ସେବା କ୍ଷେତ୍ରରେ ଅନନ୍ୟା ସେବିକା । ଏମିତି ଡାକ୍ତର ଝିଅ ଜନ୍ମ ହେଲେ ନିଅନ୍ତି ନାହିଁ ଫିସ୍ ।
କନକ ବ୍ୟୁରୋ: ଆମ ସମାଜରେ ଶିକ୍ଷତଙ୍କ ସଂଖ୍ୟା ବଢିଛି । ଆଧୁନିକତାର ଶୀର୍ଷରେ ପହଞ୍ଚିଛି ଦେଶ । ତଥାପି ଅନେକ ସ୍ଥାନରେ କନ୍ୟା ଭ୍ରୁଣ ହତ୍ୟା ଘଟଣା ଘଟୁଛି । କେଉଁଠି ଡଷ୍ଟବିନରୁ ତ କେଉଁଠି ରାସ୍ତାକଡରୁ ଉଦ୍ଧାର ହେଉଛନ୍ତି ନବଜାତ ଶିଶୁ କନ୍ୟା । କେବଳ ଏତିକି ନୁହେଁ ମାତୃଗର୍ଭରୁ ହିଁ ଅନେକ ସମୟରେ କନ୍ୟାଭ୍ରୁଣକୁ ହତ୍ୟା କରାଯାଉଛି । ଏପରି ଲଜ୍ଜା ଭିତରେ କନ୍ୟାଙ୍କୁ ସୁରକ୍ଷା ଦେବାକୁ ଆଗେଇ ଆସିଛନ୍ତି ଜଣେ ମହିଳା, ଡାକ୍ତର ସିପ୍ରା ଧର ।
Kanak News is now on WhatsApp
Join and get latest news updates delivered to you via WhatsApp
ସ୍ୱାର୍ଥପର ସମାଜରେ ବି ଆମ ଦେଶରେ ଏପରି ଅନେକ ଡାକ୍ତର ଅଛନ୍ତି ଯେଉଁମାନେ ନିଃସ୍ୱାର୍ଥପର ଭାବେ ରୋଗୀ ସେବା କରୁଛନ୍ତି । ସେମାନଙ୍କ ମଧ୍ୟରୁ ଜଣେ ଡାକ୍ତର ସିପ୍ରା ଧର । କନ୍ୟା ସୁରକ୍ଷା ପାଇଁ ଅଣ୍ଟା ଭିଡିଛନ୍ତି । ଚଳାଇଛନ୍ତି ଅଭିନବ ପ୍ରୟାସ ।
ତାଙ୍କ ହସ୍ପିଟାଲରେ କୌଣସି କନ୍ୟା ସନ୍ତାନ ଜନ୍ମ ହେଲେ ତାକୁ ନିଜ ପରିବାରର ଜଣେ ସଦସ୍ୟ ଭଳି ଗ୍ରହଣ କରି ଉତ୍ସବ ପାଳନ କରନ୍ତି । ପୁରା ହସ୍ପିଟାଲରେ ନିଜ ତରଫରୁ ମିଠା ବାଣ୍ଟନ୍ତି । ଯଦି ସିଜରିଆନ୍ ଡେଲିଭରୀରେ କନ୍ୟା ସନ୍ତାନ ଜନ୍ମ ହୁଏ ତେବେ ଅପରେସନ୍ ଟଙ୍କାଟିଏ ବି ନିଅନ୍ତି ନାହିଁ । ଖାଲି ସେତିକି ନୁହେଁ ମା’ ଓ ନବଜାତ କନ୍ୟା ହସ୍ପିଟାଲରେ ଯେତେ ଦିନ ରହୁନ୍ତୁ ନା କହିଁକି ସେଥିପାଇଁ ମଧ୍ୟ କିଛି ଅର୍ଥ ନିଅନ୍ତି ନାହିଁ । ଏହାକୁ ନେଇ ସାରା ଉତ୍ତରପ୍ରଦେଶରେ ତାଙ୍କର ଲୋକପ୍ରିୟତା ବଢିବାରେ ଲାଗିଛି । କାରଣ ଏଯାଏଁ ୧୦୦ରୁ ଉଦ୍ଧ୍ୱର୍ କନ୍ୟା ସନ୍ତାନଙ୍କ ଜନ୍ମରେ ନିଜ ତରଫରୁ ସବୁ ଖର୍ଚ୍ଚ ଗ୍ରହଣ କରିଛନ୍ତି ଡାକ୍ତର ସିପ୍ରା । ତାଙ୍କର ଏହି ସେବାର ମହକ ଛୁଟିଯାଇଥିଲା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପର୍ଯ୍ୟନ୍ତ । ଉତ୍ତରପ୍ରଦେଶ ଗସ୍ତବେଳେ ମୋଦୀ ଡାକ୍ତର ସିପ୍ରାଙ୍କୁ ଭେଟି କୃତଜ୍ଞତା ଜଣାଇବା ସହ ତାଙ୍କ କାମକୁ ଆହୁରି ବଢାଇନେବାକୁ ପ୍ରେରଣା ଦେବାକୁ ଯାଇ ତାଙ୍କୁ ସେବା କ୍ଷେତ୍ରରେ ଜଣେ ଉଦାହରଣ ଭାବେ ଅଭିହିତ କରିଥିଲେ ।
ଡାକ୍ତର ସିପ୍ରା ଗରୀବ ଝିଅଙ୍କୁ ପାଠ ପଢାଇବାର ଭାର ମଧ୍ୟ ନେଇଛନ୍ତି । ଏତିକି ନୁହେଁ ସେ ଗରୀବ ପରିବାରର ଝିଅ ମାନଙ୍କୁ ସୁକନ୍ୟା ସମୃଦ୍ଧି ଯୋଜନାର ସୁବିଧା ପାଇବାରେ ମଧ୍ୟ ସାହାଯ୍ୟ କରିଥାନ୍ତି । ଡାକ୍ତର ସିପ୍ରାଙ୍କ ସ୍ୱାମୀ ଡାକ୍ତର ମନୋଜ କୁମାର ଶୀବାସ୍ତବ ମଧ୍ୟ ତାଙ୍କୁ ଏହି କ୍ଷେତ୍ରରେ ସହଯୋଗର ହାତ ବଢାଇଛନ୍ତି ।
ଡାକ୍ତର ସିପ୍ରା ଧର ବନାରସ ହିନ୍ଦୁ ବିଶ୍ୱବିଦ୍ୟାଳରୁ ଏମବିବିଏସ୍ ପରେ ଏମଡି କରିଛନ୍ତି । ସେ ରୋଗୀ ସୋ ସହ ଅନେକ ସମାଜ ସୁଧାର କାର୍ଯ୍ୟରେ ମଧ୍ୟ ନିଜକୁ ସମର୍ପଣ କରିଛନ୍ତି । ସେ ନିଜ ବେତରୁ କିଛି ଅର୍ଥ ସଞ୍ଚୟ କରି ଗରୀବ ଓ ଅଭାବୀ ଲୋକଭ୍କୁ ଖାଦ୍ୟ ପୋଷାକ ଯୋଗାଇ ଦିଅନ୍ତି । ମାନବ ସେବା ହିଁ ମାଧବ ସେବା’ଉକ୍ତିକୁ ଜୀବନର ବ୍ରତ କରିଥିବା ଡାକ୍ତର ସିପ୍ରାଙ୍କୁ ସବୁ ମହଲରୁ ଛୁଟୁଛି ପ୍ରଶଂସାର ସୁଅ ।