କନକ ବ୍ୟୁରୋ : ଭାରତ ଓ ଆମେରିକାର ବନ୍ଧୁତ୍ୱକୁ ନେଇ ଚିନ୍ତାରେ ପଡିଯାଇଛି ଚୀନ । ଆଜି ଚୀନର ସରକାରୀ ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟରୁ ଏହା ସ୍ପଷ୍ଟ ହୋଇଛି । ଚୀନ ଗଣମାଧ୍ୟମ ପ୍ରମାଣ କରିବା ପାଇଁ ଚେଷ୍ଟା କରିଛି, ଯେ ଆମେରିକା ନିଜ ସ୍ୱାର୍ଥ ପାଇଁ ଭାରତକୁ ବ୍ୟବହାର କରୁଛି । କିନ୍ତୁ ପ୍ରକୃତ କଥା ହେଉଛି, ଏହି ଘନିଷ୍ଠତା ଉଭୟ ଭାରତ ଓ ଆମେରିକାକୁ ଶକ୍ତିଶାଳୀ କରୁଥିବାରୁ ଚିନ୍ତିତ ହୋଇ ପଡିଛି ଚୀନ ।
Kanak News is now on WhatsApp
Join and get latest news updates delivered to you via WhatsApp
ଗତ ମଙ୍ଗଳବାର ଦିନ ଟ୍ରମ୍ପ ସରକାରଙ୍କ କ୍ୟାବିନେଟ୍ ଅଧିକାରୀ ଜେମସ ମାଟିସଙ୍କ ପ୍ରଥମ ଭାରତ ଗସ୍ତ ଚୀନର ନିଦ ହଜାଇ ଦେଇଛି । ଆମେରିକାର ଡିଫେନ୍ସ ସେକ୍ରେଟାରୀ ଭାରତ ଆସି ତ -୧୬ ଆଡଭାନ୍ସଡ ଫାଇଟର୍ ଜେଟ୍ ଓ ସି ଗାରଡିଆନ୍ ଅନନେମଡ ଏରିଏଲ୍ ସିଷ୍ଟମ୍ ବିକ୍ରି ନେଇ ବୁଝାମଣା କରିବା ଘଟଣା ଚୀନ୍ ସରକାରଙ୍କୁ ବ୍ୟସ୍ତ କରି ଦେଇଛି ।
ଚୀନର ସରକାରୀ ଗଣମାଧ୍ୟମ ଗ୍ଲୋବାଲ୍ ଟାଇମ୍ସରେ ପ୍ରକାଶ ପାଇଥିବା ଏହି ରିପୋର୍ଟରୁ ଚୀନର ଏହି ବ୍ୟସ୍ତତା ସ୍ପଷ୍ଟ ଭାବେ ବାରି ହୋଇପଡୁଛି । ଏହି ଖବରକାଗଜ ଲେଖିଛି ଆମେରିକା ନିଜର ରଥରେ ଭାରତକୁ ବାନ୍ଧିବା ପାଇଁ ଚେଷ୍ଟା କରୁଛି । କିନ୍ତୁ ଚୀନ୍ ସହ ସଂପର୍କରେ ଭାରତକୁ ବ୍ୟବହାର କରିବା ଉଦ୍ଦେଶ୍ୟରେ ଆମେରିକା ସଫଳ ହେବ ନାହିଁ ।
ପ୍ରତିରକ୍ଷା ପ୍ରସ୍ତୁତିରେ ଭାରତ ଓ ଆମେରିକାର ଘନିଷ୍ଠତା – ଚୀନ୍ ପାଇଁ ନିଶ୍ଚୟ ଏକ ଚିନ୍ତାର କାରଣ । ଏହାର କାରଣ ହେଉଛି, ଏସିଆ ମହାଦେଶର ଏହି ଦୁଇ ମହାଶକ୍ତି ଚୀନ୍ ଓ ଭାରତ ମଧ୍ୟରୁ ଯଦି ଭାରତ ଅଧିକ ଶକ୍ତିଶାଳୀ ହୋଇଉଠେ ତେବେ ଚୀନ୍ ସହ ସୀମା ବିବାଦର ସମାଧାନ କ୍ଷେତ୍ରରେ ଚୀନକୁ ଅଧିକ ପ୍ରତିବନ୍ଧକର ସାମ୍ନା କରିବାକୁ ପଡିବ । ଅନ୍ୟପଟେ ଦକ୍ଷିଣ ଚୀନ୍ ମହାସାଗର ବିବାଦରେ ଭାରତ ସହ ମିଶିଗଲେ ଆମେରିକାର ଶକ୍ତି ଯଥେଷ୍ଟ ବଢିଯିବ ।
ଚୀନର ଏହି ସରକାରୀ ଗଣମାଧ୍ୟମ କହିଛି ଭାରତ – ଆମେରିକା ବନ୍ଧୁତ୍ୱ ପଛରେ ଆମେରିକାର ଭିତିରି ଉଦ୍ଦେଶ୍ୟ ରହିଛି । ଏବଂ ଡୋନାଲ୍ଡ ଟ୍ରମ୍ପଙ୍କ ଆମେରିକା ଫାଷ୍ଟ୍ ପଲିସି ପାଇଁ ଭାରତକୁ ଯୁଦ୍ଧାସ୍ତ୍ର ବିକ୍ରି କରି ଭଲ ରାଜସ୍ୱ ସଂଗ୍ରହ କରିପାରିବ ।
ତେବେ ଚୀନର ଏଭଳି ଆଭିମୁଖ୍ୟ ବୟାନ୍ କରୁଛି ଡୋକଲାମ୍ ବିବାଦ ପରେ ଭାରତର ପ୍ରତି ପଦକ୍ଷେପକୁ ଚୀନ୍ ସରକାର ସତର୍କତାର ସହ ଦେଖୁଛନ୍ତି । ଏବଂ ଚୀନ୍ ମନେରଖିବା ଦରକାର ଭାରତ କାହାର ହାତବାରିସୀ ନୁହେଁ । ନିଜ ଶକ୍ତି ଉପରେ ବିଶ୍ୱାସ ରଖି ଆଗକୁ ବଢିଥାଏ , ଯାହା ଡୋକଲାମ୍ ପରେ ଚୀନ୍ ସନ୍ଦେହ କରିବା ଉଚିତ୍ ନୁହେଁ ।