ଦ୍ୱନ୍ଦରେ ଭାରତୀୟ ଟିମ୍ : ଇଂଲଣ୍ଡ ବିପକ୍ଷରେ ଖେଳାଯିବାକୁଥିବା ଟେଷ୍ଟ ଶୃଙ୍ଖଳାରେ ସ୍ପିନ୍-ପେସ୍ ବୋଲିଂକୁ ନେଇ ଚିନ୍ତାରେ ବିରାଟ ବାହିନୀ
କନକ ବ୍ୟୁରୋ: ଇଂଲଣ୍ଡ ବିପକ୍ଷରେ ଦିନିକିଆ ସିରିଜ ପରାଜୟ କରି ଭାରତୀୟ ଟିମ୍ କୁ ଶକ୍ତ ଧକ୍କା ଲାଗିଛି । ଏବେ ଅଗଷ୍ଟ ୧ରୁ ଆରମ୍ଭ ହେବାକୁଥିବା ଟେଷ୍ଟ ସୃଙ୍ଖଳାରେ କାହା ଉପରେ ବିଶ୍ୱାସ କରିବେ କପ୍ତାନ ବିରାଟ ଦ୍ୱନ୍ଦରେ ପଡ଼ିଥିବା ଚର୍ଚ୍ଚା ଜୋର ଧରିଛି । କେବଳ ଏତିକି ନୁହେଁ ପୂର୍ବରୁ ଇଂଲଣ୍ଡ ପିଚ୍ ରେ ଭାରତୀୟ ବୋଲିଂ ଟି-୨୦ ମ୍ୟାଚକୁ ଛାଡ଼ି ଦେଲେ ଅନ୍ୟ କେଉଁ ମ୍ୟାଚରେ ଭଲ ପ୍ରଦର୍ଶନ କରି ପାରି ନାହିଁ । ଯାହା ବିରାଟଙ୍କ ପାଇଁ ପ୍ରମୂଖ କାରଣ ପାଲଟିଛି । ଇଂଲଣ୍ଡ ବିପକ୍ଷ ଟେଷ୍ଟ୍ ଶୃଙ୍ଖଳାରେ ସ୍ପିନ୍ କି ପେସ୍ ବାଲିଂର ପ୍ରଭାବ ରହିବ ଏବେ ବିରାଟ କୋହଲିଙ୍କୁ ଦ୍ୱନ୍ଦ୍ୱରେ ପକାଇଛି। ସାଧାରଣତଃ ଇଂଲଣ୍ଡରେ ପେସ୍ ବୋଲିଂର ପ୍ରଭାବ ରହିଥାଏ। କିନ୍ତୁ ଏବେ ଇଂଲଣ୍ଡରେ ଅସ୍ୱାଭାବିକ ଭାବେ ପାଗ ଗରମ ଓ ଶୁଷ୍କ ଥିବାରୁ ପିଚ୍ରୁ ସୁଇଙ୍ଗ୍ ମିଳିବା ସମ୍ଭାବନା କମ୍। ଯାହାକି ସ୍ପିନ୍ ସପକ୍ଷରେ ଗୁରୁତ୍ୱ ରଖିବାକୁ ଉତ୍ସାହିତ କରୁଛି। କିଏ କ’ଣ ମତ ରଖୁ କିମ୍ବା ଗଣମାଧ୍ୟମରେ ଯାହା କିଛି ଖେଳିଯାଉ କପ୍ତାନ କୋହଲି ପ୍ରଭାବିତ ହେବା ଭଳି ଖେଳାଳି ନୁହଁନ୍ତି ।
Kanak News is now on WhatsApp
Join and get latest news updates delivered to you via WhatsApp
