ଚାଷୀ ପ୍ରସଙ୍ଗରେ ଫେରାଦ ହେବାକୁ ରାଜଭବନରେ ବିଜେଡି ବିଧାୟକ: ଏମଏସପିକୁ ନେଇ ରାଜ୍ୟପାଳଙ୍କୁ ଦାବିପତ୍ର
କନକ ବ୍ୟୁରୋ: ଗୃହ କାର୍ଯ୍ୟ ଆରମ୍ଭ ହେଉ ହେଉ ଚାଷୀ ପ୍ରସଙ୍ଗରେ ମଧ୍ୟଭାଗକୁ ଆସି ହୋହାଲା କରିଥିଲେ ପ୍ରାୟ ସବୁ ଦଳର ବିଧାୟକ । ଏମଏସପି ଦର ବୃଦ୍ଧି ଦାବିରେ ଶାସକ ଦଳର ବିଧାୟକମାନେ ହୋହାଲା କରିଥିବାବେଳେ ବିଜେପି ଓ କଂଗ୍ରେସ ସଦସ୍ୟମାନେ ଫସଲ ବୀମା, ଇନପୁଟ ସବସିଡି ପ୍ରସଂଗ ଉଠାଇ ନାରାବାଜି କରିଥିଲେ । ବିଧାୟକମାନଙ୍କ ହଟଗୋଳ ଯୋଗୁଁ ଦିନ ତମାମ ଚାଲି ପାରିନଥିଲା ବିଧାନସଭା । ହୋହଲା ଭିତରେ ମାତ୍ର ୧୨ମିନିଟ ଚାଲିଥିଲା ଗୃହ କାର୍ଯ୍ୟ ।
Kanak News is now on WhatsApp
Join and get latest news updates delivered to you via WhatsApp
ପଦ୍ମପୁର ଉପନିର୍ବାଚନରେ ଚାଷୀଙ୍କୁ ଫସଲ ବୀମା ନମିଳିବା, ଇନପୁଟ ସବସିଡି ନମିଳିବା, ପ୍ରମୁଖ ପ୍ରସଙ୍ଗ ପାଲଟିଥିବାବେଳେ ବିଧାନସଭା ବାହାରେ ଦେଖିବାକୁ ମିଳିଥିଲା ଏମିତି ଦୃଶ୍ୟ । ଚାଷୀଙ୍କ ପାଇଁ ପ୍ରମୁଖ ଦୁଇ ରାଜନୈତିକ ଦଳ ବିଜେଡି ଓ ବିଜେପି ପଦଯାତ୍ରା କରି ଦାବି ରଖିଥିଲେ । ଏମଏସବି ବୃଦ୍ଧି ଦାବିରେ ବିଜେଡି ବିଧାୟକମାନେ ବିଧାନସଭାରୁ ରାଜଭବନ ପର୍ଯ୍ୟନ୍ତ ପଦଯାତ୍ରା କରିବା ସହ ରାଜ୍ୟପାଳଙ୍କୁ ଦାବିପତ୍ର ଦେଇଥିଲେ । ସେହିପରି ବିଜେପି ସଦସ୍ୟମାନେ ବିଧାନସଭାରୁ ଲୋୟର ପିଏମଜିରେ ଚାଲିଥିବା ସତ୍ୟାଗ୍ରହ ସ୍ଥଳ ପର୍ଯ୍ୟନ୍ତ ପଦଯାତ୍ରା କରିଥିଲେ । ଦୃଶ୍ୟ ଦେଖିଲେ ଲାଗୁଥିଲା, ଉଭୟ ଦଳ ଦେଖାଇବାକୁ ଚାହିଁଥିଲେ ଚାଷୀଙ୍କ ପ୍ରତି ଥିବା ସେମାନଙ୍କ ଦରଦ । ଯାହାକୁ ସମାଲୋଚନା କରିଛି କଂଗ୍ରେସ ।
ଚାଷୀ ପ୍ରସଙ୍ଗକୁ ଆଳ କରି ବିଧାୟକମାନେ ବିଧାନସଭା ଚଳାଇ ନଦେବା ଅନେକ ପ୍ରଶ୍ନ ବାଚୀ ସୃଷ୍ଟି କରିଛି । ପ୍ରଶ୍ନ ଉଠୁଛି, ପ୍ରକୃତରେ ଚାଷୀ ପାଇଁ କାନ୍ଦୁଛି କିଏ? ଯଦି କେନ୍ଦ୍ରରେ କ୍ଷମତାଶୀନ ଥିବା ବିଜେପି ଓ ରାଜ୍ୟରେ ଶାସନରେ ଥିବା ବିଜେଡି ଚାଷୀଙ୍କ ଉନ୍ନତି ଚାହୁଁଛନ୍ତି ତାହେଲେ କିଏ ଦେଉଛି ବାଧା? ବିଧାନସଭା ଅଚଳ କରି କି ବାର୍ତ୍ତା ଦେବାକୁ ଚାହୁଁଛନ୍ତି ବିଧାୟକ?