ମୁମ୍ବାଇ-ଗୋଆ ‘କ୍ରୁଜ୍ ଜାହାଜ’ର ୬୬ ଯାତ୍ରୀ କରୋନା ପଜିଟିଭ୍। ପୂର୍ବରୁ ଜଣେ ଜାହାଜ କର୍ମଚାରୀ ହୋଇଥିଲେ ସଂକ୍ରମିତ।
କନକ ବ୍ୟୁରୋ : ମୁମ୍ବାଇରୁ ଗୋଆ ମଧ୍ୟରେ ଚଳାଚଳ କରୁଥିବା ବିଳାସମୟ କ୍ରୁଜ୍ ଜାହାଜ ‘କର୍ଡେଲିଆ’ରେ ଜଣେ କର୍ମଚାରୀ କରୋନା ପଜିଟିଭ ଚିହ୍ନଟ ହେବା ପରେ କ୍ରୁଜରେ ଥିବା ୨୦୦୦ ଯାତ୍ରୀଙ୍କର ନମୁନା ପରୀକ୍ଷା କରାଯାଇଥିଲା । ଏବେ ସେଥିରେ ଥିବା ୬୬ ଯାତ୍ରୀଙ୍କ ନମୁନା ପଜିଟିଭ ହୋଇଥିବା ଜଣାପଡ଼ିଛି । ରବିବାର ଦିନ, ପିପିଇ କିଟ ପିନ୍ଧି ଏକ ଡାକ୍ତରୀ ଦଳ ବିମାନରେ ଯାତ୍ରୀ ଏବଂ କ୍ରୁ ସଦସ୍ୟଙ୍କ ସମେତ ସମସ୍ତ ୨,୦୧୬ ଲୋକଙ୍କଆରଟି-ପିସିଆର ପରୀକ୍ଷା କରିବାକୁ ଯାଇଥିଲେ । ଏହା ପରେ ୬୬ଜଣ କରୋନା ପଜିଟିଭ ହୋଇଥିବା ଜଣାପଡ଼ିଛି। ଏବେ ଜାହାଜରୁ ଯାତ୍ରୀମାନଙ୍କୁ ଅବତରଣ କରିବାକୁ ଅନୁମତି ଦିଆଯିବ କି ନାହିଁ ସେ ନେଇ କର୍ତ୍ତୃପକ୍ଷ ନିଷ୍ପତ୍ତି ନେବେ ।
Kanak News is now on WhatsApp
Join and get latest news updates delivered to you via WhatsApp
ମୁମ୍ବାଇରୁ ଯାଇଥିବା ଉକ୍ତ ଜାହାଜଟି ‘ମୋର୍ମୁଗାଓ କ୍ରୁଜ୍ ଟର୍ମିନାଲ୍’ରେ ଲଙ୍ଗର୍ ପକାଇଛି। ଗୋଆରେ ଥିବା ଡକରେ ଲଙ୍ଗର୍ ପକାଇବାକୁ ‘ମୁମ୍ବାଇ ପୋର୍ଟ ଟ୍ରଷ୍ଟ୍’ ଉକ୍ତ କ୍ରୁଜ୍ ଜାହାଜକୁ ଅନୁମତି ଦେଇ ନ ଥିଲେ। ତେବେ ଦେଶରେ ଏବେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଥିବାରୁ କ୍ରୁଜରେ କରୋନା ପରୀକ୍ଷା କରାଇବା ପାଇଁ ନିଷ୍ପତ୍ତି ନିଆଯାଇଥିଲା । ଏବେ ୬୬ଜଣ କରୋନା ଆକ୍ରାନ୍ତ ବାହାରିବା ପରେ ଆଗାମୀ ପଦକ୍ଷେପ କ’ଣ ରହିବ, ତାହା ଉପରେ ଏବେ ସମସ୍ତଙ୍କ ନଜର ରହିଛି ।
ଅନ୍ୟପଟେ ଭାରତରେ ଏବେ ସମୁଦାୟ ‘ଓମିକ୍ରନ୍’ ସଂକ୍ରମଣ ସଂଖ୍ୟା ମଧ୍ୟ ୧,୭୦୦ରେ ପହଞ୍ଚିଛି । ସ୍ୱାସ୍ଥ୍ୟ ମନ୍ତ୍ରାଳୟ ତଥ୍ୟ ଅନୁସାରେ, ଗତକାଲି ସନ୍ଧ୍ୟା ୬ଟା ସୁଦ୍ଧା ସମୁଦାୟ ୧,୪୫,୬୮,୮୯,୩୦୬ ହିତାଧିକାରୀଙ୍କୁ ଟିକା ଦିଆଯାଇଛି । ‘ଆଇସିଏମ୍ଆର୍’ ରିପୋର୍ଟ ଅନୁସାରେ, କୋଭିଡ୍-୧୯ ନିଦାନ ଲାଗି ଗତକାଲି ସୁଦ୍ଧା ସମୁଦାୟ ୬୮,୦୯,୫୦,୪୭୬ଟି ନମୁନା ପରୀକ୍ଷା କରାଯାଇଛି । ଗତକାଲି ପରୀକ୍ଷା କରାଯାଇଛି ୮,୭୮,୯୯୦ଟି ନମୁନା ।