ପୁଣି ସୋନୁଙ୍କ ବଡପଣ : ଉତ୍ତରାଖଣ୍ଡ ଜଳପ୍ରଳୟରେ ପ୍ରାଣ ହରାଇ ଥିବା ଜଣେ ବ୍ୟକ୍ତିଙ୍କ ପରିବାରକୁ ସାହାରା ଦେଲେ , ୪ ଝିଅଙ୍କୁ ପୋଷ୍ୟ ଭାବେ ଗ୍ରହଣ କଲେ ।
କନକ ବ୍ୟୁରୋ : ୨୦୨୧ ଫେବୃଆରୀ ୭ ତାରିଖରେ ଉତ୍ତରାଖଣ୍ଡରେ ହୋଇଥିବା ଜଳପ୍ରଳୟ ତାଣ୍ଡବ ଏବେ ବି ଲୋକଙ୍କ ମନରୁ ଲିଭିନି । ଏହି ପ୍ରଳୟରେ ଅନେକ ଲୋକ ନିଜ ପ୍ରାଣ ହରାଇଛନ୍ତି ଆଉ ଅନେକ ପରିବାର ଅନାଥ ମଧ୍ୟ ହୋଇଛନ୍ତି । ଏବେ ବି କିଛି ଲୋକ ନିଖୋଜ ରହିଥିବାରୁ ଉଦ୍ଧାର କାର୍ୟ୍ୟ ଜାରି ରହିଛି । ହେଲେ ଏହାରି ମଧ୍ୟରେ ଭଗବାନ ରୂପରେ ଆସି ଶ୍ରମିକଙ୍କ ସହ ଛିଡା ହୋଇଛନ୍ତି ଶ୍ରମିକଙ୍କ ଭଗବାନ ।
ସମସ୍ୟା ଯେତେ ବଡ ହେଇଥାଉ, କଷ୍ଟ ଯେତେ ଗଭୀର ହେଇଥାଉ, କେବେବି ସେ ବେସାହାରା ଲୋକଙ୍କ ହାତ ଛାଡନ୍ତିନି ସୋନୁ ସୁଦ । ସୋନୁ ଏବେ ପୁଣି ନିଜ ମହାନତା ଦେଖାଇଛନ୍ତି । ଉତ୍ତରାଖଣ୍ଡର ଚାମୋଲୀରେ ହୋଇଥିବା ଏହି ଜଳ ପ୍ରଳୟରେ ପ୍ରାଣ ହରାଇଥିବା ଜଣେ ବ୍ୟକ୍ତିଙ୍କ ପରିବାରକୁ ସାହାରା ଦେବେ ସୋନୁ । ଏହି ବ୍ୟକ୍ତିଙ୍କ ୪ ଜଣ ଝିଅକୁ ପୋଷ୍ୟ ଭାବେ ଗ୍ରହଣ କରିଛନ୍ତି ସୋନୁ ।
Kanak News is now on WhatsApp
Join and get latest news updates delivered to you via WhatsApp
ଜଣେ ଜାତୀୟ ସ୍ତରର ସାମ୍ବାଦିକ ଏନେଇ ଟ୍ୱିଟ କରି ଏହି ଝିଅମାନଙ୍କୁ ସାହାଯ୍ୟ କରିବାକୁ ସୋନୁଙ୍କୁ ନିବେଦନ କରିଥିଲେ । ଆଉ ସୋନୁ ଟ୍ୱିଟର ରିପ୍ଲାଏ ଦେଇ କହିଥିଲେ ଏ ପରିବାର ଏବେ ମୋର । ସୋନୁଙ୍କ ଏହି ମହାନ କାମ ପାଇଁ ତାଙ୍କୁ ଏବେ ଚାରିଆଡୁ ସାବାସୀର ସୁଅ ଛୁଟୁଛି ।
ଉତ୍ତରାଖଣ୍ଡ ଟିହିରି ଜିଲ୍ଲାର ଆଲମ ସିଂ ପୁଡରୀ । ଆଲମ ସିଂ ପେଶାରେ ଜଣେ ଇଲେକ୍ଟ୍ରି ମେକାନିକ । ଇଲେକ୍ଟ୍ରି କାମ କରି ଆଲମ ନିଜ ପରିବାର ଚଳାନ୍ତି । ଚାମୋଲୀ ଜଳ ପ୍ରଳୟ ସମୟରେ ଆଲମ ସେହି ଟନେଲ ଭିତରେ କାମ କରୁଥିଲେ । ଆଉ ଜଳ ପ୍ରଳୟ ଯୋଗୁଁ ତାଙ୍କର ମୃତ୍ୟୁ ମଧ୍ୟ ହୋଇଥିଲା । ଆଲମଙ୍କ ମୃତ୍ୟୁରେ ତାଙ୍କ ପରିବାର ବେସାହାରା ହୋଇଯାଇଥିଲା । ଆଉ ବାପାଙ୍କୁ ହରାଇ ୪ ଝିଅ ପୁରାପୁରି ଭାଙ୍ଗି ପଡିଥିଲେ । ହେଲେ ଏହି ଚାରି ଝିଅଙ୍କୁ ଏବେ ସାହାରା ହେବେ ସୋନୁ ସୁଦ । ୪ ଜଣଙ୍କ ପାଠ ପଢାଠୁ ଆରମ୍ଭ କରି ବିବାହ ପର୍ୟ୍ୟନ୍ତ ସବୁ ଖର୍ଚ୍ଚ ଉଠାଇବେ ସୋନୁ ।
ଏହି ଘଟଣା ନୂଆ ନୁହେଁ ଯେ ସୋନୁ ବେସାହାରାଙ୍କୁ ସାହାଯ୍ୟର ହାତ ବଢାଉଛନ୍ତି । ପୂର୍ବରୁ ଯେତେବେଳେ ବିହାର ଓ ଆସାମରେ ବନ୍ୟାର ପ୍ରକୋପ ଦେଖାଯାଇଥିଲ ସେତେବେଳେ ବି ଆଗକୁ ଆସିଥିଲେ ସୋନୁ । କାହାକୁ ପଢିବାକୁ ବହି ଦେଇଥିଲେ ତ କାହା ପାଇଁ ଘର ତିଆରି କରିଥିଲେ । ଏଭଳି ଅନେକ ଲୋକଙ୍କୁ ସାହାଯ୍ୟ କରିଥିଲେ ସୋନୁ । ଲକଡାଉନରୁ ଆରମ୍ଭ ହୋଇଥିବା ସୋନୁଙ୍କ ଏହି ସାହାଯ୍ୟ କରିବାର ଅଭିଯାନ ଏବେ ବି ଜାରି ରହିଛି ।