କନକ ବ୍ୟୁରୋ : ଆତଙ୍କବାଦୀ ସଙ୍ଗଠନ ଅଲ-କାଏଦାର ମୁଖ୍ୟ ଅଲଜ ଜୱାହିରି ଆମେରିକାର ଡ୍ରୋନ ଆକ୍ରମଣରେ ପ୍ରାଣ ହରାଇଛି । ଜୱାହିରିର ମୃତ୍ୟୁ ପରେ ଆମେରିକା ଅଧିକ ସତର୍କ ହୋଇ ପଡିଛି । ଆଉ ଏସବୁ ଭିତରେ ଆମେରିକାର ବିଦେଶ ମନ୍ତ୍ରାଳୟ ଏକ ସତର୍କ ସୂଚନା ଜାରି କରିଛି ।
Kanak News is now on WhatsApp
Join and get latest news updates delivered to you via WhatsApp
ଆମେରିକା ପକ୍ଷରୁ କୁହାଯାଇଛି ଯେ, ମୋଷ୍ଟ ୱାଣ୍ଟେଡ ଆତଙ୍କବାଦୀ ଅଲ ଜୱାହିରି କାବୁଲର ଏକ ଡ୍ରୋନ ଆକ୍ରମଣରେ ପ୍ରାଣ ହରାଇଛି । ଆମେରିକା ସେନା ପକ୍ଷରୁ ଜୱାହିରିକୁ ନିପାତ କରାଯାଇଛି । ୧୧ ସେପ୍ଟେମ୍ବର ୨୦୦୧ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ଥିଲା ଜୱାହିରି । ସବୁବେଳେ ନିଜ ସମର୍ଥକ ମାନଙ୍କୁ ଆମେରିକା ବିରୋଧରେ ଉସକାଉଥିଲା । ଆମେରିକା ଉପରେ ଆକ୍ରମଣ କରିବାକୁ ପ୍ରବର୍ତ୍ତାଉଥିଲା । ତେଣୁ ଜୱାହିରିର ମୃତ୍ୟୁ ପରେ ଅଲ-କାଏଦାର ସମର୍ଥକ କିମ୍ବା ଏହାସହ ଜଡିତ ଆତଙ୍କବାଦୀ ସଙ୍ଗଠନ ଆମେରିକା ସେବା, ଲୋକଙ୍କୁ ଟାର୍ଗେଟ କରିପାରନ୍ତି । ଏଭଳି ଆତଙ୍କବାଦୀ ଆକ୍ରମଣ ହଠାତ୍ ହିଁ ହୋଇଥାଏ । ତେଣୁ ଆମେରିକାର ନାଗରିକ ମାନେ ଅଧିକ ସତର୍କ ରହିବା ସହ ବିଦେଶ ଭ୍ରମଣ ବେଳେ ପାରିପାଶ୍ୱିକ ପରିସ୍ଥିତି ଉପରେ ନଜର ରଖିବାକୁ ସତର୍କ କରାଇଛି ବିଦେଶ ମନ୍ତ୍ରାଳୟ ।
ଜୱାହିରି ପେଶାରେ ଜଣେ ସର୍ଜନ ଥିଲା । ମାତ୍ର ୧୪ ବର୍ଷ ବୟସରେ ମୁସଲିମ ବ୍ରଦରହୁଡ ସଙ୍ଗଠନରେ ସାମିଲ ହୋଇଥିବା ଜୱାହିରି ପରେ ଇଆଇଜେ ଗଠନ କରିଥିଲା । ୧୯୭୦ରେ ମିଶର ସରକାର ବିରୋଧରେ ମୋର୍ଚ୍ଚା ଖୋଲିଥିଲା ଜୱାହିରି । ୧୯୮୧ରେ ମିଶରର ରାଷ୍ଟ୍ରପତିଙ୍କ ହତ୍ୟା ପରେ ଜୱାହିରିଙ୍କୁ ଗିରଫ କରାଯାଇ ଅକଥନୀୟ ଅତ୍ୟାଚାର ଦିଆଯାଇଥିଲା । ୩ ବର୍ଷ ଜେଲରେ କାଟିବା ପରେ ଜୱାହିରି ସାଉଦି ଆରବ ଚାଲି ଯାଇଥିଲେ । ଆଉ ସେଠାରେ ମେଡିକାଲ ପ୍ରାକ୍ଟିସ ଆରମ୍ଭ କରିଥିଲେ । ସାଉଦି ଆରବରେ ହିଁ ଜୱାହିରିର ଭେଟଘାଟ ଆଲକାଏଦା ମୁଖ୍ୟ ଓସାମା ବିନ୍ ଲାଡେନ ସହ ହୋଇଥିଲା । ଆଉ ଏହିଠାରେ ହିଁ ଉଭୟ ପରସ୍ପରର ଅତ୍ୟଧିକ ଘନିଷ୍ଠ ହୋଇଥିଲେ । ପରେ ବିଶ୍ୱର ମହାଶକ୍ତି କୁହାଯାଉଥିବା ଆମେରିକା ଉପରେ ଆତଙ୍କବାଦୀ ଆକ୍ରମଣ କରିବାକୁ ରଚିଥିଲେ ଷଡଯନ୍ତ୍ର । ଯେଉଁଥିରେ ଉଭୟ ସଫଳ ମଧ୍ୟ ହୋଇଥିଲେ । ଲାଡେନର ମୃତ୍ୟୁ ପରେ ଜୱାହିରି ଅଲ-କାଏଦା ସଙ୍ଗଠନର ମଙ୍ଗ ନିଜେ ଧରିଥିଲା । ଏପରିକି ବିଶ୍ୱର ବିଭିନ୍ନ ସ୍ଥାନରେ ହେଉଥିବା ଆତଙ୍କବାଦୀ ଆକ୍ରମଣ ପଛରେ ଜୱାହିରି ଥିଲା ମାଷ୍ଟରମାଇଣ୍ଡ ।