ହୋଲି ପାଇଁ ରାଜଧାନୀରେ ରଙ୍ଗର ପସରା ! ହର୍ବାଲ୍ ରଙ୍ଗର ଚାହିଦା ବଢ଼ୁଛି
ପ୍ରେମର ଋତୁ ବସନ୍ତରେ ପ୍ରେମର ରଙ୍ଗରେ ଭିଜାଇବା ପାଇଁ ଆସୁଛି ହୋଲି । ତେଣୁ ରାଜଧାନୀରେ ପିଲାଙ୍କଠାରୁ ଆରମ୍ଭ କରି ଯୁବପିଢ଼ି, ବୟସ୍କ ସମସ୍ତେ ହୋଲିକୁ ଧୁମ୍ଧାମ୍ରେ ପାଳନ କରିବା ପାଇଁ ପ୍ରସ୍ତୁତ ହୋଇଗଲେଣି । ଏବେଠାରୁ ରାଜଧାନୀର ଗଳିକନ୍ଦିରେ ଖୋଲିଗଲାଣି ରଙ୍ଗର ପସରା ।
Kanak News is now on WhatsApp
Join and get latest news updates delivered to you via WhatsApp
ହୋଲିରେ ରଙ୍ଗ ଖେଳାଯାଉଥିଲେ ବି ତାହାର ଦୁଇ ତିନି ଆଗରୁ ବିଭିନ୍ନ ଅନୁଷ୍ଠାନ, ସ୍କୁଲ, କଲେଜ, ଅଫିସରେ ରଙ୍ଗ ଖେଳିବା ଧାରା ଏଇ କିଛି ବର୍ଷ ହେବ ଆରମ୍ଭ ହୋଇଛି । ଯେହେତୁ ହୋଲିରେ ଛୁଟି ପଡ଼େ, ତେଣୁ ବନ୍ଧୁମାନଙ୍କ ସହ ଆଗୁଆ ରଙ୍ଗରେ ରଙ୍ଗିନ ହେବାର ସୁଯୋଗକୁ କେହି ହାତଛଡ଼ା କରନ୍ତି ନାହିଁ । ଏଭଳି ଧାରାକୁ ନଜରରେ ରଖି ଦୋକାନୀମାନେ ଆଗୁଆ ରଙ୍ଗ ବିକ୍ରି ଆରମ୍ଭ କରିଦେଇଛନ୍ତି । ହଳଦୀ, ନାଲି, ନୀଳ, ବାଇଗଣି, ଗୋଲାପି ପରି ଅନେକ ରଙ୍ଗରେ ନିଜ ଦେକାନ ଭର୍ତ୍ତି କରିସାରିଲେଣି । ଅବିର କିଲୋ ୧୨୦ ଟଙ୍କା ଥିବା ବେଳେ ୧୦୦ ଗ୍ରାମ ପୁଡ଼ିଆ ୧୫ରୁ ୨୦ ଟଙ୍କା ଭିତରେ ବିକ୍ରି ହେଉଛି ।
ଏବର ଯୁବପିଢ଼ି ନିଜ ଶରୀର ଓ ତ୍ୱଚାକୁ ନେଇ ସଚେତନ ଥିବାରୁ ବଜାରରୁ ରାସାୟନିକ ରଙ୍ଗ ବଦଳରେ ହର୍ବାଲ ରଙ୍ଗ କିଣୁଛନ୍ତି । ତେଣୁ ଦୋକାନୀମାନେ ବହୁତ ପରିମାଣରେ ହର୍ବାଲ ରଙ୍ଗ ବିକ୍ରି କରୁଛନ୍ତି । ଏହାର ଦାମ୍ ୧୩୦ ଟଙ୍କା ରହିଛି । ଏହି ପ୍ୟାକେଟ ଭିତରେ ବିଭିନ୍ନ ରଙ୍ଗ ଉପଲବ୍ଧ ବୋଲି ମାର୍କେଟ ବିଲ୍ଡିଂରେ ଦୋକାନ ପକାଇଥିବା ପ୍ରମୋଦ ସିଂହ କୁହନ୍ତି । ଏହା ସହିତ ହୋଲିର କୁପ୍ରଭାବରୁ ଆଖି ଓ ମୁହଁକୁ ରକ୍ଷା କରିବା ପାଇଁ ବଜାରରେ ବିଭିନ୍ନ ପ୍ରକାରର ମାସ୍କ ମିଳୁଛି । ଏହାର ଦାମ୍ ୩୦ଟଙ୍କାରୁ ଆରମ୍ଭ ହୋଇ ୧୫୦ଟଙ୍କା ପର୍ଯ୍ୟନ୍ତ ରହିଛି । ଛୋଟ ପିଲାଙ୍କ ପାଇଁ ଡୋରେମନ, ବନ୍ଧୁକ, ରଙ୍ଗ ଥିବା ପାଣି ବଲ୍ର ମଧ୍ୟ ବେଶ୍ ଚାହିଦା ରହିଛି ।