ବଢୁଥିବା ବ୍ଲାକ ଫଙ୍ଗସ୍ ସଂକ୍ରମଣକୁ ନେଇ ଚିନ୍ତାରେ ମହାରାଷ୍ଟ୍ର ସରକାର । ସେପଟେ କିଛି ସହରରେ ଏବେ ବି ବୃଦ୍ଧି ପାଉଛି କରୋନା ସଂକ୍ରମଣ
କନକ ବ୍ୟୁରୋ : ମହାରାଷ୍ଟ୍ରରେ କରୋନା ସଂକ୍ରମଣ ଏବେ ସ୍ଥିର ରହିଛି । ନିର୍ଦ୍ଧିଷ୍ଟ କିଛି ସହର ବ୍ୟତୀତ ସାରା ରାଜ୍ୟରେ ସଂକ୍ରମଣ ହାର କମିବାରେ ଲାଗିଛି । ହେଲେ ଏହାରି ମଧ୍ୟରେ ମହାରାଷ୍ଟ୍ର ସରକାରଙ୍କ ଚିନ୍ତା ବଢାଇଛି ବ୍ଲାକ ଫଙ୍ଗସ୍ ସଂକ୍ରମଣ ।
Kanak News is now on WhatsApp
Join and get latest news updates delivered to you via WhatsApp
ମହାରାଷ୍ଟ୍ର ସରକାରଙ୍କ ସ୍ୱାସ୍ଥ୍ୟ ବିଭାଗ ମୁତାବକ ରାଜ୍ୟରେ ଏପର୍ଯ୍ୟନ୍ତ ୯.୨୬୮ ଜଣଙ୍କ ଠାରେ ବ୍ଲାକ ଫଙ୍ଗସ୍ ସଂକ୍ରମଣ ଚିହ୍ନଟ ହୋଇଛି ଓ ୧୧୨ ଜଣ ଲୋକଙ୍କର ମୃତ୍ୟୁ ହୋଇଛି । ଅନ୍ୟପଟେ ବ୍ଲାକ ଫଙ୍ଗସ୍ ଭୂତାଣୁ ଦ୍ୱାରା ସଂକ୍ରମିତ ହୋଇଥିବା ଲୋକଙ୍କ ମଧ୍ୟରୁ ୫,୦୯୧ ଜଣ ସୁସ୍ଥ ହୋଇଛନ୍ତି । ନାଗପୁର, ପୁଣେ, ଔରଙ୍ଗାବାଦ,ନାଶିକ୍, ସୋଲାପୁର ଓ ମୁମ୍ବାଇ ସହରରେ ସବୁଠାରୁ ଅଧିକ ବ୍ଲାକ ପଙ୍ଗସ୍ ସଂକ୍ରମିତ ଚିହ୍ନଟ ହେଉଛନ୍ତି । ଅନ୍ୟପଟେ ବ୍ଲାକ ଫଙ୍ଗସ୍ ସଂକ୍ରମଣରେ ମୃତ୍ୟୁହାର ୧୨ ପ୍ରତିଶତ ରହିଛି । ମହାରାଷ୍ଟ୍ର ସରକାରଙ୍କ ସ୍ୱାସ୍ଥ୍ୟ ବିଭାଗର ସୂଚନା ମୁତାବକ ବ୍ଲାକ ଫଙ୍ଗସ୍ ସଂକ୍ରମଣରେ ପ୍ରଥମ ସ୍ଥାନରେ ନାଗପୁର ଓ ଦ୍ୱିତୀୟ ସ୍ଥାନରେ ପୁଣେ ରହିଛି ।
କହିରଖୁ କି ଦେଶରେ କରୋନାର ପ୍ରଥମ ଲହର ହେଉ କି ଦ୍ୱିତୀୟ ଲହର, ସବୁବେଳେ ସଂକ୍ରମଣ ହାରରେ ମହାରାଷ୍ଟ୍ର ଆଗରେ ରହିଛି । ଏହାସହ ମୃତ୍ୟୁହାର ବି ଅନ୍ୟରାଜ୍ୟ ତୁଳନାରେ ମହାରାଷ୍ଟ୍ରରେ ଅଧିକ ରହିଛି । ଗୋଟିଏ ଗୋଟିଏ ସମୟରେ ସାରା ଦେଶର ଦୈନିକ ସଂକ୍ରମଣ ୪୦ ପ୍ରତିଶତରୁ ଅଧିକ ସଂକ୍ରମିତ ମହାରାଷ୍ଟ୍ରରୁ ଚିହ୍ନଟ ହୋଇଛନ୍ତି । ଏବେ କରୋନା ସଂକ୍ରମଣ ଟିକେ ଥମିଥିବା ବେଳେ ମହାରାଷ୍ଟ୍ରର କୋହ୍ଲାପୁର, ପୁଣେ, ସାଂଗଲୀ ଜିଲ୍ଲାରେ କରୋନା ସଂକ୍ରମଣ ବଢିବାରେ ଲାଗିଛି । ଏହିସବୁ ଜିଲ୍ଲାରେ ଏବେ ଆକ୍ଟିଭ୍ କେସ ବି ବୃଦ୍ଧି ପାଇଛି । କେବଳ ମୁମ୍ବଇରେ ୧୧.୦୮୮ ଆକ୍ଟିଭ କେସ ଥିବା ରାଜ୍ୟ ସ୍ୱାସ୍ଥ୍ୟ ବିଭାଗ ସୂଚନା ଦେଇଛି ।