ଜେଲ ଗଲେ ମାକ୍ସିପିନ୍ଧା ଲୁଟେରା ଓ ସହଯୋଗୀ । ପଢନ୍ତୁ, କେମିତି ଓ କାହିଁକି କରିଥିଲେ ଡକାୟତି ଯୋଜନା…
କନକ ବ୍ୟୁରୋ: ରାଜଧାନୀର ଶୈଳଶ୍ରୀ ବିହାର ଅଞ୍ଚଳରେ ଛୁରାମାଡ ଘଟଣାରେ ଅଭିଯୁକ୍ତ ରୂପେଶ ପଣ୍ଡା ଓ ସଂଜୟ ପଣ୍ଡାଙ୍କୁ ଜେଲ ପଠାଇ ଦେଇଛି କମିଶନରେଟ ପୋଲିସ । ଆଉ ଏହି ଘଟଣା ପରେ ମାଆ ଓ ଝିଅଙ୍କୁ ସମ୍ମାନିତ କରାଯାଇଛି । ତେବେ ଲୋନ ପାଇଁ ରୂପେଶ ଓ ସଂଜୟ ପଣ୍ଡାଙ୍କ ଏହି ଆକ୍ରମଣ ସେମାନଙ୍କୁ ଖୁବ ମହଙ୍ଗା ପଡିଛି । ତେବେ ପଢନ୍ତୁ, କେମିତି ଓ କାହିଁକି ଏହି ଆକ୍ରମଣ ଯୋଜନା କରିଥିଲେ ରୁପେଶ ପଣ୍ଡା…
Kanak News is now on WhatsApp
Join and get latest news updates delivered to you via WhatsApp
ଖେଳଣା ବନ୍ଧୁକ କିଣି ଭୁବନେଶ୍ୱର ଶୈଳେଶ୍ରୀ ବିହାରରେ ପଡୋଶୀଙ୍କୁ ଲୁଟିବାର ବ୍ଲୁ-ପ୍ରିଂଟ ପ୍ରସ୍ତୁତ କରିଥିଲେ ରୁପେଶ ପଣ୍ଡା । ଆଉ ବୁଦ୍ଧି ଦେଉଥିଲେ ସହଯୋଗୀ ସଂଜୟ । ଆଉ ଦୁହେଁ ମିଶି ବଡଧରଣ ଲୁଟ୍ ପାଇଁ ଯୋଜନା ବନାଉଥିଲେ । ଏଥିପାଇଁ ବାରମ୍ବାର ବଜାରକୁ ଯାଇ କିଣି ଆଣିଥିଲେ ଛୁରି, ଦଉଡି, ଖେଳଣା ବନ୍ଧୁକ, ସେଲୋ ଟେପ୍ ଓ ମହିଳା ପୋଷାକ । ରୁପେଶ ଓ ସଂଜୟ ଉଭୟ ଭୁବନେଶ୍ୱର ୧ ନମ୍ବର ମାର୍କେଟରୁ ଆରମ୍ଭ କରି ପଟିଆ ବଜାରରେ ଯେଉଁ ଦୋକାନରୁ ଏସବୁ ସାମଗ୍ରୀ କିଣାକିଣି କରିଥିଲେ ସେଗୁଡିକୁ ଚିହ୍ନଟ କରିସାରିଛି ପୋଲିସ । ଏପରିକି ସେମାନଙ୍କ ବୟାନକୁ ପ୍ରମାଣ ଆକାରରେ ବ୍ୟବହାର କରିବ କମିଶନରେଟେ ପୋଲିସ ।
ମାଆ, ଝିଅଙ୍କୁ ଆକ୍ରମଣ କରି ଲୁଟ ଉଦ୍ୟମ ଘଟଣାରେ ପୋଲିସ ଆଜି ଆଉ ଏକ ସୂଚନା ଦେଇଛି । ଗ୍ରାଫିକ୍ସ ଡିଜାଇନର ଭାବେ କାମ କରୁଥିବା ରୁପେଶ ବିଭିନ୍ନ ଆଡୁ କାମ ଧରି ଟଙ୍କା ଉଠାଇଥିଲେ । ହେଲେ କାମ ସାରିନପାରିବା ଓ ଟଙ୍କା ଫେରସ୍ତ ଦେବାରେ ଅସମର୍ଥ ହେଉଥିବାରୁ ପ୍ରବଳ ମାନସିକ ଚାପରେ ରହିଥିଲେ । ଯେଉଁଥିପାଇଁ ପଡୋଷୀଙ୍କୁ ଲୁଟି ରାତାରାତି ମାଲାମାଲ ହୋଇଯିବାର ନିଶା ତାଙ୍କୁ ଘାରିଥିଲା । ଆଉ ସେଇଥିପାଇଁ ସାଥୀ ସଂଜୟଙ୍କ ସହ ମିଶି କରିଥିଲେ ଏହି ଲୁଟ୍ ଯୋଜନା । ସଂଜୟ ଘଟଣାସ୍ଥଳକୁ ଆସିନଥିଲେ ବି ନିୟମିତ ଫୋନରେ ଯୋଗାଯୋଗ ରଖିଥିଲେ । ଆଜି ଦୁହିଁଙ୍କୁ କୋର୍ଟ ଚାଲାଣ କରି ଜେଲକୁ ପଠାଇ ଦିଆଯାଇଛି ।
ପୁରା ଫିଲ୍ମ ଶୈଳୀରେ ଲୁଟ ପାଇଁ ପ୍ରସ୍ତୁତ ହୋଇଥିଲା ବ୍ଲୁ-ପ୍ରିଂଟ୍ । ମହିଳା ବେଶରେ ଘରକୁ ପ୍ରବେଶ କରିବା ପରେ ଖେଳଣା ବନ୍ଧୁକ ଦେଖାଇ ସମସ୍ତଙ୍କୁ ଦଉଡିରେ ବାନ୍ଧି ପକାଇବା ସହ ମୁହଁରେ ସେଲୋଟେପ୍ ଦେଇ ଚୁପ କରି ଦେଇଥାନ୍ତେ ରୂପେଶ । ଆଉ ଟଙ୍କା, ପଇସା ଓ ସୁନା ଗହଣା ଲୁଟ କରି ଚମ୍ପଟ ମାରିଥାନ୍ତେ । ପୋଲିସ ଅଜଣା ଯୁବତୀଙ୍କ ପଛରେ ଲାଗିଥାନ୍ତା ଆଉ ପଡୋଶୀ ଘରେ ଥାଇ ରୂପେଶ ମଉଜ କରିଥାନ୍ତେ । ହେଲେ ମାଆ, ଝିଅଙ୍କ ସାହସିକତା ପାଇଁ ସବୁ ଯୋଜନା ପଣ୍ଡ ହୋଇଗଲା ବୋଲି ପୋଲିସ କହିଛି ।