କୋଡିଏ କାନ୍ଥରେ ଝୁଲିବ ୧୯ର ସ୍ମୃତି: ନୂଆବର୍ଷରେ ନହେଉ ପୁରୁଣା ବର୍ଷର ପୁନରାବୃତ୍ତି । ୨୦୨୦ ଖାତାରେ ନଲେଖା ହେଉ ୧୯ର ଆଖିଭିଜା ଅଧ୍ୟାୟ…
କନକ ବ୍ୟୁରୋ: କେଇ ମୁହୂର୍ତ୍ତ ପରେ କୋଡିଏ କ୍ୟାଲେଣ୍ଡରରେ ସ୍ମୃତି ହୋଇ ଝୁଲିବ ୨୦୧୯ । ନୂଆବର୍ଷର ନୂଆ ସକାଳ ସିନା ନୂଆ ଆଶା, ନୂଆ ସମ୍ଭାବନା ନେଇ ଆସିବ ହେଲେ ଉଣେଇଶର ଅକୁହା କଥା, ଅକୁହା କାହାଣୀ ଆଉ ଅଭୁଲା ଚିତ୍ର ଚରିତ୍ର ସବୁ କୋଡିଏ କାନ୍ଥରେ କଣ୍ଟା ପିଟା ହୋଇ ଟଙ୍ଗା ହେବ । କ୍ୟାଲେଣ୍ଡରର ଶେଷ ପୃଷ୍ଠା ଓଲଟିଗଲେ ସରିଯାଏ ପୁରୁଣା ବର୍ଷ, ପୁରୁଣା ଦିନ ଆଉ ନୂଆ ପୃଷ୍ଠାରେ ଲେଖାହୁଏ ନୂଆ ଏକ ଅଧ୍ୟାୟ । ତେବେ ସତରେ କଣ ନୂଆବର୍ଷ ଆସିଲେ ପୁରୁଣା ଦିନର କଥା ଭୁଲି ହୋଇଯାଏ । ପୁରୁଣା ବର୍ଷ ଦେଇଥିବା ବ୍ୟଥା, ବେଦନା, ଛାତିରେ ହୋଇଥିବା କ୍ଷତର ଦରଜକୁ ଭୁଲି ହୋଇଯାଏ ?
Kanak News is now on WhatsApp
Join and get latest news updates delivered to you via WhatsApp
ତେବେ ୨୦୧୯ର ସେମିତି କିଛି ଘଟଣା ଆମେ ଆପଣଙ୍କ କହିବୁ ଯାହାକୁ କେବେ ଭୁଲିହେବନି କି ସେ ଦରଜ ଜମା ଯିବନି । ଆଉ ସେମିତି କିଛି ଘଟଣା ଭିତରୁ ହାଇଦ୍ରାବାଦର ହୃଦୟଥରା କାହାଣୀ ଅନ୍ୟତମ । ଘରକୁ ଫେରିବା ବେଳେ ୪ ଜଣ ନର ରାକ୍ଷସ ମହିଳା ପଶୁ ଡାକ୍ତରଙ୍କୁ ଯେଉଁଭଳି ଭାବେ ପଶୁଭଳି ନିଛାଟିଆକୁ ନେଇ ଝୁଣି ଖାଇଗଲେ ତାହା ସାରା ଭାରତର ମୁହଁକୁ ତଳକୁ କରି ଦେଇଥିଲା । ଗଣଦୁଷ୍କର୍ମ ପରେ ମନ ମାନିଲାନି ଯେ ତାଙ୍କ ଦେହରେ ନିଆଁ ଲଗାଇ ଜାଳି ଦେଇଥିଲେ ୪ ସୈତାନ । ଯଦିଓ ଅଧ ରାତିରେ ସୈତାନ ମାନଙ୍କୁ ଗୁଳି କରି ହତ୍ୟା କରି ଦିଶାଙ୍କ ସହ ଘଟିଥିବା ଜଘନ୍ୟକାଣ୍ଡର ବଦଲା ନେଇଥିଲା ପୋଲିସ । ହେଲେ ଦିଶାଙ୍କ ବାପାମାଆଙ୍କ କୋଳକୁ କଣ ଝିଅ ଫେରି ଆସିଥିଲା ? ନାଇଁ ନା , ବରଂ ଦିଶା ଘଟଣା ସାରା ଦେଶର ବାପାମାଆଙ୍କ ଛାତିରେ ଏକ ଅଜଣା ଭୟ ଭରି ଦେଇଥିଲା ।
ସଞ୍ଚ ନଇଁଲେ କିମ୍ବା ଝିିଅ ଯଦି ବାହାରକୁ ଯାଇ ଘରକୁ ଫେରିବାରେ ବିଳମ୍ବ କଲା ତେବେ ବଢିଲା ଝିଅଙ୍କ ବାପା ମାଆ ଅଦେଖା ଡରରେ କମ୍ପୁଥିଲେ । କାଳେ ତାଙ୍କ ଝିଅ ସହ ସେମିତି କିଛି ଘଟିନିତ ? ହାଇଦ୍ରାବାଦ ଘଟଣା ଟିକେ ଥମିବା ପରେ ଓଡିଶାର ନବରଙ୍ଗପୁର ନାବାଳିକା ଗଣଦୁଷ୍କର୍ମ ଓ ହତ୍ୟା ଘଟଣା ସେ ଭୟକୁ ଦ୍ୱିଗୁଣିତ କରିଦେଲା । ତେବେ ନାରୀଙ୍କୁ ନେଇ ଏମିତି କିଛି ଭୟ ୨୦୧୯ ଦେଇଥିଲା । ତେଣୁ ୨୦୨୦ରେ ଦୁଷ୍କର୍ମ, ହତ୍ୟା, ଲୁଣ୍ଠନ ଭଳି ଛାତିଥରା ଆଉ ନାରକୀୟକାଣ୍ଡ ଯେମିତି ନଘଟେ ତାହା ୨୦୧୯ କୋଡିଏ କାନରେ କହିବା ଦରକାର । ନୂଆବର୍ଷରେ ଏମିତି ନାରକୀୟ ଘଟଣାର ପୁନାରାବୃତ୍ତି ନ ହେଉ ବୋଲି ଆଶା କରିବା । ଆଉ ଯେଉଁମାନେ ଏଭଳି ନିମ୍ନ ସ୍ତରକୁ ଯାଇ ଏମିତି ଘଟାଉଛନ୍ତି ସେମାନେ ସୁଧୁରି ଯାଆନ୍ତୁ ବୋଲି ଆଶା କରିବା ।
ତେବେ ଖାଲି ଦୁଷ୍କର୍ମ ଓ ହତ୍ୟା ନୁହେଁ ଅନେକ ଝଡ ଝଞ୍ଜାକୁ ମଧ୍ୟ ସାମ୍ନା କରିଛି ଓଡିଶା, ସାମ୍ନା କରିଛନ୍ତି ଓଡିଶାବାସୀ । ଫୋନିର ଭୟଙ୍କର ଫଣାରେ ଯେତେବେଳେ ଓଡିଶା ପଡିଥିଲା ସେତେବେଳେ ସବୁକିଛି ଉଜୁଡି ଯାଇଥିଲା । ପ୍ରଳଙ୍କାରୀ ପବନରେ ଘରଦ୍ୱାର ସହ ସବୁ ସ୍ୱପ୍ନକୁ ଛାରଖାର କରିଦେଇଥିଲା ବାତ୍ୟା । ବଡ ବଡ ଗଛ, କୋଠା ଭାଙ୍ଗି ଛାତିରେ ଛାତିଏ ଛନକା ପଶାଇଥିଲା ସହ ଛାରି ଆଡେ ହା ହା କାର ଖେଳାଇ ଦେଇଥିଲା ବାତ୍ୟା ଫୋନି । ତେବେ ୨୦୧୯ର ଆସିଥିବା ସେଭଳି ଏକ ଘଟଣା, ସେଭଳି ଏକ କାହାଣୀ ୨୦୨୦ରେ ପୁନରାବୃତି ନହେଉ ବୋଲି ସମସ୍ତେ ଭବବାନଙ୍କୁ ଗୁହାରୀ କରିଛନ୍ତି ।
ତେବେ ୨୦୧୯ରେ ଅନେକ ଭଲ ଖବର ବି ଓଡିଶା ଛାତିରେ ସ୍ମୃତି ହୋଇ ରହିଯାଇଛି ଯାହାକୁ ବଖାଣିଲେ କ୍ୟାଲେଣ୍ଡର ପରି ପୃଷ୍ଠା ପରେ ପୃଷ୍ଠା ଓଲଟି ଚାଲିବ । ତେବେ ଆସୁଥିବା ନୂଆବର୍ଷ ପୁରୁଣା ବର୍ଷର ଅଘଟଣକୁ ଭୁଲି, ପୁରୁଣା ବର୍ଷର କ୍ଷତକୁ ଭୁଲି ନୂଆ ଏକ ଅଧ୍ୟାୟ ସୃଷ୍ଟି କରୁ । ନୂଆ ସମ୍ଭାବନା ଆଣିଦେଉ ଭଗବାନଙ୍କ ପାଖରେ ଏହା ହିଁ କାମନା, ଏତିକି ପ୍ରାର୍ଥନା ।