କନକ ବ୍ୟୁରୋ: କଂଗ୍ରେସ ନେତା କହ୍ନେୟା କୁମାର ବୁଧବାର ଦାବି କରିଛନ୍ତି ବିଜେପି ୧୯୯୦ରେ ଯେଉଁ ରଥଯାତ୍ରା କରିଥିଲା ତାହା ଶାସନ କ୍ଷମତା ହାସଲ ପାଇଁ । ତେବେ କଂଗ୍ରେସ ଯେଉଁ ଭାରତ ଯୋଡ ଯାତ୍ରା କରୁଛି ତାହା ‘ସତ୍ୟ’ ପାଇଁ । କହ୍ନେୟା କୁମାରଙ୍କୁ ଦଳର ଭାରତ ଯାତ୍ରୀ କରାଯାଇଛି । ସେ କନ୍ୟାକୁମାରୀରୁ କାଶ୍ମୀର ଯାଏ ୩୫୭୦ କିଲୋମିଟର ଯାତ୍ରା କରିବେ । ଆହୁରି ମଧ୍ୟ ସେ କହିଛନ୍ତି ଯେ କଂଗ୍ରେସର ଏହି ଉଦ୍ୟମ ରାଜନୈତିକ ନୁହେଁ ।
Kanak News is now on WhatsApp
Join and get latest news updates delivered to you via WhatsApp
କହ୍ନେୟା କୁମାର କହିଛନ୍ତି କରୋନା କାଳରେ ସାଧାରଣ ଜନତା ଦିଲ୍ଲୀ, ମୁମ୍ବାଇରୁ ଚାଲି ଚାଲି ବିହାର ଯାଏ ଯାଇଥିଲେ । ବର୍ତ୍ତମାନ ଦେଶର ନେତା ଚାଲିଚାଲି ବିଭିନ୍ନ ସ୍ଥାନକୁ ଯିବେ । ଖବର ସରବରାହ ସଂସ୍ଥା ପିଟିଆଇକୁ ଦେଇଥିବା ସାକ୍ଷାତକାରରେ ସେ କହିଛନ୍ତି, ଏହା ଦେଶର ଚିନ୍ତାଧାରାର ପ୍ରତିନିଧିତ୍ୱ କରିଥାଏ । ତେବେ ୧୯୯୦ର ଲାଲକୃଷ୍ଣ ଆଡଭାନୀଙ୍କ ରଥଯାତ୍ରାକୁ ନେଇ ପ୍ରଶ୍ନର ଉତ୍ତରରେ କହିଛନ୍ତି, ସେହି ରଥଯାତ୍ରା ରାଜନୈତିକ ଯାତ୍ରା ଥିଲା ଯାହା ଶାସନ କ୍ଷମତା ହାସଲ ପାଇଁ ହୋଇଥିଲା । ଏହି ଯାତ୍ରା ସତ୍ୟକୁ ଉଜାଗର ପାଇଁ ହୋଇଛି ।
ଯାତ୍ରାର ଲକ୍ଷ୍ୟ ବାବଦରେ ପ୍ରଶ୍ନ ପରେ ସେ କହିଥିଲେ, ଯଦି ଲୋକ ସାମାଜିକ ଗଣମାଧ୍ୟମରେ ଚାଲୁଥିବା ଖବରର ଆଧାରରେ ଭୁଲବୁଝାମଣାର ଶିକାର ହେବେ ତେବେ ଜଣେ ଦାୟିତ୍ୱବାନ ନାଗରିକ ଭାବେ ଲୋକଙ୍କ ଭାଇଭଉଣୀ ହୋଇ ତାଙ୍କ କଥା ଶୁଣିବାକୁ ପଡିବ । ମୁଁ ଜଣେ ବିହାରୀ, ଆପଣମାନେ ଦେଖିଥିବେ କରୋନା କାଳରେ ଲୋକମାନେ ଗୁରୁଗ୍ରାମ, ମୁମ୍ବାଇ ଭଳି ସ୍ଥାନରୁ ଚାଲିଚାଲି ବିହାରରେ ପହଞ୍ଚିଥିଲେ । ତେବେ କଣ ନେତା ମାନଙ୍କୁ ଚାଲିବା ଦରକାର ନାହିଁ?