ଦାଗୀ ନେତାଙ୍କ ବିରୋଧରେ ସୁପ୍ରିମକୋର୍ଟଙ୍କ କଠୋର ଆଭିମୁଖ୍ୟ । ଅପରାଧୀକ ଲିଙ୍କ ଥିବା ନେତାଙ୍କ ପୂରା ବିବରଣୀ ଦଳୀୟ ୱେବସାଇଟରେ ଦେବାକୁ ସବୁ ରାଜନୈତିକ ଦଳଙ୍କୁ କୋର୍ଟଙ୍କ କଡ଼ା ନିର୍ଦ୍ଦେଶ । ନିର୍ଦ୍ଦେଶ ନମାନିଲେ ଅଦାଲତ ଅବମାନନା
କନକ ବ୍ୟୁରୋ: ଆଉ ଚଳିବନି ରାଜନୈତିକ ଦଳର ମନମାନି । ଦେବାକୁ ହେବ ଦାଗୀ ନେତାଙ୍କ ପୂରା ବିବରଣୀ । ରାଜନୀତିରେ ଦିନକୁ ଦିନ ଅପରାଧୀଙ୍କ ସଂଖ୍ୟା ବଢ଼ୁଥିବା ନେଇ ଚିନ୍ତା ପ୍ରକଟ କରିଛନ୍ତି ସୁପ୍ରିମକୋର୍ଟ । ଏନେଇ ସବୁ ରାଜନୈତିକ ଦଳକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ସର୍ବୋଚ୍ଚ ଅଦାଲତ କହିଛନ୍ତି, ସବୁ ରାଜନୈତିକ ଦଳ ସେମାନଙ୍କ ୱେବସାଇଟରେ ପ୍ରାର୍ଥୀଙ୍କ ଅପରାଧିକ ତଥ୍ୟ ଓ ସେମାନଙ୍କ ଚୟନ କରିବାର କାରଣ ଦର୍ଶାଇବେ । ଅର୍ଥାତ ରାଜନୈତିକ ଦଳକୁ ଜଣାଇବାକୁ ପଡିବ, ଅପରାଧୀକ ପୃଷ୍ଠଭୂମି ଥିବା ନେତାଙ୍କୁ କାହିଁକି ପ୍ରାର୍ଥୀ କରାଗଲା ।
Kanak News is now on WhatsApp
Join and get latest news updates delivered to you via WhatsApp
ଏପରିକି ଯଦି କୌଣସି ପ୍ରାର୍ଥୀଙ୍କ ବିରୋଧରେ ଅପରାଧିକ ମାମଲା ରହିଛି ସେ ନେଇ ରାଜନୈତିକ ଦଳଗୁଡିକ ଫେସବୁକ୍, ଟୁଇଟର ଭଳି ସୋସିଆଲ ମିଡିଆ ଏବଂ ଗୋଟିଏ ଆଂଚଳିକ ଭାଷା ଓ ଗୋଟିଏ ଜାତୀୟ ଭାଷାର ଖବର କାଗଜରେ ସୂଚନା ଦେବାକୁ ନିର୍ଦ୍ଦେଶ ଦେଇଛନ୍ତିି ସୁପ୍ରିମକୋର୍ଟ ।
୨୦୧୮ରେ ସୁପ୍ରିମକୋର୍ଟ ଦେଇଥିବା ନିର୍ଦ୍ଦେଶକୁ ଦେଶର ପ୍ରମୁଖ ରାଜନୈତିକ ଦଳଗୁଡିକ ମାନୁନଥିବା ଅଭିଯୋଗ କରି ହୋଇଥିବା ଏକ ଆବେଦନର ଶୁଣାଣି କରି ସର୍ବୋଚ୍ଚ ନ୍ୟାୟାଳୟ ଏହି ରାୟ ଦେଇଛନ୍ତି । କୋର୍ଟଙ୍କ ନିର୍ଦ୍ଦେଶକୁ ନମାନିଲେ , ଏହାକୁ କୋର୍ଟଙ୍କ ଅବମାନନା ଭାବେ ଧରାଯିବ ବୋଲି କହିଛନ୍ତି ବିଚାରପତି ଫଲି ନରିମାନ ।
ଅନ୍ୟପଟେ ସୁପ୍ରିମକୋର୍ଟ ଏହି ରାୟ ଦେବା ପରେ ଏହାକୁ ନେଇ ରାଜନୈତିକ ଦଳମାନଙ୍କ ଭିତରେ ଆରମ୍ଭ ହୋଇଯାଇଛି ବୟାନବାଜି । ରାଜନୀତିକୁ ଅପରାଧୀ ମୁକ୍ତ କରିବା ପାଇଁ ୨୦୧୮ ସେପ୍ଟେମ୍ବର ୨୫ରେ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଥିଲେ ସୁପ୍ରିମକୋର୍ଟ । ଏଥିରେ ରାଜନୈତିକ ଦଳଗୁଡିକ ଅପରାଧୀଙ୍କୁ ପ୍ରାର୍ଥୀ କଲେ, ସେନେଇ ସବିଶେଷ ବିବରଣୀ ଦେବାକୁ ନିର୍ଦ୍ଦେଶ ଦେଇଥିଲେ । ହେଲେ ଏହାକୁ କେହି ମାନି ନଥିଲେ ।