୩୫ ଟେଷ୍ଟ ଅଧିନାୟକତ୍ୱ କରି ସାରିଥିବା କୋହଲି ଭାରତକୁ ୨୧ ବିଜୟ ଦେଇଛନ୍ତି। ଏହା ମଧ୍ୟରେ ବିଦେଶ ମାଟିରେ ୮ ବିଜୟ ରହିଛି। ଦଳର ସାମର୍ଥ୍ୟ ଓ ଦୁର୍ବଳତା ତାଙ୍କୁ ଭଲ ଭାବରେ ଜଣା। ଦଳରେ ୩ ଜଣ ଲେଖାଏଁ ବିଶ୍ୱ ଶ୍ରେଣୀୟ ପେସ୍ ବୋଲର ଉମେଶ ଯାଦବ, ଈଶାନ୍ତ ଶର୍ମା, ମହମ୍ମଦ ସାମି ଏବଂ ସ୍ପିନର୍ ଆର୍ ଅଶ୍ୱିନ୍, ରବୀନ୍ଦ୍ର ଜାଦେଜା, କୁଲ୍ଦୀପ ଯାଦବ ରହିଥିବାରୁ ବିକଳ୍ପର ଅଭାବ ନାହିଁ। ସ୍ପିନ୍ ସମ୍ଭାବନା କାଏମ ରହିଲେ କୋହଲି ନିଶ୍ଚିତ ଅଶ୍ୱିନ-ଜାଦେଜାଙ୍କୁ ଖେଳାଇବାରେ କୁଣ୍ଠିତ ହେବେ ନାହିଁ। ବିଶ୍ୱ ମାନ୍ୟତାରେ ଏମାନେ ଯଥାକ୍ରମେ ୩ ଓ ୫ ନମ୍ବର ସ୍ଥାନରେ ଅଛନ୍ତି। ୩ ସ୍ପିନର ଖେଳାଇବା ସମ୍ଭାବନା କମ୍ ଥିବାରୁ କୁଲ୍ଦୀପଙ୍କୁ ଚୂଡାନ୍ତ ଏକାଦଶରେ ନେବା ଏକ ପ୍ରଶ୍ନବାଚୀ ହୋଇଛି। ଏ କ୍ଷେତ୍ରରେ ଦଳରେ ସନ୍ତୁଳନ ଆଣିବା କାଠିକର ପାଠ ହୋଇଯିବ ।
କିନ୍ତୁ ଅତୀତରେ ଭାରତ ୩ ଜଣିଆ ସ୍ପିନ୍ ଆକ୍ରମଣରେ ଖେଳିବାର ଅନେକ ଉଦାହରଣ ରହିଛି। ୨୦୧୪ ଇଂଲଣ୍ଡ ଗସ୍ତ ପରଠାରୁ ଭାରତ କେବଳ ୯ ଘରୋଇ ଟେଷ୍ଟ୍ରେ ଏବଂ ଦେଶ ବାହାରେ କେବଳ ଗଲ୍ରେ ଏଭଳି କରିଥିଲା। ସବୁଠାରୁ ମଜା କଥା ହେଲା ୨୦୧୬ରେ ଘରୋଇ ମାଟିରେ ଇଂଲଣ୍ଡ ବିପକ୍ଷ ସମସ୍ତ ୫ ଟେଷ୍ଟ୍ରେ ୩ ସ୍ପିନ୍ ଆକ୍ରମଣରେ ଖେଳି ଭାରତ ୪-୦ରେ ବିଜୟୀ ହୋଇଥିଲା। ଏବେ ଇଂଲଣ୍ଡର ପିଚ୍ ଓ ପରିବେଶକୁ ନଜରରେ ରଖି ଭାରତ ୨ ପେସ୍ ଓ ୩ ସ୍ପିନ୍ ଯୋଜନାକୁ ମଧ୍ୟ ବିଚାରରେ ରଖିଛି। କିନ୍ତୁ ଓ୍ଵିକେଟରକ୍ଷକଙ୍କୁ ଛାଡ଼ି ଭାରତ ୫ ଜଣ ବ୍ୟାଟସମ୍ୟାନରେ ଖେଳିବ କି ନାଁ ଯୋଜନା କରୁଛି। କୋହଲି ନିଜର ୩୫ ଟେଷ୍ଟ୍ ନେତୃତ୍ୱ ସମୟରେ ୨୩ ମ୍ୟାଚ୍ରେ ୫ ଜଣ ବୋଲରଙ୍କୁ ନେଇ ଖେଳିଛନ୍ତି। ତେବେ ଇଂଲଣ୍ଡର ପିଚ୍ ପରିସ୍ଥିତିକୁ ନେଇ ସବୁକିଛି ନିର୍ଣ୍ଣୟ କରାଯିବ ।