ରାଜ୍ୟ ସରକାରଙ୍କୁ ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କ ଟାର୍ଗେଟ୍: କର୍ମୀଙ୍କ ଜରିଆରେ ଜନତା ମୈଦାନରୁ ଜନତାଙ୍କୁ ବାର୍ତ୍ତା
କନକ ବ୍ୟୁରୋ: ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଓଡିଶା ଗସ୍ତକୁ ଏକ ଉତ୍ସବ ଭଳି ପାଳନ କରିଛି ଦଳ । ସର୍ବୋଚ୍ଚ ନେତାଙ୍କୁ ସ୍ୱାଗତ ପାଇଁ ଜୋରଦାର ପ୍ରସ୍ତୁତି କରାଯାଇଥିଲା । ପାରମ୍ପରିକ ନାଚ,ଗୀତ ଭିତରେ କର୍ମୀଙ୍କ ଜୋଶ ବେସ ବାରି ହୋଇପଡୁଥିଲା । ଶକ୍ତିକେନ୍ଦ୍ର କର୍ମକର୍ତାଙ୍କୁ ଗୁରୁମନ୍ତ୍ର ଦେବାପାଇଁ ଦିଲ୍ଲୀରୁ ଛୁଟି ଆସିଛନ୍ତି ଜଗତ ପ୍ରକାଶ ନଡ୍ଡା । ଏକ ବିଶାଳ ବାଇକ ରାଲିରେ ସିଧା ଯାଇଥିଲେ ଭୁବନେଶ୍ୱର ରାଜ୍ୟ କାର୍ଯ୍ୟାଳୟ । ସେଠାରୁ ଦଳର ତୁଙ୍ଗ ନେତା ଜନତା ମୈଦାନ ଯାଏଁ ପାଛୋଟି ନେଇଥିଲେ । ଦଳୀୟ କର୍ମୀଙ୍କୁ ସମ୍ବୋଧନ କଲାବେଳେ ରାଜ୍ୟ ସରକାରଙ୍କ ବିରୋଧରେ ବେଶ ଆକ୍ରମଣାତ୍ମକ ହୋଇଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରରେ ମୋଦୀ ସରକାରଙ୍କ ସଫଳତା କଥା କହି ଶକ୍ତିକେନ୍ଦ୍ର କର୍ମକର୍ତାଙ୍କ ଭିତରେ ଆଗାମୀ ନିର୍ବାଚନରେ ଜୋରଦାର ଲଢେଇ ପାଇଁ ଜୋଶ ଭରିଛନ୍ତି ଜେପି ନଡ୍ଡା । ଆଉ ଏତିକିବେଳେ ରାଜ୍ୟ ସରକାରଙ୍କ ଦୁର୍ନୀତି, କୁ-ଶାସନ ଓ ଅପାରଗତା କଥା କହି ଜୋରଦାର ଆକ୍ରମଣ କରିଛନ୍ତି । ହତ୍ୟାକାଣ୍ଡରେ ମନ୍ତ୍ରୀଙ୍କ ସଂପୃକ୍ତି ଅଭିଯୋଗରୁ ଆରମ୍ଭ କରି ଶ୍ରୀମନ୍ଦିର ରତ୍ନଭଣ୍ଡାର ସୁରକ୍ଷା ପ୍ରସଙ୍ଗ ବି ଉଠାଇଛନ୍ତି ।
ରାଜ୍ୟ ସରକାରଙ୍କ ଦୋଷ ଦୁର୍ବଳତା ଗଣାଇବାବେଳେ ଆଗାମୀ ନିର୍ବାଚନରେ ଡବଲ ଇଂଜିନ ସରକାର ଆଣିବାକୁ ସେ ଆହ୍ୱାନ ଦେଇଛନ୍ତି । ଆଉ ରାଷ୍ଟ୍ରୀୟ ଅଧ୍ୟକ୍ଷଙ୍କ କଥାରେ ସ୍ୱର ମିଳାଇ ବିଜେଡି ସରକାରକୁ ବଙ୍ଗୋପସାଗରରେ ଫିଙ୍ଗିଦେବାକୁ ଦମ୍ଭ ଦେଖାଇଛନ୍ତି ବିରୋଧୀ ଦଳ ନେତା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସ୍ୱର ମଧ୍ୟ ବେଶ ଶାଣିତ ହୋଇଛି ।
ସମାନ ଦିନରେ ବରମୁଣ୍ଡା ପଡିଆରେ ବିଜେଡିର କାର୍ଯ୍ୟକ୍ରମକୁ ଟାର୍ଗେଟ କରିଛନ୍ତି ଭୁବନେଶ୍ୱର ସାଂସଦ । ୨୦ ବର୍ଷରୁ ଅଧିକ ଦିନ ଶାସନରେ ରହିବା ପରେ ବିରୋଧୀଙ୍କୁ ଏତେ ଭୟ କାହିଁକି ବୋଲି ପ୍ରଶ୍ନ କରିଛନ୍ତି ଅପରାଜିତା ଷଡଙ୍ଗୀ ।
ଓଡିଶାକୁ ଆସି ଓଡିଆଙ୍କ କଥା କହି ଭାବାବେଗକୁ ଉସୁକାଇବାକୁ ଚେଷ୍ଟା କରିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ । ଦ୍ରୌପଦୀ ମୁର୍ମୁଙ୍କୁ କିଭଳି ମୋଦୀ ସରକାର ଦେଶର ସର୍ବୋଚ୍ଚ ସାମ୍ବିଧାନିକ ପଦବୀରେ ବସାଇଛନ୍ତି ସେହି କଥା କହିଛନ୍ତି । ଆୟୁଷମାନ ଭାରତରେ ସାମିଲ ନହୋଇ ରାଜ୍ୟର ୬୦ ଲକ୍ଷ ପରିବାରକୁ ସ୍ୱାସ୍ଥ୍ୟ ସେବାରୁ ବଂଚିତ ରଖାଯାଉଥିବା ଅଭିଯୋଗ କରିଛନ୍ତି । ପ୍ରସଙ୍ଗ ଭିତିରେ ଭୋଟରଙ୍କୁ ପ୍ରଭାବିତ କରିବା ପାଇଁ ଦଳୀୟ ନେତା ଓ କର୍ମୀଙ୍କୁ ଗୁରୁମନ୍ତ୍ର ଦେଇଛନ୍ତି ଜେପି ନଡ୍ଡା ।