ବୋରିସ ଜନସନ ସରକାରର ଦୁଇ କ୍ୟାବିନେଟ ମନ୍ତ୍ରୀଙ୍କ ଇସ୍ତଫା : ଅର୍ଥମନ୍ତ୍ରୀ ରିଷି ସୁନକ ଏବଂ ସ୍ୱାସ୍ଥ୍ୟ ମନ୍ତ୍ରୀ ସାଜିଦ୍ ଜାଭିଦ ଅସନ୍ତୋଷ ଜାହିର କରି ଦେଲେ ଇସ୍ତଫା
କନକ ବ୍ୟୁରୋ : ବ୍ରିଟେନର ବୋରିସ୍ ଜନସନ ସରକାରରୁ ଦୁଇ କ୍ୟାବିନେଟ ମନ୍ତ୍ରୀ ଇସ୍ତଫା ଦେଇଛନ୍ତି । ଅର୍ଥମନ୍ତ୍ରୀ ତଥା ଭାରତୀୟ ବଂଶୋଦ୍ଭବ ରିଷି ସୁନକ ଏବଂ ସ୍ୱାସ୍ଥ୍ୟ ମନ୍ତ୍ରୀ ସାଜିଦ୍ ଜାଭିଦ୍ ପ୍ରଧାନମନ୍ତ୍ରୀ ବୋରିସ୍ ଜନସନଙ୍କ ସରକାରରୁ ଇସ୍ତଫା ଦେଇଛନ୍ତି । ବ୍ରିଟେନର ଅର୍ଥମନ୍ତ୍ରୀ ରିଷି ସୁନକ ଏବଂ ସ୍ୱାସ୍ଥ୍ୟ ସଚିବ ସାଜିଦ ଜାଭିଦ ମଙ୍ଗଳବାର ନିଜ ପଦରୁ ଇସ୍ତଫା ଦେଇଛନ୍ତି । ଉଭୟ ମନ୍ତ୍ରୀ ପ୍ରଧାନମନ୍ତ୍ରୀ ବୋରିସ୍ ଜନସନଙ୍କୁ ବିଶ୍ୱାସ କରୁନାହାନ୍ତି ବୋଲି କହି ଇସ୍ତଫା ଦେଇଛନ୍ତି । ନିକଟରେ ଅବିଶ୍ୱାସ ପ୍ରସ୍ତାବର ସାମ୍ନା କରି ପାସ୍ ହୋଇଥିବା ବ୍ରିଟେନର ପ୍ରଧାନମନ୍ତ୍ରୀ ବୋରିସ୍ ଜନସନ ସରକାରକୁ ପୁଣି ଥରେ ଅଡୁଆ ସାମ୍ନା କରିପାରନ୍ତି ବୋଲି କୁହାଯାଉଛିି ।
Kanak News is now on WhatsApp
Join and get latest news updates delivered to you via WhatsApp
ଜାଭିଦ ନିଜ ଇସ୍ତଫା ପତ୍ରରେ କହିଛନ୍ତି, ଜାତୀୟ ସ୍ୱାର୍ଥ ଦୃଷ୍ଟିରୁ ଜନସନଙ୍କ ଶାସନ କ୍ଷମତା ଉପରେ ଅନେକ ସାଂସଦ ଓ ଜନସାଧାରଣ ଆସ୍ଥା ହରାଇଛନ୍ତି । ତେଣୁ ସେ ସ୍ୱାସ୍ଥ୍ୟ ମନ୍ତ୍ରୀ ପଦରୁ ଇସ୍ତଫା ଦେଉଛନ୍ତି ବୋଲି କହିଛନ୍ତି । ସେହିପରି ବ୍ରିଟେନର ଅର୍ଥମନ୍ତ୍ରୀ ରିଷି ସୁନକ ନିଜ ଇସ୍ତଫା ପତ୍ରରେ କହିଛନ୍ତି, ସରକାର ଠିକ୍ କାମ କରିବେ ବୋଲି ଲୋକେ ଆଶା କରୁଛନ୍ତି । ଏହା ଦକ୍ଷତାର ସହ ଏବଂ ଗମ୍ଭୀରତାର ସହ କାମ କରିବ । ମୋର ବିଶ୍ୱାସ ଏହା ମୋର ଶେଷ ମନ୍ତ୍ରୀ ପଦ ହୋଇପାରେ । କିନ୍ତୁ ଏହିସବୁ ମାପଦଣ୍ଡ ପାଇଁ ଲଢ଼ିବା ଯଥାର୍ଥ ଏବଂ ସେଥିପାଇଁ ସେ ଇସ୍ତଫା ଦେଉଛନ୍ତି ବୋଲି କହିଛନ୍ତି ।