲି ଗୁରୁତର ଅଭିଯୋଗ ଆଣିଛନ୍ତି କଟକ ନଗର କଂଗ୍ରେସ ସଭାପତି ମହମ୍ମଦ ମୋକିମ୍ । ଯାହାକୁ ଅସ୍ୱୀକାର କରିଛନ୍ତି ଦେବାଶିଷ ।
ବିମୁଦ୍ରାୟନ ପ୍ରସଙ୍ଗରେ ମୋଦି ସରକାରଙ୍କୁ ବିରୋଧ କରି ଫସିଗଲେ ଟିଏମସି ସାଂସଦ । ଦୁଇ ହେଭି ୱେଟଙ୍କୁ ଗିରଫ କରିସାରିଛି ସିବିଆଇ । ଆଉ ଏବେ ଆସିଛି ନବୀନ ସରକାରଙ୍କ ଜଣେ ମନ୍ତ୍ରୀଙ୍କ କଥା । ଏହି ଅଭିଯୋଗ ପରେ ସଂପୃକ୍ତ ମନ୍ତ୍ରୀଙ୍କୁ ସିବିଆଇ ହାତ ମାରିବ ନା ଛାଡିଦେବ।