ଦିଗ ବଦଳାଉଛି ଘୂର୍ଣ୍ଣିବଳୟ, ବଦଳୁଛି ପୂର୍ବାନୁମାନ ! ସପ୍ତାହେ ଧରି ଲାଗି ରହିବ ବର୍ଷା
କନକ ବ୍ୟୁରୋ: ଗୁରୁବାର ରାଜ୍ୟର ଉତ୍ତର ଉପକୂଳରେ କେନ୍ଦ୍ରୀଭୂତ ଘୂର୍ଣ୍ଣିବଳୟ ଶୁକ୍ରବାର ଉତ୍ତର ଛତିଶଗଡ଼କୁ ଗତି କରିଛି । ଆଜି ଏହା ପୁଣି ଓଡ଼ିଶାର ଦକ୍ଷିଣ ଉପକୂଳକୁ ଫେରିବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ଫଳରେ ଦକ୍ଷିଣ ଓଡ଼ିଶାର କିଛି ସ୍ଥାନରେ ଆହୁରି ୨୪ ଘଣ୍ଟା ପର୍ଯ୍ୟନ୍ତ ପ୍ରବଳ ବର୍ଷା ଓ ଉତ୍ତର ଏବଂ ଅନ୍ୟାନ୍ୟ ସ୍ଥାନରେ ସପ୍ତାହ ଧରି ବର୍ଷା ଲାଗି ରହିବ । କିନ୍ତୁ ଏହି ଘୂର୍ଣ୍ଣିବଳୟ ସୃଷ୍ଟି ହେବା ପରଠାରୁ ଅନ୍ୟୂନ ୪ ଥର ଗତିପଥ ବଦଳାଇଲାଣି । ଏହା ଲଘୁଚାପରେ ପରିଣତ ହେବ କି ନାହିଁ ସେ ନେଇ ପୂର୍ବାନୁମାନ କରିପାରୁନାହିଁ ପାଣିପାଗ କେନ୍ଦ୍ର । ଘନ ଘନ ଏହା ଦିଗ ବଦଳାଉଥିବାରୁ ପୂର୍ବାନୁମାନ ବି ଘଡ଼ିକେ ଘଡ଼ି ବଦଳୁଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ଗତ ମଙ୍ଗଳବାର ବଙ୍ଗୋପ ସାଗରରେ ଥରକେ ୨ଟି ଘୂର୍ଣ୍ଣିବଳୟ ସୃଷ୍ଟି ହୋଇଥିଲା। ଗୋଟିଏ ବାଂଲାଦେଶ ଆଖପାଖ ଦକ୍ଷିଣ ପୂର୍ବ ବଙ୍ଗୋପ ସାଗରରେ ସୃଷ୍ଟି ହୋଇଥିବା ବେଳେ ଅନ୍ୟଟି ମିଆଁମାର ଆଖପାଖ ଉତ୍ତର ପୂର୍ବ ବଙ୍ଗୋପ ସାଗରରେ ହୋଇଥିଲା । ବୁଧବାର ୨ଟି ଯାକ ଘୂର୍ଣ୍ଣିବଳୟ ମିଶି ଗୋଟିଏ ଘୂର୍ଣ୍ଣିବଳୟରେ ପରିଣତ ହୋଇ ରାଜ୍ୟର ଉତ୍ତର ଉପକୂଳକୁ ଘୁଞ୍ଚିଆସିଥିଲା । ପାଣିପାଗ କେନ୍ଦ୍ରର ପୂର୍ବାନୁମାନ ଅନୁଯାୟୀ ଗୁରୁବାର-ଶୁକ୍ରବାର ସୁଦ୍ଧା ଏହା ଦକ୍ଷିଣ ଉପକୂଳକୁ ମୁହାଁଇଥାନ୍ତା । କିନ୍ତୁ ପୂର୍ବାନୁମାନକୁ ଭୁଲ୍ ପ୍ରମାଣିତ କରି ଏହାର ସ୍ଥିତି ବଦଳିଗଲା । ଗତକାଲି