ମୃତ୍ୟୁର ଗୁମ୍ଫାରୁ ମିଳିଲା ମୁକ୍ତି ! ଥାଇଲାଣ୍ଡ ଥାମ୍ ଲୁଆଙ୍ଗ ଗୁମ୍ପାରୁ ସମସ୍ତ ୧୩ ଜଣକୁ ଉଦ୍ଧାର କଲା ସ୍ପେଶାଲ ରେସ୍କ୍ୟୁ ଟିମ୍
କନକ ବ୍ୟୁରୋ : ଦୁଇ ସପ୍ତାହ ପରେ ଥାଇଲାଣ୍ଡର ଗୁମ୍ଫାରୁ ବାହାରିଲେ ଫୁଟବଲ୍ ଖେଳାଳି । ସମସ୍ତ ୧୨ ଜଣ ଖେଳାଳି ଓ କୋଚଙ୍କୁ ଗୁମ୍ପା ଭିତରୁ ଉଦ୍ଧାର କରିଛି ଥାଇ ନେଭି ସିଲ୍ ଟିମ୍ । ଗତକାଲି ସୁଦ୍ଧା ୮ଜଣ ଖେଳାଳି ଉଦ୍ଧାର ହୋଇଥିବା ବେଳେ ଆଜି ତୃତୀୟ ଦିନରେ ବାକି ୪ଜଣ ଖେଳାଳି ଓ କୋଚଙ୍କୁ ସଫଳତାର ସହ ଉଦ୍ଧାର କରାଯାଇଛି । ସମସ୍ତଙ୍କ ସ୍ୱାସ୍ଥ୍ୟବସ୍ଥା ସ୍ଥିର ରହିଛି । ୱାଇଲ୍ଡ ବୋର୍ ଫୁଟବଲ୍ ଟିମର ଖେଳାଳିମାନେ ଗତ ଜୁନ୍ ୨୩ ତାରିଖରେ ଗୁମ୍ଫା ଭିତରେ ପଶିଥିଲେ । ହେଲେ ଆଉ ବାହାରକୁ ବାହାରିପାରିନଥିଲେ ।
Kanak News is now on WhatsApp
Join and get latest news updates delivered to you via WhatsApp
ଥାଇଲାଣ୍ଡର ଥାମ୍ ଲୁଆଙ୍ଗ ଗୁମ୍ଫାରୁ ୧୨ ଜଣ କୁନି ଫୁଟବଲ ଖେଳାଳିଙ୍କୁ ଉଦ୍ଧାର କରିବା ଏତେ ସହଜ ନଥିଲା । ସଂଘର୍ଷପୂର୍ଣ୍ଣ ପରିସ୍ଥିତିରେ ଚାଲିଥିଲା ରେସ୍କ୍ୟୁ ଅପେରେସନ୍ । ଏକ ବଡ ସିଲିଣ୍ଡର ଆକୃତିର ସବମେରିନ ସାହାଯ୍ୟରେ କୁନି କୁନି ପିଲାଙ୍କୁ ଧରି ଅତି ସତର୍କତାର ସହ ମୃତ୍ୟୁର ଗୁମ୍ଫାରୁ ବାହାର କରିଛି ସ୍ୱତନ୍ତ୍ର ଉଦ୍ଧାରକାରୀ ଦଳ । ଅଙ୍କାବଙ୍କା ଗୁମ୍ଫାର ରାସ୍ତା, ତାରି ଭିତରେ ସ୍ଥାନେ ସ୍ଥାନେ ପାଣି । ପ୍ରାୟ ୪ କିଲୋମିଟର ଏଭଳି ବିପଦ ସଂକୁଳ ପଥ ଭିତରୁ ପିଲାଙ୍କୁ ମୁକ୍ତ କରାଯାଇଛି । ଅଳ୍ପ କିଛି ବ୍ୟବଧାନରେ ସ୍ଥାନେ ସ୍ଥାନ ପାଣିରେ ସଂପୂର୍ଣ୍ଣ ବୁଡି ରହିଥିଲା ଗୁମ୍ଫା । ଆଉ ଜଳାର୍ଣ୍ଣବ ଅଂଶକୁ ଅତିକ୍ରମ କରି ପିଲାକୁ ବାହା କରିବା ଥିଲା ସବୁଠାରୁ ବଡ ଚ୍ୟାଲେଂଜ୍ ।
ଫୁଲବଲ ଅଭ୍ୟାସ୍ ପରେ ବୁଲିବାର ଅଭିଳାସା ଯେ, ଗୁମ୍ଫା ଭିତରେ ଏମିତି ବନ୍ଧକ ରଖିଦେବ ହୁଏତ ସେମାନେ କେହି କଳ୍ପନା ବି କରିନଥିଲେ । ହେଲେ ଜୁନ୍ ୨୩ ତାରିଖରୁ ଗୁମ୍ଫା ଭିତରେ ଫଶି ରହିଥିବା ୧୨ ଜଣ ଫୁଟବଲ ଖେଳାଳି ଏବଂ ତାଙ୍କ କୋଚଙ୍କୁ ଉଦ୍ଧାର କରିବା ପାଇଁ ଆରମ୍ଭ ହୋଇଥିଲା ଯୁଦ୍ଧକାଳୀନ ଅପରେସନ୍ । ଦୁଇ ସପ୍ତାହରୁ ଅଧିକ ଦିନ ଧରି ଚାଲିଥିବା ଏହି ସଂଘର୍ଷ ଶେଷ ହୋଇଛି । ଗୁମ୍ଫା ଭିତରେ ଫଶି ରହିଥିବା ସମସ୍ତଙ୍କୁ ବାହାରକୁ ଆଣାଯାଇଛି । ତେବେ ଯେଉଁ ଭଳି ଭାବରେ ଥାଇଲାଣ୍ଡରେ ଉଦ୍ଧାରକାର୍ଯ୍ୟକୁ ଚୂଡାନ୍ତ ରୂପ ଦିଆଯାଇଛି, ତାହା ନିଶ୍ଚିତ ଭାବରେ ରେସ୍କ୍ୟୁ ଅପରେସନ୍ କ୍ଷେତ୍ରରେ ଦୁନିଆ ପାଇଁ ଏକ ବଡ ଉପଲବ୍ଧି ।