ଏବେ ବିପଦ ମୁହଁରେ ଛାତି ପତେଇ ଛିଡା ହେଉଛି ବଣ । ଆଗକୁ ବାତ୍ୟା ପାଟିରେ ବିଲୀନ ହୋଇଯିବ ହେନ୍ତାଳ ବଣ ?
କନକ ବ୍ୟୁରୋ: ଜଙ୍ଗଲ ମରୁଛି, ଜୁଆର ମାଡୁଛି । ହଜିବାକୁ ବସିଲାଣି ହେନ୍ତାଳ ବଣ ! ସର୍ବନାଶ ହେଲାଣି ସୁରକ୍ଷା କବଚ ? ଯେବେଯେବେ ସମୁଦ୍ର ଉଗ୍ରରୂପ ଧାରଣ କରିଛି । ଭୟଙ୍କର ରୂପ ନେଇ ସ୍ଥଳ ଭାଗକୁ ମାଡି ଆସିଛି । ଆଉ ବାତ୍ୟା ବିକଟାଳ ଗର୍ଜନ କରି ବଡ ବଡ ଜୁଆର ସହ ପ୍ରଳୟ ସୃଷ୍ଟି କରିଛି ସେବେସେବେ ବିପଦ ମୁହଁରେ ଛାତି ପତେଇ ଛିଡା ହୋଇଛି ବଣ । ପ୍ରାଣୀ ଜଗତକୁ ବଞ୍ଚାଇବା ପାଇଁ ସୁରକ୍ଷା କବର ସାଜିଛି ହେନ୍ତାଳ ବଣ । ସେ ୧୯୭୧ ହେଉ କି ୧୯୮୨, ଅବା ହେଉ ୧୯୯୯ରେ ମହାବାତ୍ୟାର ମହାତାଣ୍ଡବ । ବଡ ବଡ ବିପର୍ଯ୍ୟୟରୁ ଉପକୂଳ ଓଡିଶାକୁ ସୁରକ୍ଷା ଦେଇଛି ଏହି ଲୁଣାଜଙ୍ଗଲ । ସଜସଜ ସମୁଦ୍ର ଭିତରୁ ସାଙ୍ଘାତିକ ଭାବେ ମାଡି ଆସୁଥିବା ବାତ୍ୟା ୟାସକୁ ବି ନିଜ ଆୟତ୍ତରେ ରଖିନେଲା ସୁଦୀର୍ଘ ହେନ୍ତାଳ ବଣ । ଯେଉଁଥି ପାଇଁ ଖାଲି କେନ୍ଦ୍ରାପଡା ନୁହେଁ ଅଳ୍ପକେ ବର୍ତ୍ତିଗଲା ଉପକୂଳ ଓଡିଶା ଆଉ ବଞ୍ଚିଗଲା ଅନେକ ଧନ ଜୀବନ…
Kanak News is now on WhatsApp
Join and get latest news updates delivered to you via WhatsApp
ବ୍ରାହ୍ମଣୀ, ବୈତରଣୀ ଓ ମହାନଦୀ ତ୍ରିକୋଣଭୂମୀରେ ଅବସ୍ଥିତି ଭିତରକନିକା ହେନ୍ତାଳବଣ । ଏହା ବିଶ୍ୱର ୨ୟ ବୃହତମ ବିସ୍ତାରିତ ଲୁଣାଜଙ୍ଗଲ । ବଡ ବଡ ଗଛ ଓ ଘଞ୍ଚ ଅରଣ୍ୟ ପାଇଁ ଏବା ସବୁଦ୍ରିକ ବିପତ୍ତିରୁ ସୁରକ୍ଷା ଦେଇଥାଏ । ଧାମରା ମୁହାଁଣଠୁ ବରୁଣେଇ ମୁହାଁଣ ଯାଏଁ ୬୭୨ ବର୍ଗ କିଲୋମିଟର ବିସ୍ତାରିତ ଲୁଣାଜଙ୍ଗଲ ପରିବେଶ ସନ୍ତୁଳନ ସହ ଜୈବ ବିବିଧତା ଏବଂ ସାମୁଦ୍ରିକ ଝଡବାତ୍ୟା ଏବଂ ସମୁଦ୍ରରେ ଉଠୁଥିବା ଜୁଆର ଓ ପବନକୁ ରୋକିବାରେ ସମର୍ଥ ହୋଇଥାଏ । ହେଲେ ଏବେ ଧିରେଧିରେ ହଜିବାକୁ ବସିଲାଣି ହେନ୍ତାଳ ବଣ । ଲୁଣାଜଙ୍ଗଲ ଲୋପ ପାଇବାକୁ ବସିଥିବାରୁ ଏବେ ଉପକୂଳ ପ୍ରତି ଅଧିକ ବିପଦ ବଢୁଛି । ହେନ୍ତାଳ ବଣର ଅନନ୍ୟ ଅବଦାନକୁ ସ୍ୱାର୍ଥପର ମଣିଷ ବୁଝି ପାରୁନଥିବା ବେଳେ ଏହାକୁ ନଷ୍ଟ କରି ଚାଲିଛି । ଯାହା ମାନବ ଜାତି ପାଇଁ ଆଗାମୀ ଦିନରେ ବୁମେରାଂ ସାଜିପାରେ…
ତେବେ ଜଙ୍ଗଲ ଅବକ୍ଷୟର ମୁଖ୍ୟ କାରଣ ପାଲଟିଛି ଚିଙ୍ଗୁଡି ଚାଷ । ମଣିଷ ନିଜର ଆବଶ୍ୟକତା ମେଣ୍ଟାଇବାକୁ ବିରାଟ ବିରାଟ ଜଙ୍ଗଲ କାଟି ପଦା କରି ପକାଉଛି । ଚିଙ୍ଗୁଡି ଘେରି ପାଇଁ ଜଙ୍ଗଲ ସଫା କରି ଗଛ କାଟି ଦେଉଥିବାରୁ ସମୁଦ୍ର କୂଳରେ ମାଳ ମାଳ ଥୁଣ୍ଟା ଗଛ ସର୍ବନାଶର ସାକ୍ଷୀ ପାଲଟିଛି । ଦିନେ ଯେଉଁ ଘଞ୍ଚ ଜଙ୍ଗଲ ସମୁଦ୍ରର ଜୁଆରକୁ ରୋକିବାରେ ସକ୍ଷମ ଥିଲା ଆଜି ଗଛ କଟାଯିବା ପରେ ଜଳ ସ୍ଥଳ ଭାଗକୁ ମାଡିଆସିବାକୁ ଧମକ ଦେଉଛି ।
ନଳକୂପକୁ ଜଙ୍ଗଲ ବିନାସର ମୁକସାକ୍ଷୀ ସାଜିଛି । ହେନ୍ତାଳ ବଣ ହାଣି ନଷ୍ଟ କରିବା ପରେ ଧିରେଧିରେ ଜୁଆର ମାଟି, ବାଲି ଗଭୀର ସମୁଦ୍ରକୁ ଧୋଇନେଇଛି ଆଉ ନଳକୂପର ନଗ୍ନ ଚିତ୍ର ଛାଡିଯାଇଛି । ୧୯୭୧ ମସିହା ମହାବାତ୍ୟାରେ ରାଜନଗର ସାତଭାୟା ଅଂଚଳର ପ୍ରାୟ ୧ ହଜାରରୁ ଉଦ୍ଧ୍ୱର୍ ଲୋକ ମୃତ୍ୟୁବରଣ କରିଥିଲେ । ସେଥିପାଇଁ ୧୯୭୨ ମସିହାରେ ଭିଏତନାମାର ଏକ୍ସପର୍ଟ ମାନେ ମତ ଦେଇଥିଲେ ଯେ ସମୁଦ୍ର ଉପକୂଳରେ ଘଂଚ ହେନ୍ତାଳବଣର ଆବଶ୍ୟକତା ରହିଛି । ପ୍ରାକୃତିକ ବିପର୍ଯ୍ୟୟ ମୁକାବିଲା ପାଇଁ ଲୁଣାଜଙ୍ଗଲର ଅପରାଜୟ ଶକ୍ତି ରହିଛି । ତେଣୁ ସରକାର ହେନ୍ତାଳବଣ ସୃଷ୍ଟି ଦିଗରେ ପଦକ୍ଷେପ ନେବାକୁ ପରାମର୍ଶ ଦିଆଯାଇଥିଲେ ବି ଲୋପ ପାଇଥିବା ଜଙ୍ଗଲରେ ଆଖି ଦୃଶିଆ ବୃକ୍ଷରୋପଣ ହୋଇନି କି ହେନ୍ତାଳ ବଣ ସୃଷ୍ଟି କରାଯାଇନି ।
ଚିଙ୍ଗୁଡି ଘେରି ଜଙ୍ଗଲ ନଷ୍ଟର କାରଣ ପାଲଟୁଥିବା ବେଳେ ଏହାକୁ ଉଚ୍ଛେଦ କରି ଲୁଣା ଜଙ୍ଗଲକୁ ସୁରକ୍ଷା ଦେଲେ ଆଗାମୀ ଦିନରେ ୟାସ ବାତ୍ୟା ପରି ବଡ ବଡ ବିପଦରୁ ବି ମଣିଷ ସମାଜର ସୁରକ୍ଷା କବଚ ସାଜିବ ହେନ୍ତାଳବଣ ।