କନକ ବ୍ୟୁରୋ: ଦେଶ ଛାଡି ରାଷ୍ଟ୍ରପତି ଗୋଟବାୟା ରାଜପାକ୍ଷେ ଯିବା ପରେ ଶ୍ରୀଲଙ୍କାର ସ୍ଥିତି ଆହୁରି ସଙ୍ଗୀନ ହେବାରେ ଲାଗିଛି । ରାଜଧାନୀ କଲମ୍ବୋଠୁ ଆରମ୍ଭ କରି ବିଭିନ୍ନ ପ୍ରାନ୍ତରେ କେବଳ ଆଉ କେବଳ ହିଂସା, ପ୍ରତିବାଦ, ବିକ୍ଷୋଭ ଓ ପୋଡାଜଳା ଜାରି ରହିଛି । ସୁନାର ଲଙ୍କାରେ ଲାଗିଛି ସଙ୍କଟ ଓ ଆକ୍ରୋଶର ନିଆଁ । ଦେଶର ବିଭିନ୍ନ ସରକାରୀ କାର୍ଯ୍ୟାଳୟ ସହ ପ୍ରଧାନମନ୍ତ୍ରୀ ଆବାସ, ରାଷ୍ଟ୍ରପତି ଭବନ, ସଂସଦ ଭବନକୁ କବଜା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସ୍ଥିତି ଦିନକୁ ଦିନ ଆୟତ୍ତ ବାହାରକୁ ଚାଲିଯାଉଥିବା ଦେଖି କାର୍ଯ୍ୟକାରୀ ରାଷ୍ଟ୍ରପତି ରାନିଲ ବିକ୍ରମସିଂଘେ ସେନା ହାତରେ ଶାସନ ଭାର ଦେଇଛନ୍ତି । ଆବଶ୍ୟକ ପଡିଲେ ପ୍ରଦର୍ଶନକାରୀଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଆଦେଶ ଦିଆଯାଇଛି । ବୁଧବାରଠୁ ଶ୍ରୀଲଙ୍କା ସେନା ଆକ୍ସନ ମୋଡକୁ ଆସିଛି । ଜଳ,ସ୍ଥଳ ଓ ଆକାଶପଥରେ ଘୁରିବୁଲୁଛି ସେନା । ସେପଟେ ରାସ୍ତାରେ ପଇଁତରା ମାରୁଛି ସେନା ଗାଡି ।
ନିଜ ପରିବାର ସହ ଦେଶ ଛାଡିଯିବା ପରେ ଗୋଟବାୟା ପ୍ରଥମେ ମାଲଦ୍ୱୀପ ଓ ଏବେ ସିଙ୍ଗାପୁରରେ ପହଁଞ୍ଚିଥିବା ଜଣାପଡିଛି । ସାଉଦିଆରବରୁ ସିଙ୍ଗାପୁରରେ ପହଞ୍ଚିିଥିବା ସୂଚନା ରହିଛି । ସବୁଠୁ ବଡ କଥା ହେଉଛି ମାଳଦ୍ୱୀପ ଓ ସିଙ୍ଗାପୁରରେ ଥିବା ଶ୍ରୀଲଙ୍କାବାସୀ ଗୋଟବାୟାଙ୍କୁ ବିରୋଧ କରୁଛନ୍ତି । ସେପଟେ ଭାଇ ବାସିଲ ରାଜପକ୍ଷେ ଆମେରିକା ଚାଲିଯାଇଥିବା କୁହାଯାଉଛି । ପୂର୍ବର ଭାଇ ମହିନ୍ଦ୍ରା ରାଜପକ୍ଷେ ଶ୍ରୀଲଙ୍କା ଛାଡି କେଉଁଠି ଆତ୍ମଗୋପନ କରିଛନ୍ତି ତାର କୌଣସି ସୁରାକ ଏଯାଏଁ ମିଳୁନି ।
ଦେଶ ଛାଡି ପ୍ରଧାନମନ୍ତ୍ରୀ, ରାଷ୍ଟ୍ରପତି ଯିବା ପରେ ଆଗକୁ କଣ ହେବ ଶ୍ରୀଲଙ୍କାର ଭବିଷ୍ୟତ ସେକଥା ହୁଏତ ଏବେ କହିବା ସମ୍ଭବ ନୁହେଁ । କାରଣ ପ୍ରତିମୁହୁର୍ତରେ ଏଠାରେ ସ୍ଥିତି ବଦଳୁଛି । ସେପଟେ ଦେଶର ଆଗାମୀ ରାଷ୍ଟ୍ରପତି କିଏ ହେବ ତାକୁ ନେଇ ଚର୍ଚ୍ଚା ଜୋର ଧରିଛି ।ରେସରେ ସବୁଠୁ ଆଗରେ ରହିଛନ୍ତି ରାନିଲ ବିକ୍ରମସିଂଘେ,ଅନୁରା କୁମାରା ଦିଶାନାଏକ, ଦୁଲ୍ଲାସା ଓ ବିରୋଧୀ ନେତା ପ୍ରେମଦାସ ରହିଛନ୍ତି