୧୧ ଦିନ ବିତିଗଲାଣି । ଏଯାଏଁ ବନ୍ଦ ହୋଇ ରହିଛି ହ୍ୟାକ୍ ହୋଇଥିବା ବିଜେପିର ଦଳୀୟ ୱେବସାଇଟ ।
କନକ ବ୍ୟୁରୋ : ବିଜେପିର ଦଳୀୟ ୱେବସାଇଟ ୧୧ ଦିନ ହେବ ହ୍ୟାକ୍ ହେବା ପରେ ମଧ୍ୟ ଏହା ଏଯାଏଁ ଆକ୍ଟିଭ ହୋଇନାହିଁ । ଗତ ମାର୍ଚ୍ଚ ୫ ତାରିଖରୁ ଏହି ୱେବସାଇଟ ହ୍ୟାକ୍ ହୋଇଥିଲା । ଆଉ ଏହାସହ ୱେବସାଇଟର ହୋମପେଜରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଜର୍ମାନ ଚାନସେଲର ଆଞ୍ଜେଲ ମର୍କେଲଙ୍କ ଫଟୋ ଦେଖିବାକୁ ମିଳିଥିଲା । କିନ୍ତୁ ଏହାପରେ ଲଗାତାର ୧୦ ଦିନ ହେବ ଏହି ୱେବସାଇଟ ଅଫଲାଇନ ହୋଇ ରହିଥିବା ବେଳେ ଦଳ ପକ୍ଷରୁ ଏକ ମେସେଜ ବାର୍ତ୍ତା ଦିଆଯାଇଛି । ଯେଉଁଥିରେ ଦଳୀୟ ୱେବସାଇଟ ମରାମତି କରାଯାଉଥିବା ଉଲ୍ଲେଖ ରହିଛି । ଖୁବଶୀଘ୍ର ୱେବସାଇଟ ଆକ୍ଟିଭ ମୋଡକୁ ଆସିବ ବୋଲି ଦର୍ଶାଯାଇଛି ।
Kanak News is now on WhatsApp
Join and get latest news updates delivered to you via WhatsApp
୧୧ ଦିନ ହେବ ଏହି ୱେବସାଇଟ ହ୍ୟାକ୍ ହୋଇଥିଲେ ମଧ୍ୟ ଏଯାଏଁ କୌଣସି ଗ୍ରୁପ ଏଥିପାଇଁ ନିଜକୁ ଦାୟୀ କରିନାହାନ୍ତି । ତେବେ ମାର୍ଚ୍ଚ ୧୨ରେ କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ କହିଛନ୍ତି, ବିଜେପିର ୱେବସାଇଟ ମାତ୍ର କିଛି ମିନିଟ୍ ପର୍ଯ୍ୟନ୍ତ ହ୍ୟାକ୍ କରାଯାଇଥିଲା । ସମାଜରେ କିଛି ଦୃଷ୍ଟ ତତ୍ତ୍ୱ ରହିଛନ୍ତି ଯେଉଁମାନେ ଏଭଳି କାର୍ଯ୍ୟ କରୁଛନ୍ତି । କିନ୍ତୁ ହ୍ୟାକ୍ ହେବାର କିଛି ସମୟ ମଧ୍ୟରେ ୱେବସାଇଟକୁ ନିୟନ୍ତ୍ରଣ କରାଯାଇଥିଲା । କିନ୍ତୁ କେବେ ଯାଏଁ ୱେବସାଇଟ ଆକ୍ଟିଭ ମୋଡକୁ ଆସିବ ତାହା ସ୍ପଷ୍ଟ କରିନଥିଲେ ରବିଶଙ୍କର ।
ତେବେ ସାଇବର ଏକ୍ସପର୍ଟଙ୍କ କହିବା ଅନୁଯାୟୀ, ୧୦ ଦିନ ପରେ ମଧ୍ୟ ୱେବସାଇଟକୁ ଠିକ୍ କରାଯାଇନାହିଁ ଯାହା ଏକ ଆଶ୍ଚର୍ଯ୍ୟର କଥା । ସାଧାରଣତଃ ୱେବସାଇଟକୁ ଠିକ୍ କରିବା ପାଇଁ ୨ରୁ ୩ ଘଣ୍ଟା ସମୟ ଲାଗିଥାଏ । କିନ୍ତୁ ବିଜେପି ୱେବସାଇଟ୍ ହ୍ୟାକ୍ ହେବାର ୧୦ ଦିନ ବିତିଯାଇଥିଲେ ମଧ୍ୟ ଏଯାଏଁ ଠିକ୍ ହୋଇପାରି ନାହିଁ । ଗୋଟିଏ ପଟେ ବିଜେପି ଆଇଟି କ୍ଷେତ୍ରରେ ବୈପ୍ଲବିକ ପରିବର୍ତ୍ତନ ହେଉଥିବା ନେଇ କହି ଆସୁଥିବା ବେଳେ ନିଜର ୱେବସାଇଟ ଠିକ୍ କରିବାକୁ ୧୦ ଦିନରୁ ଅଧିକ ସମୟ ନେବା ମୋଦି ସରକାରଙ୍କ ଆଇଟି ବିଫଳତାକୁ ପଦାରେ ପକାଇଛି ।