କନକ ବ୍ୟୁରୋ : ସ୍କୁଲ ପିଲାଙ୍କ ମଧ୍ୟରେ ବଢୁଥିବା ଡ୍ରଗ୍ସ, ମଦ ଓ ନିଶା ଅଭ୍ୟାସକୁ ନେଇ ସୁପ୍ରିମକୋର୍ଟ ଚିନ୍ତା ଜାହିର କରିଛନ୍ତି । ୬ ମାସ ଭିତରେ ଏହାରି ଉପରେ ରୋକ ଲଗାଇବାକୁ ଆକ୍ସନ ପ୍ଲାନ ପ୍ରସ୍ତୁତ କରିବାକୁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ଚିଫ ଜଷ୍ଟିସ ଟିଏସ ଠାକୁର ଓ ଜଷ୍ଟିସ ବି.ୱାଇ ଚନ୍ଦ୍ରଚୂଡଙ୍କ ଖଣ୍ଡପୀଠ ଏକ ଜନସ୍ୱାର୍ଥ ମାମଲାର ଶୁଣାଣି କରି ଏହି ନିର୍ଦ୍ଦେଶ ଜାରି କରିଛନ୍ତି । ୪ମାସରେ ସବୁ ସ୍କୁଲରେ ସର୍ଭେ କରି ପିଲାଙ୍କୁ ନିଶାରୁ ଉଦ୍ଧାର କରିବା ପାଇଁ ଉଚିତ ପଦକ୍ଷେପ ବାଛିବାକୁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ କେନ୍ଦ୍ର ସରକାର କି ପ୍ରକାର ଆକ୍ସନ ପ୍ଲାନ ପ୍ରସ୍ତୁତ କଲେ ତାହା କୋର୍ଟଙ୍କୁ ଜଣାଇବା ପାଇଁ ନିର୍ଦ୍ଦେଶନାମାରେ ରହିଛି । ଥରେ ସ୍କୁଲ ପିଲା ନିଶାରେ ଅଭ୍ୟସ୍ତ ହେବା ପରେ ତାଙ୍କୁ ନିଶା ସୌଦାଗର ହେବାକୁ ମାଫିଆମାନେ ଉସକାଇଥାନ୍ତି । ତେଣୁ ନିଶା ସେବନର କୁପରିଣାମ ସଂପର୍କରେ ସଚେତନ କରିବାକୁ ନୂଆ ପାଠ୍ୟ ଖସଡା ଉପରେ ମଧ୍ୟ ବିଚାର କରିବାକୁ କୋର୍ଟ କେନ୍ଦ୍ରକୁ ପରାମର୍ଶ ଦେଇଛନ୍ତି । ନୋବେଲ ବିଜୟୀ କୈଳାସ ସତ୍ୟାର୍ଥୀଙ୍କ ଏନଜିଓ ବଚପନ ବଚାଓ ତରଫରୁ ଦାୟର ମାମଲାର ଶୁଣାଣି କରି ସୁପ୍ରିମକୋର୍ଟ ଏହି ରାୟ ଦେଇଛନ୍ତି ।