ଲଙ୍କା ଚାଷ ପାଇଁ ଜଣାଶୁଣା ପଶ୍ଚିମ ଓଡିଶାର ବାମରା : ପ୍ରୋତ୍ସାହନ ଅଭାବ ଓ ଜଳ ସେଚନର ସୁବିଧା ନଥିବାରୁ ଲଙ୍କା ଚାଷରୁ ମୁହଁ ଫେରାଉଛନ୍ତି ଚାଷୀ
କନକ ବ୍ୟୁରୋ : ଲଙ୍କା ଚାଷ ପାଇଁ ବେଶ ଜଣାଶୁଣା ପଶ୍ଚିମ ଓଡିଶାର କୁଚିଣ୍ଡା ଉପଖଣ୍ଡ ବାମରା । ଏଠାକାର ଚାଷୀ ଲଙ୍କା ଚାଷ କରି ଦେଶର ବିଭିନ୍ନ ରାଜ୍ୟକୁ ରପ୍ତାନୀ କରିଥାନ୍ତି । ରାଜ୍ୟର ବିଭିନ୍ନ ଅଂଚଳରେ ବି କୁଚିଣ୍ଡା ଲଙ୍କା ବେଶ ନାଁ କରିଛି । ଆଉ ସ୍ୱାବଲମ୍ବୀ ହୋଇପାରିଛନ୍ତି ବାମରା ଅଂଚଳର ଲଙ୍କା ଚାଷୀ । ତେବେ ପ୍ରୋତ୍ସାହନ ଅଭାବ ଓ ଜଳ ସେଚନର ସୁବିଧା ନଥିବାରୁ ଅନେକ ଚାଷୀ ଲଙ୍କା ଚାଷରୁ ମୁହଁ ଫେରାଇ ନେଉଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସମ୍ବଲପୁର ଜିଲ୍ଲା କୁଚିଣ୍ଡା ବାମରା ଅଂଚଳର ଏକର ଏକର ଜମିରେ ଲଙ୍କା ଚାଷ କରି ପେଟ ପୋଷିଥାନ୍ତି ଏଠାକାର ଚାଷୀ । ବାମରା ଜଳବାୟୁ, ଲଙ୍କା ଚାଷ ପାଇଁ ବେଶ ସହାୟକ ହୋଇଥାଏ । ଆଗରୁ ଏ ଅଂଚଳରେ ଲଙ୍କା ବିକ୍ରି କରିବାକୁ ଚାଷୀଙ୍କ ପାଇଁ କୌଣସି ସୁବିଧା ନଥିଲା । ହେଲେ ଗତ ବର୍ଷ ଠାରୁ ଲଙ୍କା ସଂଗ୍ରହ ପାଇଁ ସରକାରଙ୍କ ପକ୍ଷରୁ ମଣ୍ଡିର ବ୍ୟବସ୍ଥା କରାଯାଇଛି । ଚାଷୀ ସିଧାସଳଖ ମଣ୍ଡିକୁ ଆଣି ଲଙ୍କା ବିକ୍ରି କରି ବେଶ ଦୁଇ ପଇସା ଲାଭ ପାଉଛନ୍ତି ।
ସରକାରୀ ମଣ୍ଡିରେ ଧାନ ବିକ୍ରି କରି ଚାଷି ସିନା ବେଶ ଦୁଇ ପଇସା ରୋଜଗାର କରୁଛନ୍ତି ହେଲେ ଚାଷ ପାଇଁ ଜଳାଭାବ ମୁଖ୍ୟ ସମସ୍ୟା ଭାବେ ଉଭା ହୋଇଛି । ଜଳ ସେଚନର ସୁବିଧା ନଥିବାରୁ ଦୀର୍ଘ ୪୦-୫୦ ବର୍ଷରୁ ଲଙ୍କା ଚାଷ କରି ଗୁଜୁରାଣ ମେଂଟାଉଥିବା ଚାଷୀ ଲଙ୍କା ଚାଷରୁ ମୁହଁ ଫେରାଇ ନେଉଥିବା କହିଛନ୍ତି । ଶୁଖିଲା ଲଙ୍କାକୁ ମାନ ନିର୍ଣ୍ଣୟ କରାଯାଇ କିଣା ଯାଇଥାଏ । ମଣ୍ଡିରେ ଲଙ୍କା ବିକ୍ରି କରି ଚାଷୀ ଉପକୃତ ହେଉଛନ୍ତି ।