ଏହା ଉତ୍ତର ଛତିଶଗଡ଼ ଦିଗକୁ ଗତି କରିଛି । ଶନିବାର ବେଳକୁ ପୁଣି ଏହା ଦକ୍ଷିଣ ଓଡ଼ିଶା ଉପକୂଳ ଆଡ଼କୁ ଫେରିଆସିବ । ଘୂର୍ଣ୍ଣିବଳୟର ସ୍ଥିତି ଏବଂ ଗତି ଅନୁଧ୍ୟାନ କରି ଏହା ଲଘୁଚାପର ରୂପ ନେବ କି ନାହିଁ ତା’ର ରୂପରେଖ ସ୍ପଷ୍ଟ କରିପାରୁନାହିଁ ପାଣିପାଗ କେନ୍ଦ୍ର ।
ତେବେ ୨୮ ତାରିଖ ପର୍ଯ୍ୟନ୍ତ ଦକ୍ଷିଣ ଓଡ଼ିଶାର କିଛି ସ୍ଥାନରେ ପ୍ରବଳ ବର୍ଷା ଏବଂ ଉତ୍ତର ଏବଂ ଉପକୂଳର ବିଭିନ୍ନ ସ୍ଥାନରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବ ବୋଲି ଗତକାଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ରାଜ୍ୟରେ ଦକ୍ଷିଣ ପଶ୍ଚିମ ମୌସୁମୀ ପ୍ରବାହ ସ୍ୱାଭାବିକ ରହିଛି । ଏହା ସହିତ ରାଜସ୍ଥାନର ଗଙ୍ଗାନଗରରୁ ଝାରସୁଗୁଡ଼ା, ପୁରୀ ଦେଇ ମୌସୁମୀ ଟ୍ରଫ୍ ଲାଇନ ବଙ୍ଗୋପ ସାଗରକୁ ଲମ୍ବିଯାଇଛି । ଏସବୁ କାରଣରୁ ସେପ୍ଟେମ୍ବର ୨ ତାରିଖ ଯାଏ ବର୍ଷା ଲାଗି ରହିବ । ତେବେ ଖରା ରହୁଥିବାରୁ ଘଡ଼ଘଡ଼ି ସହିତ ବର୍ଷା ହେବାର ସମ୍ଭାବନା ଅଧିକ ।
ଗତ ୨୪ ଘଣ୍ଟା ମଧ୍ୟରେ ମାଲକାନଗିରିରେ ସର୍ବାଧିକ ୯୬ ମିଲିମିଟର ବର୍ଷା ହୋଇଥିଲା । ସେହିପରି ଦାରିଙ୍ଗିବାଡ଼ିରେ ୯୪ ମି.ମି., ବାରିପଦାରେ ୩୮.୨ ମି.ମି., ଭୁବନେଶ୍ୱରରେ ୩୦.୪ ମି.ମି., ସମ୍ବଲପୁରରେ ୨୩.୮ ମି.ମି., କଟକରେ ୨୨.୨ ମି.ମି., ଝାରସୁଗୁଡ଼ାରେ ୧୭.୬ ମି.ମି., ତାଳଚେରରେ ୧୭ ମି.ମି. ବର୍ଷା ହୋଇଥିଲା । ଗତକାଲି ସନ୍ଧ୍ୟା ସୁଦ୍ଧା ବାଲେଶ୍ୱରରେ ସର୍ବାଧିକ ୧୩ ମି.ମି., ବଲାଙ୍ଗୀରରେ ୧୧.୪ ମି.ମି. ବର୍ଷା ହୋଇଛି । ଏହାବ୍ୟତୀତ ଭୁବନେଶ୍ୱର, ଚାନ୍ଦବାଲି, ଅନୁଗୁଳ ଆଦି ସ୍ଥାନରେ ସାମାନ୍ୟ ବର୍ଷା ହୋଇଛି ।