କରୋନା ପାଇଁ ବୁଢିଠାକୁରାଣୀ ଓ ତାରାତାରିଣୀ ଦର୍ଶନ ଉପରେ ଲାଗିଲା କଟକଣା : ତାରାତାରିଣୀରେ କେବଳ ସ୍ଥାନୀୟ ଲୋକେ ହିଁ କରିପାରିବେ ଦର୍ଶନ
ବୁଢିଠାକୁରାଣୀରେ ଦର୍ଶନ ମନା; ମନ୍ଦିରକୁ ଯିବା ଆସିବା ରାସ୍ତାରେ ଯାନବାହାନ ଚଳାଚଳ ବନ୍ଦ
କନକ ବ୍ୟୁରୋ : କରୋନା ସଂକ୍ରମଣ ବୃଦ୍ଧି ପାଉଥିବା କାରଣରୁ ଗଞ୍ଜାମ ଜିଲ୍ଲାର ତାରାତାରିଣୀ ମନ୍ଦିର ଏବଂ ବୁଢିଠାକୁରାଣୀ ମନ୍ଦିରରେ ଦର୍ଶନ ଉପରେ ଲାଗିଲା କଟକଣା । ତାରାତାରିଣୀ ମନ୍ଦିରରେ କେବଳ ସ୍ଥାନିୟ ବାସିନ୍ଦା ହିଁ ଦର୍ଶନ କରିପାରିବେ । କିନ୍ତୁ ବୁଢିଠାକୁରାଣୀ ମନ୍ଦିରରେ କେହି ଦର୍ଶନ କରିପାରିବେ ନାହିଁ । ଏପରିକି ମନ୍ଦିରକୁ ଯିବା ଆସିବା ରାସ୍ତାରେ ଯାନବାହାନ ଚଳାଚଳ ବନ୍ଦ ରହିଛି । ବୁଢିଠାକୁରାଣୀ ଯାତ୍ରା ଅସ୍ଥାୟୀ ମଣ୍ଡପରୁ ୨ଜଣ ପୂଜକଙ୍କୁ କରୋନା ପଜିଟିଭ ଚିହ୍ନଟ ହେବା ପରେ ଜିଲ୍ଲା ପ୍ରଶାସନ ଏହି ନିଷ୍ପତ୍ତି ନେଇଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଆଜି ମା’ ତାରାତାରିଣୀଙ୍କ ତୃତୀୟ ପାଳି ଚୈତ୍ର ମଙ୍ଗଳବାର ଯାତ୍ରା । କରୋନା ସଂକ୍ରମଣ ବଢ଼ିବା ସାଙ୍ଗକୁ ମା’ଙ୍କ ଯାତ୍ରାରେ ଗୋଟିଏ ପରେ ଗୋଟିଏ କଟକଣା ଲଗାଇ ଚାଲିଛି ଜିଲ୍ଲା ପ୍ରଶାସନ । ପୂର୍ବରୁ ମୁଣ୍ଡନକୁ ବନ୍ଦ କରିଥିବା ବେଳେ ଏଥର ପୁରୁଷୋତ୍ତମପୁର ବ୍ଲକ୍ ଓ ଏନ୍ଏସି ବାସିନ୍ଦାଙ୍କୁ କେବଳ ଦର୍ଶନ ଅନୁମତି ମିଳିଛି । ବାହାରୁ ଆସୁଥିବା ଭକ୍ତ, ମାନସିକଧାରୀଙ୍କ ଲାଗି ମା’ଙ୍କ ଦର୍ଶନ ବନ୍ଦ କରିଛି ପ୍ରଶାସନ ।
ତୃତୀୟ ପାଳି ଯାତ୍ରାରେ ସବୁଠାରୁ ଅଧିକ ଭକ୍ତ ସମାଗମ ହୋଇଥାଏ । ଏଭଳି ଆଶଙ୍କା ଥିବାରୁ ପ୍ରଶାସନ କଟକଣା କଠୋର କରିଛି। ସ୍ଥାନୀୟ ଅଞ୍ଚଳବାସୀ ଦର୍ଶନ ପାଇଁ ଯିବା ବେଳେ ପରିଚୟ ପତ୍ର ନେବା, ମାସ୍କ୍ ପରିଧାନ ଓ ସାମାଜିକ ଦୂରତା ରକ୍ଷା ବାଧ୍ୟତାମୂଳକ କରାଯାଇଛି। ଏଥିସହ ୬୦ ବର୍ଷରୁ ଊର୍ଦ୍ଧ୍ବ, ବିଭିନ୍ନ ରୋଗରେ ପୀଡ଼ିତ ବ୍ୟକ୍ତି, ଗର୍ଭବତୀ ଓ ୧୦ରୁ କମ୍ ବର୍ଷର ଶିଶୁଙ୍କୁ ନେବାକୁ ବାରଣ କରାଯାଇଛି।