ଉତ୍ତରପ୍ରଦେଶର ଆହ୍ୱାନକୁ କିଭଳି ସାମନା କରିବେ ମୋଦି ଶାହା ଯୋଡି । ଜାତୀୟ କାର୍ଯ୍ୟକାରିଣୀରେ ଆଭିମୁଖ୍ୟ ସ୍ପଷ୍ଟ କରିପାରନ୍ତି ବିଜେପିର ପୋଷ୍ଟର ବୟ
କନକ ବ୍ୟୁରୋ: ଉତରପ୍ରଦେଶର ଦୁଇ ଶକ୍ତିଶାଳୀ ରାଜନୈତିକ ଦଳ ସମାଜବାଦୀ ପାର୍ଟି ଏବଂ ବହୁଜନ ସମାଜବାଦୀ ପାର୍ଟି ଏକାଠି ହେବା ପରେ ଏବେ ପ୍ରଶ୍ନ ହେଉଛି- ଏହି ମହାମେଂଟର କେମିତି ମୁକାବିଲା କରିବ ବିଜେପି । ୮୦ଟି ଲୋକସଭା ଆସନ ବିଶିଷ୍ଠ ଉତରପ୍ରଦେଶରେ, ୨୦୧୪ ନିର୍ବାଚନରେ ଏକ ପ୍ରକାର ବାଜିମାତ କରିଥିଲା ମୋଦି-ଶାହାଙ୍କ ଯୋଡି । ଏକାକୀ ବିଜେପି ୭୧ଟି ଲୋକସଭା ଆସନରେ ବିଜେପି ବିଜୟୀ ହୋଇଥିବା ବେଳେ ପ୍ରଧାନମନ୍ତ୍ରୀ ପ୍ରାର୍ଥୀ ଭାବରେ ବାରଣାସୀରୁ ନିର୍ବାଚିତ ହୋଇଥିଲେ ଖୋଦ୍ ନରେନ୍ଦ୍ର ମୋଦି ।
Kanak News is now on WhatsApp
Join and get latest news updates delivered to you via WhatsApp
ବିଜେପିର ଏହି ବିପୁଳ ସଫଳତା ଉଭୟ ସମାଜବାଦୀ ଏବଂ ବହୁଜନ ସମାଜବାଦୀ ପାର୍ଟିକୁ ଚିନ୍ତା କରିବା ପାଇଁ ବାଧ୍ୟ କରିଦେଇଥିଲା । ଆଉ ଠିକ୍ ୨୦୧୯ ସାଧାରଣ ନିର୍ବାଚନ ପୂର୍ବରୁ ମହାମେଂଟ ଜରିଆରେ ଏକାଠି ହୋଇଛନ୍ତି ମାୟାବତୀ ଏବଂ ଅଖିଳେଶ । ବଡ କଥା ହେଉଛି ନିକଟରେ ବିଭିନ୍ନ ଗଣମାଧ୍ୟମ ପକ୍ଷରୁ ହୋଇଥିବା ଜନମତ ସର୍ଭେରେ ଉତରପ୍ରଦେଶକୁ ନେଇ ଏକ ବଡ ଧରଣର ଆକଳନ କରାଯାଇଛି । ଏଥିରେ କୁହାଯାଇଛି ଯେ, ଯଦି ସମାଜବାଦୀ ପାର୍ଟି ଏବଂ ବହୁଜନ ସମାଜବାଦୀ ପାର୍ଟି ଏକାଠି ନିର୍ବାଚନ ଲଢ଼ନ୍ତି ତେବେ ବିଜେପିକୁ ମୁକାବିଲା କରିବା ବହୁତ ବଡ ଚ୍ୟାଲେଂଜ୍ ହେବ । ଆଉ ସତ କୁ ସତ ଆଜି ମେଂଟ ହେବା ପରେ ଏହି ଦୁଇ ଦଳ ଏକାଠି ୨୦୧୯ ନିର୍ବାଚନ ଲଢ଼ିବା ନିଶ୍ଚିତ ହୋଇଛି ।
ଦେଶର ସବୁଠୁ ବଡ ରାଜ୍ୟ ଉତରପ୍ରଦେଶରେ ଏହି ଦୁଇ ଶକ୍ତିକୁ କେମିତି ମୁକାବିଲା କରିବେ ମୋଦି ଏବଂ ଶାହା ତାକୁ ନେଇ ଚର୍ଚ୍ଚା ହୋଇଛି । ଏମିତି କି ଆଜିର ସାମ୍ବାଦିକ ସମ୍ମିଳନୀରେ ମୋଦି-ଶାହା ଯୋଡ଼ିଙ୍କୁ ଗୁରୁଚାଲା ଯୋଡ଼ି କହି ଖୋଲାଖୋଲି ଆହ୍ୱାନ ଦେଇଛନ୍ତି ମୟାବତୀ ।