ବୁଢୀମାଉସୀ ଦୋକାନରେ ପହଞ୍ଚି ପ୍ରତିଶ୍ରୁତି ଦେଲେ ବିଧାୟକ ସ୍ୱରୂପ ଦାସ । କହିଲେ, ମାଉସୀ ବ୍ୟସ୍ତ ହଅନା… ସବୁ ସମସ୍ୟା ମୁଁ ସମାଧାନ କରିଦେବି…
କନକ ବ୍ୟୁରୋ: ବୁଢୀମାଉସୀ ପାଖରେ ପହଞ୍ଚିଲେ ବିଧାୟକ । ଜୀବନ ଯୁଦ୍ଧରେ ଏକାଏକା ଲଢୁଥିବା ବୁଢୀ ମାଉସୀର ସଙ୍ଘର୍ଷର କାହାଣୀ ଦେଖି ପାଖକୁ ଧାଇଁଗଲେ ସଦର ବିଧାୟକ ସ୍ୱରୁପ ଦାଶ । ୯୨ ବର୍ଷରେ କେମିତି ଜଣେ ବୃଦ୍ଧା ପାନ ଭାଙ୍ଗି ପରିବାର ଚଳାଉଛି, ବୟସର ପଶ୍ଚିମ ତୀରରେ ନଇଁ ପଡିଥିବା ଅଣ୍ଟାକୁ ସିଧା କରି ଘରର ବୋଝ ବୋହୁଛି । ଆଉ ତା ଚମ ଧୁଡୁଧୁଡୁ ଶକ୍ତିହୀନ ହାତରେ କେମିତି ଆତ୍ମବିଶ୍ୱାସର ଅଗ୍ନି ଜାଳି ଜୀବନ ଜିଉଁଛି । ଏ କଥା କନକ ନ୍ୟୁଜରୁ ଦେଖିବା ପରେ ବ୍ୟଥିତ ହୋଇଥିଲେ ବିଧାୟକ । ଆଉ ସଙ୍ଗେ ସଙ୍ଗେ ମାଉସୀଙ୍କ ପାଖକୁ ଯାଇ ତାଙ୍କୁ ଭେଟିଥିଲେ । କହିଥିଲେ, ମାଉସୀ ବ୍ୟସ୍ତ ହଅନା… ତୋର ସବୁ ସମସ୍ୟା ମୁଁ ସମାଧାନ କରିଦେବି । ବାସ୍ ବିଧାୟକଙ୍କ ଏଇ ପଦିଏ କଥା ପରେ ହର ମାଉସୀ ମୁହଁରେ ହସ ଫୁଟିଛି । ତା ପାନଖିଆ ପାଟିର ଖିଲି ଖିଲି ନାଲି ହସ ପାଙ୍ଗୁଳା ପାଟି ଦେଇ ବାହାରି ଆସିଛି । ଆଉ ଦୀର୍ଘ ଦିନ ପରେ ମାଉସୀ ମାରିଛି ଏକ ଦୀର୍ଘ ନିଶ୍ୱାସ ।
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର ମାଣିଖମ୍ବ ଅଞ୍ଚଳରୁ ଚାଲି ଚାଲି ଆସି ଟାଉନ ହଲ ଛକରେ ପାନ ଦୋକାନ କରି ପରିବାର ପୋଷୁଥିବା ୯୨ ବର୍ଷର ବୁଢି ମାଉସୀ ହରପ୍ରିୟା ଦେଙ୍କ କଷ୍ଟର କାହାଣୀ କନକ ନ୍ୟୁଜରେ ପ୍ରସାରଣ ହୋଇଥିଲା । ମାତ୍ର ୯ ବର୍ଷରୁ ବିବାହ କରି ୨୦ ବର୍ଷରେ ସ୍ୱାମୀ ହରାଇଥିବା ହରମାଉସୀ ଏକାଏକା ଆଜି ଯାଏଁ ଅନେକ କଷ୍ଟ ସହିଛନ୍ତି କିନ୍ତୁ କେବେ କାହା ପାଖେ ହାତ ପାତି ନାହାନ୍ତି କି ହାରି ନାହାନ୍ତି । ମାଉସୀଙ୍କ ଏଇ ସ୍ୱାଭିମାନ ମନବୃତ୍ତି ପାଇଁ ବିଧାୟକ ସ୍ୱରୂପ ଦାଶ ସରକାରୀ ଯୋଜନାରେ ତାଙ୍କୁ ଗୋଟେ ଘର କରିଦେବେ ବୋଲି ପ୍ରତିଶ୍ରୁତି ଦେଇଛନ୍ତି ।
ତେବେ ବିଧାୟକଙ୍କୁ ଦେଖି କାନ୍ଦି ପକାଇଥିଲେ ହରମାଉସୀ । ଏତେ ଦିନ ହେବ କେହି ତାଙ୍କ କଥା ଶୁଣୁ ନଥିବା ବେଳେ ସେ ତାଙ୍କ ଦୁଃଖ ଶୁଣିଛନ୍ତି । ଦୀର୍ଘ ଦିନ ହେବ ଅଣଦଖା ପରେ ତାଙ୍କ ଉପରେ କାହାର ନଜର ପଡିଛି । ଏଇ କଥା ଭାବି ଆଖି ଛଳ ଛଳ କରିବା ସହ ପୁଅ ଭଳି ବିଧାୟକଙ୍କ ମୁଣ୍ଡରେ ତାଙ୍କ ଆଶିର୍ବାଦର ହାତ ବୁଲାଇ ଆଣିଛନ୍ତି ।
ହରମାଉସୀର ଏ ଶକ୍ତିହୀନ ହାତକୁ ଧରି ବିଧାୟକ ସ୍ୱରୂପ ଶକ୍ତ ପ୍ରତିଶ୍ରୁତି ଦେବାପରେ ଶ୍ରଦ୍ଧାରେ ମାଉସୀ ନିଜ ଦୋକାନରୁ ସମସ୍ତଙ୍କୁ ସ୍ନେହର ଚକୋଲେଟ ବାଣ୍ଟିଛନ୍ତି । କୁହାଯାଏ ଜୀବନରେ ଯେତେ କଷ୍ଟ ଥାଉ, ଯେତେ ଦୁଃଖ ଥାଉ ଯଦି ହୃଦୟରୁ ଗୋଟେ ଖୋଲା ହସ ହସି ମଣିଷ ବଞ୍ଚୁଛି ତେବେ ସେ ମଲାଯାଏଁ ସମସ୍ତଙ୍କ ମନକିଣୁଥିବ । ଏଇ ଯେମିତି ହରମାଉସୀ, ହଜାରେ ହଇରାଣ ଭିତରେ ବି ତା ପାନୁଆ ପାଟିରେ ହସଟେ ହସିବାକୁ ଭୁଲେନି…