ସାଂସଦ ପଦରୁ ଇସ୍ତଫା ଦେଲେ ବୈଜୟନ୍ତ! ବାପାଙ୍କ ଶୁଦ୍ଧିକ୍ରିୟା ପରେ ବାଚସ୍ପତିଙ୍କୁ ପଠାଇଲେ ଇସ୍ତଫା ପତ୍ର ।
କନକ ବ୍ୟୁରୋ : ସାଂସଦ ପଦରୁ ଇସ୍ତଫା ଦେଲେ ବୈଜୟନ୍ତ ପଣ୍ଡା । ଏନେଇ ଲୋକସଭା ବାଚସ୍ପତି ସୁମିତ୍ରା ମହାଜନଙ୍କୁ ଇସ୍ତଫାପତ୍ର ପଠାଇଥିବା ଟ୍ୱିଟ ଜରିଆରେ ଜଣାଇଛନ୍ତି ବୈଜୟନ୍ତ । ପୂର୍ବରୁ ବିଜେଡ଼ି ଦଳରୁ ଇସ୍ତଫା ଦେଇଥିବା କଥା ନବୀନଙ୍କୁ ଚିଠି ମାଧ୍ୟମରେ ଜଣାଇଥିଲେ ବୈଜୟନ୍ତ । ଏପରିକି ବାପାଙ୍କ ଶୁଦ୍ଧକ୍ରିୟା ପରେ ଲୋକସଭା ବାଚସ୍ପତିଙ୍କୁ ଇସ୍ତଫା ପତ୍ର ପଠାଇବା ପାଇଁ ନବୀନଙ୍କୁ ଚିଠି ମାଧ୍ୟମରେ ଜଣାଇଥିଲେ ବୋଲି କହିଛନ୍ତି ଜୟ ପଣ୍ଡା ।
Kanak News is now on WhatsApp
Join and get latest news updates delivered to you via WhatsApp
ବୈଜୟନ୍ତ ଟ୍ୱିଟ୍ କରି କହିଛନ୍ତି, ବାପାଙ୍କ ଶୁଦ୍ଧିକ୍ରିୟା ପରେ ମୁଁ ବାଚସ୍ପତିଙ୍କୁ ଭେଟିବା ପାଇଁ ଯାଇଥିଲେ ମଧ୍ୟ ସମ୍ଭବ ହୋଇପାରି ନାହିଁ । କାରଣ ଲୋକସଭା ବାଚସ୍ପତି ବିଦେଶଗସ୍ତରେ ଥିବାରୁ ତାଙ୍କ ସହିତ ସାକ୍ଷାତ କରିବା ସମ୍ଭବ ହୋଇ ନାହିଁ । ତେଣୁ ମୁଁ ବାଚସ୍ପତିଙ୍କ ନିକଟକୁ ଚିଠି ମାଧ୍ୟମରେ ମୋ ଇସ୍ତଫା ପତ୍ର ଦେଇଛି ।ଏହାପୂର୍ବରୁ ଗତ ମେ ୨୮ ତାରିଖ ଦିନ ବିଜୁ ଜନତା ଦଳରୁ ଇସ୍ତଫା ଦେଇଥିଲେ ବୈଜୟନ୍ତ ପଣ୍ଡା । ବିଜେଡ଼ି ସୁପ୍ରିମୋଙ୍କୁ ଏନେଇ ଚିଠି ମାଧ୍ୟମରେ ଅବଗତ କରିଥିଲେ ବୈଜୟନ୍ତ ।
ବୈଜୟନ୍ତଙ୍କ ବାପା ସ୍ୱର୍ଗତ ବଂଶୀଧର ପଣ୍ଡାଙ୍କୁ ଶେଷ ଦର୍ଶନ ପାଇଁ କୌଣସି ବିଜେଡି ନେତା ନ ଆସିବା ତାଙ୍କୁ ବେଶ ବାଧିଛି ବୋଲି ଚିଠିରେ ଉଲ୍ଲେଖ କରି କ୍ଷୋଭ ପ୍ରକାଶ କରିଥିଲେ ବୈଜୟନ୍ତ । ଏହାସହ ବିଜୁ ଜନତା ଦଳ ଗତ କିଛି ବର୍ଷ ଧରି ତାଙ୍କୁ ଅଣଦେଖା କରୁଛି ବୋଲି ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ଚିଠି ଜରିଆରେ ଜଣାଇଥିଲେ ବୈଜୟନ୍ତ । ପ୍ରଥମେ ଦଳରୁ ଇସ୍ତଫା ଏବେ ଲୋକସଭା ସାଂସଦ ଭାବେ ଇସ୍ତଫା ଦେଇ ବିଜେଡିକୁ ପୁରା ମନରୁ ପାସୋରି ଦେଇଥିବା ଏକ ପ୍ରକାର ସ୍ପଷ୍ଟ କରିଛନ୍ତି ବୈଜୟନ୍ତ । ତେବେ ବୈଜୟନ୍ତ ଆଗକୁ କେଉଁ ଦଳରେ ଯୋଗ ଦେବେ ତାହାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି ।