କେନ୍ଦ୍ରାପଡାରେ ଭାଗ ହୋଇଯିବ କି ବିଜେଡି ଭୋଟବ୍ୟାଙ୍କ ? ଦଳ ଛାଡିଛନ୍ତି ସିପ୍ରା, ଗୀତାଞ୍ଜଳି, ଫାଇଦା ନେବ କିଏ?
କନକ ବ୍ୟୁରୋ : ନିର୍ବାଚନ ଯେତିକି ପାଖଉଛି, କେନ୍ଦ୍ରାପଡା ରାଜନୀତି ସେତିକି ରୋଚକ ହେଉଛି । ରାଜ୍ୟ ରାଜନୀତିରେ ଗୁରୁତ୍ୱ ବହନ କରୁଥିବା କେନ୍ଦ୍ରାପଡା ବିଧାନସଭା ଆସନରେ ଗତ କିଛି ଦିନ ମଧ୍ୟରେ ବଡ ଧରଣର ହଲଚଲ ଦେଖିବାକୁ ମିଳିଛି । ଖାସକରି ବିଜେଡି ଶିବିରରେ । ଗଣେଶ୍ୱର ବେହେରା ବିଜେଡିକୁ ଆସିବା ପରେ ଦଳ ଶକ୍ତିଶାଳୀ ହେବ ବୋଲି ଆକଳନ କରାଯାଉଥିଲା । କିନ୍ତୁ ଗଣେଶ୍ୱର ଦଳକୁ ଆସିବା ପରେ ଦଳର ୨ ତୁଙ୍ଗ ନେତା ବିଜେଡି ଛାଡିବା ଏବେ କେନ୍ଦ୍ରାପଡା ବିଜେଡି ରାଜନୀତିର ଅଙ୍କକୁ ଗୋଳମାଳିଆ କରିଛି ।
Kanak News is now on WhatsApp
Join and get latest news updates delivered to you via WhatsApp
ଗଣେଶ୍ୱର ବିଜେଡିରେ ମିଶିବା ପରେ ପୂର୍ବତନ ବିଧାୟିକା ସିପ୍ରା ମଲ୍ଲିକ ଦଳ ଛାଡି କଂଗ୍ରେସରେ ଯୋଗ ଦେବା ସହ ପ୍ରାର୍ଥୀ ହୋଇଛନ୍ତି । ସେହିଭଳି କେନ୍ଦ୍ରାପଡା ଜିଲ୍ଲା ପରିଷଦ ଅଧ୍ୟକ୍ଷା ଗୀତାଞ୍ଜଳି ସେଠୀ ମଧ୍ୟ ବିଜେଡି ଛାଡିବା ସହ ବିଜେପିକୁ ଯିବାକୁ ସଂକେତ ଦେଇଛନ୍ତି । ଗୁରୁତ୍ୱପୂର୍ଣ୍ଣ ଦିଗଟି ହେଉଛି, କେନ୍ଦ୍ରାପଡା ଆସନ ପାଇଁ ଉଭୟ ସିପ୍ରା ଓ ଗୀତାଞ୍ଜଳି ଆଶାୟୀ ଥିଲେ । କିନ୍ତୁ ଗଣେଶ୍ୱର ଶଙ୍ଖ ଫୁଙ୍କି ବିଜେଡି ସମୀକରଣକୁ ଗୋଳମାଳିଆ କରିବା ପରେ ଉଭୟ ସିପ୍ରା ଓ ଗୀତାଞ୍ଜଳି ବିଜେଡିକୁ ବାଏ ବାଏ କରିଛନ୍ତି ।
ପୂର୍ବରୁ ଗଣେଶ୍ୱରଙ୍କ ପ୍ରାର୍ଥୀତ୍ୱକୁ ନେଇ ଉଭୟ ସିପ୍ରା ଓ ଗୀତାଞ୍ଜଳିଙ୍କ କ୍ୟାମ୍ପ ବିରୋଧ କରି ଆସୁଥିଲେ । ଏବେ ଉଭୟ ନେତ୍ରୀ ଦଳ ଛାଡିବା ପରେ ବିଜେଡି ଭୋଟବ୍ୟାଙ୍କ ଭାଗ ହେବାର ଆଶଙ୍କା ସୃଷ୍ଟି ହୋଇଛି । ଯେହେତୁ ଗୀତାଞ୍ଜଳି ଜିଲ୍ଲା ପରିଷଦ ଅଧ୍ୟକ୍ଷା ରହିଛନ୍ତି ତେଣୁ ଦଳରେ ତାଙ୍କର ଦବଦବା ଥିଲା ଏବଂ ନିଜସ୍ୱ ସଙ୍ଗଠନ ରହିଛି । ନିର୍ବାଚନର ମାସକ ପୂର୍ବରୁ ଗୀତାଞ୍ଜଳି ଦଳ ଛାଡିବା ବିଜେଡି ଭୋଟବ୍ୟାଙ୍କକୁ ପ୍ରଭାବିତ କରିପାରେ ବୋଲି ଚର୍ଚ୍ଚା ହେଉଛି । ଅନ୍ୟପଟେ ପୂର୍ବତନ ବିଧାୟିକା ସିପ୍ରା ମଲ୍ଲିକଙ୍କର ମଧ୍ୟ କେନ୍ଦ୍ରାପଡାରେ ନିଜସ୍ୱ ସଙ୍ଗଠନ ରହିଛି । ତେଣୁ ସିପ୍ରା ବିଜେଡି ଛାଡି କଂଗ୍ରେସକୁ ଯିବା ସହ ପ୍ରାର୍ଥୀ ହେବା ଦ୍ୱାରା କିଛି ଭୋଟ ନିଜ ସପକ୍ଷକୁ ମଧ୍ୟ ନେବାର ଯଥେଷ୍ଟ ସମ୍ଭାବନା ରହିଛି । କାରଣ ଗଣେଶ୍ୱରଙ୍କ ପ୍ରାର୍ଥୀତ୍ୱକୁ ପୂର୍ବରୁ ବିଜେଡି କର୍ମୀ ବିରୋଧ କରୁଥିବାର ନଜିର ରହିଛି । ଅନ୍ୟପଟେ ଗଣେଶ୍ୱର ବିଜେଡିରେ ସାମିଲ ହେବା ସହ ଅନେକ କଂଗ୍ରେସ କର୍ମୀଙ୍କୁ ମଧ୍ୟ ଦଳରେ ସାମିଲ କରାଇଛନ୍ତି । ଯାହା ବିଜେଡି ପାଇଁ କିଛି ମାତ୍ରାରେ ଆଶ୍ୱସ୍ତି ଆଣିଛି । ଏହାସହ କେନ୍ଦ୍ରାପଡାର ପୂର୍ବତନ ବିଧାୟକ କିଶୋର ତରାଇ ଏବେ ପର୍ଯ୍ୟନ୍ତ ନୀରବ ରହିଛନ୍ତି । ତେଣୁ ଏଭଳି ସ୍ଥିତିରେ ଯଦି ବିଜେଡି ଭୋଟବ୍ୟାଙ୍କ ଭାଗ ହୁଏ ଏହା ଗଣେଶ୍ୱରଙ୍କୁ ଅଡୁଆରେ ପକାଇବ କି ନାହିଁ ତାହା ଉପରେ ସମସ୍ତଙ୍କର ନଜର ରହିଛି ।