କନକ ବ୍ୟୁରୋ : ପେନସନ ଯୋଜନାକୁ ନେଇ ସୁପ୍ରିମକୋର୍ଟ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି । ୨୦୧୪ର ଏହି ଯୋଜନାକୁ ସର୍ବୋଚ୍ଚ ଅଦାଲତ ଆଇନସମ୍ମତ ଏବଂ ବୈଧ ବୋଲି କହିଛନ୍ତି । ଏହା ସହ ବୃହତ ସଂଖ୍ୟକ କର୍ମଚାରୀଙ୍କୁ ଆଶ୍ୱସ୍ତ ଦେଇ ନ୍ୟାୟାଳୟ କହିଛନ୍ତି ଯେ, ଯେଉଁମାନେ ଏହି ଯୋଜନାରେ ଅଦ୍ୟାବଧି ସାମିଲ ହେବାର ବିକଳ୍ପ ନେଇ ନାହାନ୍ତି ସେମାନଙ୍କୁ ଏଥିରେ ଯୋଗ ଦେବା ଲାଗି ଅଧିକ ୬ମାସ ସମୟ ଦିଆଯିବ ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ପେନସନ ସ୍କିମରେ ସାମିଲ ହେବା ନେଇ ମାସିକ ବେତନ ସୀମା ୧୫ହଜାର ଟଙ୍କା ସମ୍ପର୍କିତ ନିୟମକୁ ରଦ୍ଦ କରିଛନ୍ତି ସର୍ବୋଚ୍ଚ ନ୍ୟାୟାଳୟ । ପ୍ରଧାନ ବିଚାରପତି ୟୁୟୁ ଲଳିତ, ବିଚାରପତି ଅନିରୁଦ୍ଦ ବୋଷ ଓ ବିଚାରପତି ସୁଧାଂଶୁ ଧୁଳିଆଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣୀ କରିଛନ୍ତି । ପେନସନ ଯୋଗ୍ୟ ବେତନ ସୀମା ପୂର୍ବରଚ ୬ହଜାର ୫ଶହ ଟଙ୍କା ଥିବା ବେଳେ ଏହାକୁ ୨୦୧୪ରେ ସଂଶୋଧନ କରାଯାଇ ୧୫ହଜାର ଟଙ୍କା ଧାର୍ଯ୍ୟ ହୋଇଥିଲା । ଖଣ୍ଡପୀଠ କହିଛନ୍ତି, ଯେଉଁ କର୍ମଚାରୀ ଧାର୍ଯ୍ୟ ସମୟ ସୁଦ୍ଧା ଏଥିରେ ସାମିଲ ହେବାକୁ ସକ୍ଷମ ହୋଇ ନାହାନ୍ତି ସେମାନଙ୍କୁ ଏନେଇ ଅତିରିକ୍ତ ସୁଯୋଗ ଦିଆଯିବାର ଆବଶ୍ୟକତା ରହିଛି ।
ତେବେ ବେତନ ୧୫ହଜାର ଟଙ୍କାରୁ ଅଧିକ ହେଲେ କର୍ମଚାରୀଙ୍କୁ ଅତିରିକ୍ତ ୧.୧୬ପ୍ରତିଶତ ଯୋଗଦାନ କରିବା ନେଇ ୨୦୧୪ ସଂଶୋଧନ ନିୟମରେ ଯେଉଁ ପ୍ରସ୍ତାବ ରହିଥିଲା ତାକୁ ରଦ୍ଦ କରିଛନ୍ତି ଖଣ୍ଡପୀଠ । ଏହା ଇଚ୍ଛାଧିନ ବୋଲି କହିଛନ୍ତି ସୁପ୍ରିମକୋର୍ଟ । ୨୦୧୪ସ୍କିମକୁ କେରଳ, ରାଜସ୍ଥାନ ଓ ଦିଲ୍ଲୀ ଉଚ୍ଚ ନ୍ୟାୟାଳୟ ରଦ୍ଦ କରିଥିଲେ । କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ ବା ଇପିଏଫଓ ଏବଂ କେନ୍ଦ୍ର ସରକାର ଏହାକୁ ନେଇ ସୁପ୍ରମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।